100 мың $ парамен ұсталған шенеунік
2014 ж. 29 мамыр
2104
0
Қаржы полициясы агенттігінің қызметкерлері "Локомотив" АҚ атқарушы директоры Е.Қалаубаевты аса ірі мөлшерде пара алды деген күдікпен ұстады, ол сот санкциясымен қамауға алынды деп хабарлайды ведомствоның баспасөз қызметі.
Баспасөз қызметінің мәліметінше, ағымдағы жылғы 16 мамырда Қаржы полициясы агенттігінің қызметкерлері "Локомотив" АҚ атқарушы директоры Е.Қалаубаевты аса ірі мөлшерде пара алды деген күдікпен ұстады.
"Ол дизельдік жанар майды жеткізуге келісім-шартты жасауға жағдай жасау үшін "Нұр Табыс Мұнай НТМ" ЖШС өкілінен жалпы сомасы 100 мың АҚШ доллары көлемінде пара алған деп айыпталуда", - делінген Қазақстан жаңалықтары хабарламасында.
Сол күні Қалаубаевқа қатысты аса ірі мөлшерде пара алу фактісі бойынша қылмыстық іс қозғалды.
19 мамырда Қалаубаев сот санкциясымен қамауға алынды.
Бұдан басқа, пара алуға қатысқан деген айыппен "Қазтеміртранс" АҚ атқарушы директоры Д.Әлмусин іздеуге жарияланды. Қылмыстық іс тергелуде, өзге ақпарат тергеу мүддесіне байланысты жарияланбайды.
