Жаңақорған жұрты алаңдаулы

Жексенбi күнi кешкiлiк Жаңақорған кентiнен он шақырым жердегi Бiрлiк ауылына да қарғын су қауiп төн­дiрдi. Онға жуық үйдiң ауласын шайып кеткен. Жергiлiк­тi тұрғындар “билiк “Балатоғанға” жиналған суды бөгеу жұмыстарын өз дәре­же­сiнде жасамады” дейдi.

Жалпы, аудандағы тас­қынның жай-жапсары белгi­лi. Айтып келмейтiн апат, әуелде таудан аққан қарғын су жауыннан күш алып төменге ағылған. Оқиғаға байланысты жергiлiктi билiктiң бағасы айтпай-ақ түсiнiктi, ал зардап шеккен тұрғындар ақпарат бұрмаланды дейдi. Жаңақорғанға барған сапарды қаз-қалпында жеткiзейiк.

Үйiн су шайып кеткен кент тұрғындарының бiрi – Жаныбек Тоқбатыров. “Су келдi деген сәтте бала-шағаны, құжаттарды алып қана үлгер­дiк. Екiншi күнi тағы да тасыды ғой. Сол кезде аудан әкiмi Сұлтанбек Тәуiпбаев­тан “Мiндетсiнбе, iстесең өзiң үшiн iсте!” деген сөз естiдiк. Төрт КамАЗ топырақты өз ақшамызға сатып алып төктiк. Су үйдiң iргета­сын үңгiп кеттi. Қабырға жарылды, көрiп тұрсыз. Жалғыз менiң үйiм емес, көп үй сондай. Топырақпен көмiп тастаған бәрi, ертең тоң жiбiсе түгелдей сыр бере ме деген қауiп бар”, – дейдi ол.

Ресми мәлiмет “Жарамсыз үй жоқ, тек 30-дан аса үйдiң ауласына су толған, құдықтарына зақым келген” дегенге саяды. Ал су жүрiп өткен жолда жүздеген үй бар. Барлығы дерлiк есiк алдына топырақпен қорғаныш iстептi.