Украиналықтар Қазақстанға алаңдап хат жолдап жатыр

1
1643

Қазақстан Ішкі істер министрі Қалмұханбет Қасымовтың блогына өз қобалжуын білдірген Украина азаматтарынан хат келіп түсіп жатыр. Олар өз еліндегі жағдай Қазақстанда қайталанбаса екен деп тілеп, ғаламтордағы сыбыстарға өте сақ болуға кеңес берген. Өйткені Киевтегі дүрбелең топ, ең алдымен, ғаламтор арқылы даярланыпты…

«Еліңізде Украина сценарийінің белең алуына жол бермеуді өтінеміз. Біз де қамсыз болдық, әлеуметтік желілерге бөтен пиғылды, бірақ онысын байқатпайтын «пабликтердің» дендеп енуіне беріп алдық. Осылайша наразылық іс-қимылы дайындалады және адамдар да наразылыққа дайын болады» деп жазады өзін Галина малышева деп атаған біреу. Әлеуметтік желілерде пайда болған белгілі бір топқа көңіл бөлуді сұраған ол: «Біз басымыздан өткеріп жатқанды Қазақстанның басына бермесін деп тілейміз» дейді.

Өз кезегінде Қазақстан Ішкі істер министрлігі экстремизм мен ұлтаралық арандатушылық пен қастастықты туындату фактілеріне, соның ішінде Интернеттегісіне де қарсы шұғыл түрде әрекет ету бойынша шаралар қабылданып жатқанын жеткізген. «Сізге азаматтық ұстанымыңызды танытқаныңыз үшін ризашылық білдіреміз. Сіз жеткізген ақпарат негізге алынды, қазір осыған қатысты тексеру жүргізіп жатырмыз» делінеді Қасымовтың жауабында.

Тағы осындай мағынадағы бір хабарлама сол күні сайттан төбе көрсеткен. Ол өзін София Левченко деп таныстырыпты.

«Менің елімді, Украинамды шетелдіктермен қаржыландырылып, жалданған, біздің менталитетіміз бен мәдениетімізге мүлде жат агрессивті жауыздар жұлмалап, бөлшектеп жатыр. Сіздер де осыны қалайсыздар ма?.. Солтүстік Африка мен Таяу Шығыс мысалындағы осындай технология қазір барша әлемге мәлім. Сізге, жоғары деңгейлі кәсіби адам үшін бұл жаңалық та емес болар» деп жазған автор өз кеңесіне құлақ салуды сұрап, алғашқы хатта көрсетілген әлеуметтік желілердегі парақшаларға айырықша көңіл бөлуді өтінген.

«Мен сыртқы бақылаушы ғанамын, мұнда – мұрын астынан болашақ наразылық электораты дайындалып жатқанын ап-анық көріп тұрмын. Бізде де барлығы осылай басталған. Бір қарағанға әлеуметтік желілердегі «пабликтер» сондай қауіпті емес сынды. Мұндай сценарийді белең алғаннан кейін тоқтатуға ұмтылғаннан гөрі, басынан тұншықтырып тастаған оңай. Егер Сіз халқыңызды бағаласаңыз, оларға мұндай болашақ тілемейтіндігіңізге сенімдімін» дейді өз қобалжысын Украинадан білдірген автор – София Левченко. ІІМ бұл хатқа да алдыңғысындай жауап қатқан.

«Алаш айнасы»

1 Пікір

  1. Осы хаттарды пайдаланып (мүмкін әдейі ойдан шығарылған хаттар, кім біледі), шаштың орнына өзі де бас алатын (Жаңаөзен, Шетпе) ведомство, енді әсіресе митингілерде наразылық көрсеткен, гептилға, т.с. жағдайларға қарсы жастарды репрессияға ұшыратуға одан әрі құлшыныспен кірісетініне күмәнім жоқ

Пікір жазу

Пікіріңізді енгізіңіз!
мұнда сіздің атыңызды енгізіңіз