Ержан Өтембаев 13 жылға сотталды

ҚР Парламент Сенаты аппаратының бұрынғы жетекшісі Ержан Өтембаев адам жалдап және алдын ала сөз байласып кісі өлтіруге жәрдем бергені үшін айыпты деп танылды деп хабарлайды Tengrinews.kz тілшісі сот залынан. "Сот Өтембаевты кінәлі деп тауып, мүлкін тәркілеумен бірге қатаң режимдегі түзеу колониясында 13 жыл жаза өтеуге соттау туралы үкім шығарды. Жаза өтеу мерзімі 2006 жылдың 22 ақпанынан бастап есептеледі. "Тұтқындау" бұлтартпау шарасы өзгеріссіз қалсын. Сот шешіміне жоғарғы инстанцияларда шағым келтірілуі мүмкін", - деді судья. Сот Өтембаев кісі өлтіруге адам жалдауға және алдын ала сөз байласуға жәрдемдесті деген жорамал расталды. Айыпталушы өз кінәсін мойындамаса да, оның кінәсі айғақтармен, басқа да зерттеулермен дәлелденді. 2006 жылы өзінің күдікті ретіндегі жауабында Өтембаев Ибрагимовпен танысуының мән-жайын толық түсіндірді. Сол жылғы жауаптарында Сәрсенбаевты өлтіру ниеті болғанын да өз сөзімен растады. Ол Ибрагимовтен Сәрсенбаевты ұрып-соғуды ұйымдастыруды сұраған", - дейді судья. Сонымен бірге, сот Рахат Әлиев пен Әлнұр Мұсаевтың осы қылмысқа қатысын анықтау үшін жеке қаулы шығарды. Ержан Өтембаев 2006 жылы 20 жылға сотталған болатын. Ол Сәрсенбаевты және оның екі көмекшісін өлтіруге тапсырыс берді деп айыпталды. 2013 жылдың желтоқсан айында қылмысқа қатысты жаңа деректердің пайда болуына байланысты оның ісі қайта қаралды. Ибрагимов саясаткерді өлтіруге Өтембаев емес, Әлиев пен Мұсаев тапсырыс бергенін, соның ішінде, операцияны Мұсаев жеке бақылауына алғанын сотта растады. Оның айтуынша, Өтембаев сол кездегі жағдайдың құрбаны ғана болды. Дегенмен іс материалдарына қарағанда, Өтембаев бұған дейін Ибрагимовке оппозиционерді ұрып-соғу туралы жоспарын айтқан болып шықты, мұны білген Әлиев пен Мұсаев жоспарды өзгерткен. Сәрсенбаев пен оның екі көмекшісінің өлімінен соң кінә Өтембаевқа ауды.

tengrinews.kz