Алтынбек Сәрсенбайұлына жасалған қастандық іске қатысты сот болмақ
2014 ж. 15 қаңтар
1735
2
Қаңтардың 10-ы күнi Талдықорғандағы Алматы облысының қылмыстық iстер жөнiндегi мамандандырылған ауданаралық сотында өткен алдын ала сот тыңдауы тағы да заңсыздықтармен басталды. Дәл 2006 жылғы сорақы сот кезiндегiдей. Сот тыңдауы жабық өтетiнi хабарланған жоқ. “Сотқа Өтембаевты әкеледi” дегендi естiгенiмiзбен, оны көре алмадық. Журналистердi арнайы құрылғымен бастан-аяқ тексерген соң қой қайырғандай жан-жағымыздан қақпалап, бiр бөлмеге апарып қамап қойды. Таңғы оннан өте басталған сот бесiнде аяқталды.
Жәбiрленушi тарап пен адвокат Ескендiр Әлiмбаев iстi жүргiзген Алматы облысының қылмыстық iстер жөнiндегi мамандандырылған ауданаралық сотының төрағасы Берiкжан Байжүнiсовке үш талап қойды. Бiрiншiсi – алдын ала сот тыңдауын кейiнге қалдырып, iспен мұқият танысу жөнiнде.
Жәбiрленушiлерге сот тыңдауы 10 қаңтарда өтетiнi жөнiнде тек 6 қаңтарда хабарланған. Яғни, iспен танысуға еш мүмкiндiк болмаған. Егер жәбiрленушi тарап пен заңды өкiлдерi iспен таныспаса, онда iстi қалай жүргiзедi?
Судьяға бәрiбiр екен. Жәбiрленушiлердiң “iспен танысайық, алдын ала тыңдауды кейiнге қалдырыңыз” дегенiн қабылдамай, iстi одан әрi жүргiзе бердi.
Екiнiшi талап-тiлек – судья Байжүнiсовтiң жеке басына қатысты. Судья Б.Байжүнiсовтiң кiм екенi сот басталмай тұрып-ақ белгiлi болған. Жәбiрленушi Рысбек Сәрсенбайдың айтуынша, судьяның онымен туыстық жақындығы бар. “Судья Байжүнiсовтi бұрыннан бiлемiн. Отбасылық iс-шараларда анда-санда кездесiп, әңгiмелесiп жүрдiк”, – дейдi Р.Сәрсенбай.
Қылмыстық iс жүргiзу кодексiнiң 90-бабында судьяға қарсылық бiлдiретiн жайттар анық жазылған. Егер судья жәбiрленушiнiң туысы болса, сондай-ақ судья iске тiкелей немесе жанама түрде мүдделiлiк танытса, ол iстi қарауға қатыса алмайды. Судьяға қарсылық бiлдiру жөнiндегi талапта осыны адвокат Е.Әлiмбаев қолмен қойғандай етiп көрсетiп берген. Бiрақ Байжүнiсов бұған да қарамады. Кеңесуге шығып кетiп, аздан соң жанына облыстық соттың тағы бiр судьясын ертiп келiп, өз мәселесiн өзi шеше салды. Судьяның түсiнiгiнше, туыс деген – бiр атадан тарау, әке-шеше мен бала-шаға ғана. Дәп бiр бұдан өзге туыстары жоқтай-ақ.
Судья жәбiрленушi Р.Сәрсенбайға “туыстығыңызды дәлелдейтiн құжаттарыңыз қайсы” дедi бiртүрлi қолайсызданып. Бұған Р.Сәрсенбай былай деп ұтымды жауап бердi: “Мұны дәлелдеп жатудың қажетi жоқ. Дәлел – сiз бен мен!”.
Байжүнiсов жақында ғана қылмыстық iстер жөнiндегi мамандандырылған ауданаралық сотқа төраға болып келiптi. Бұған дейiн ол бар-жоғы үш жыл ғана судья болып қызмет iстеген. Онда да азаматтық iстер жөнiнен. Сот төрағалығының өтеуiне осы атышулы iстi мойнына iле салғандай көрiндi...
Үшiншi талап – қылмыстық iстi басқа сотқа беру жөнiнде. Қылмыстық iс жүргiзу кодексiнiң 297-бабында мұның мән-жайы көрсетiлген. Егер белгiлi бiр соттың барлық судьяларына бөгет болып отырған жағдайда iс сол деңгейдегi басқа соттың қарауына берiлуi мүмкiн.
Жәбiрленушiнiң бәрi де Алматы қаласында тұрады. 2006 жылы саяси себептермен сотты қарауды Талдықорғанда өткiзу шешiлген. Қыстың көзi қырауда Алматы мен Талдықорғанның арасына қатынау қиын. Оның үстiне жол жөнделiп жатыр. Бұл процеске қатысушылардың өмiрiне қауiптi болуы мүмкiн. Қылмыс Алматы қаласында жасалған, оны тергеп-тексеру осы қалада аяқталды. Осыны ескертiп, жәбiрленушi тарап iстi қарауды Алматы қаласының қылмыстық iстер жөнiндегi мамандандырылған ауданаралық сотына тапсыруды сұраған. Бұл талап та ескерусiз қалды.
Бiр айта кетерлiгi, Ержан Өтембаев сот процесiнде дел-сал күйде отырды. Ашылып сөйлеген жоқ. Тек адвокаты Анжелика Әжiғалиеваға иек қаққаннан басқа. А.Әжiғалиева сотты Қаскелеңде өткiзудi сұрады. Мұнда бiр гәп бар. Өйткенi судья Байжүнiсов Әжiғалиеваны қолдады. Қолдайын деп қолдады дейсiз бе, алдын ала шешелiп қойған мәселе ғой...
Сонымен, А.Сәрсенбайұлына, Б.Байбосынға, В.Журавлевке жасалған қастандыққа қатысты iс 22 қаңтардан бастап Қаскелеңнiң қылмыстық iстер жөнiндегi аудандық сотында өтедi. Ал ендi Қаскелеңдегi сотта iске кiм төрағалық етпек? Байжүнiсов пе, әлде басқа ма? Мұны жуық арада бiлетiн боламыз.
Бiр қызығы, Алтынбек Сәрсенбайұлы мен оның серiктерiне жасалған қастандыққа қатысты iстi жүргiзудi жәбiрленушi тарапқа тiкелей немесе жанама қатысы бар адамдарға тапсыруы тегiн емес. Осыны ұйымдастырушылар сотты отқа айналдырып жiбердi.
Рысбек СӘРСЕНБАЙ, А.Сәрсенбайұлының бауыры:
– Iс басынан бастап заң шеңберiнде әдiл жүргiзiлгенде ғана нәтижесi болады. Бұлар ә дегеннен-ақ заң бұзушылыққа жол бердi. Маған туыстық жақындығы бар адамды судья етiп тағайындады. Бұл – Рахат Әлиев үшiн көзiр. Ертең ол осыны қорған етедi. “Жәбiрленушiлердiң туысы шығарған сот үкiмi заңсыз” деп.
Өтембаевтың жазасын жеңiлдетудi ойластырған бас прокуратура ұйымдастырушы деп Әлнұр Мұсаевты, тапсырыс берушi деп Рахат Әлиевтi атады. Ал ендi осыған бұлтартпас айғақтар жеткiлiктi ме? Жоғарғы соттың Өтембаевқа қатысты шығарған қаулысын процеске дейiн таныстырмай, әбден соңынан беруiнiң себебiн кейiн түсiндiк. Қаулы үйлесiмсiз жазылған. Тiптi кей тұстарында қарама-қайшылықтар бар. Мағынасы бұлыңғыр сөйлемдер кездеседi. Жоғарғы соттағылар құжатты осылай әзiрлесе, онда өзгелерiнiң кәсiптiк бiлiктiлiгi қай деңгейде екенiн шамалауға болады.
Төлеген ЖҮКЕЕВ, қоғам қайраткерi:
– Iс шала-шарпы басталды. Егер дәл осы күйiнде жалғаса беретiн болса, билiк еуропалық соттың алдында тағы масқара болады.
Сот барысындағы бiр ғана жағымды жаңалық – соттың Қаскелеңде өтетiн болып шешiлгенi. Бұл куәлерге де, Өтембаевтың өзiне де тиiмдi. 22 қаңтарға дейiн iспен толық танысып үлгеремiз деп ойлаймын.
Е.Биеке. "Жас Алаш"