Алтынбек Сәрсенбайұлын өлтіруге тапсырыс берген адам Рахат Әлиев болып шықты

6
1538

2006 жылғы 11 ақпанда Алматы қаласында Алтынбек Сәрсенбайұлының, Василий Журавлевтің және Бауыржан Байбосынның ұрланып, өлтірілуі орын алған болатын.

Ішкі істер органдарымен тергелу барысында осы қылмысқа қатысты тұлғалар анықталған. Ол Рустам Ибрагимов және тағы басқа 9 тұлға.

Өз кезегінде Ибрагимов Алтынбек Сәрсенбайұлын өлтіруге тапсырыс беруші ретінде сол сәтте Қазақстан Республикасы Парламенті Сенатының аппарат жетекшісі лауазымын атқарып отырған Ержан Өтембаевтың атын айтты.

Тергеумен анықталған барлық тұлғалар 2006 жылғы 31 тамызда Алматы облыстық сотымен ұзақ мерзімге бас бостандықтарынан айыруға, ал Ибрагимов тікелей ұйымдастырушы және орындаушы ретінде кейіннен өмір бойына бас бостандығын шектеуге ауыстырылған жазалаудың жоғарғы шарасына тартылды.

Дей тұрғанымен, 2012 жылғы 16 сәуірде түзеу мекемесінде жазасын өтеудегі Ибрагимов жасалған қылмыстың бұдан бұрын құқық қорғау және сот органдарына белгілі болмаған мән-жайлар хабарланған арызбен Қазақстан Республикасының Жоғарғы Сотына жүгінді.

Бұл арызда ол бірінші рет адам өлтіруді жасағанын мойындады, оны жасау мән-жайларын егжей-тегжейлі бейнелеп берді, сондай-ақ Алтынбек Сәрсенбайұлын өлтіруге тапсырыс беруші шын мәнінде Ержан Өтембаев емес, Рахат Әлиев пен Әлнұр Мұсаев екендерін көрсетті.

Қазақстан Республикасы Жоғарғы Сотынының тапсырмасы бойынша қосымша алынған жауаптардың шынайлығы Бас прокуратура, Ұлттық қауіпсіздік комитеті және Ішкі істер министрлігі қызметкерлерінен арнайы құрылған жедел-тергеу тобымен тексерілді.

Бұл ретте, Қазақстан Республикасы Бас прокуратурасының өтініші бойынша тергеуге Америка Құрама Штаттарының Федералдық Тергеу Бюросы тікелей қатысты.

Тергеу нәтижелерімен жаңадан ашылған мән-жайлар өз дәлелін тапты.

Атап айтқанда, 2006 жылы Рустам Ибрагимов полиграфологиялық зерттеу және АҚШ-тың Федералдық Тергеу Бюросының агенттеріне берген сұхбатынан кейін оларға адам өлтірудің шын мәніндегі тапсырыс берушісі Рахат Әлиев екендігін айтқаны анықталды.

Бұл ретте, Ибрагимов Әлиев пен Мұсаевтың тарапынан өзінің отбасының қауіпсіздігі қатерінен құқық қорғау органдарына ресми жауап беруден бас тартқан және бұл ақпаратты жарияламауды сұраған.

Қазіргі уақытта Рустам Ибрагимовтың арызын тергеу шеңберінде АҚШ-тың Федералдық Тергеу Бюросы бұл ақпаратты өзара әрекеттесу барысында тиісті құжаттарды ұсына отырып, растады.

Жаңа тергеу барысында Ибрагимов жеке бас араздығына орай, расында да Ержан Өтембаев одан Алтынбек Сәрсенбайұлын ұрып-соғуды сұрағанын көрсетті. Бұл жөнінде Рахат Әлиевке мәлім болған. Ол Әлнұр Мұсаевпен бірлесіп, жағдайды пайдаланып қалуды шешкен және Ержан Өтембаевтің тапсырысын орындау сымақ болып, Ибрагимовқа Алтынбек Сәрсенбайұлын өлтіруді тапсырған.

Ибрагимовтың уәждері тергеу барысында жинақталған объективті дәлелдемелермен толықтай расталды. Әлиев пен Мұсаевтың Алтынбек Сәрсенбайұлын және оның екі жолсерігін өлтіруге тапсырыс беруге және ұйымдастыруға қатыстылығы жөніндегі версияны растайтын жаңа заттай дәлелдемелер мен куәлердің жауаптары алынды.

2013 жылғы тамызда Рустам Ибрагимовтың және бірқатар түйінді куәлердің тиісті жауаптары шақырылған АҚШ-тың Федералдық Тергеу Бюросының полиграфолог-мамандарымен шынайлық мәніне тексеріліп, расталды.

Жоғарыда келтірілгенге байланысты, 2013 жылғы 11 желтоқсанда Бас прокуратурамен Қазақстан Республикасының Жоғарғы Сотына Алтынбек Сәрсенбайұлын, Василий Журавлевты және Бауыржан Байбосынды өлтіру жөніндегі іс бойынша шығарылған үкімді ішінара қайта қарау қажеттігі туралы қорытынды жолданды.

2013 жылғы 19 желтоқсанда Қазақстан Республикасының Жоғарғы Сотымен Рустам Ибрагимовтың арызын қарау нәтижесі бойынша және жинақталған жаңа материалдар ескеріліп, Ержан Өтембаевқа қатысты бұдан бұрын қаулы етілген үкім ішінара бұзылды.

Қылмыстың өзге қатысушыларына қатысты үкімді қайта қарау үшін негіздер анықталмады, себебі, табылған жаңа дәлелдемелер олардың әрекеттерінің саралануына әсер етпейді.

Дәл осы күні, 19 желтоқсанда Жоғарғы Сот қылмыстық істі Алматы облысының қылмыстық істер жөніндегі мамандандырылған ауданаралық сотына жаңадан сотта қарауға жіберді.

Тиісті сот шешімі қабылданған жағдайда Рахат Әлиевке және Әлнұр Мұсаевқа қатысты тікелей қылмыстық іс қозғалып, АҚШ-тың Федералдық Тергеу Бюросы қызметкерлерінің қатысуымен олардың Алтынбек Сәрсенбайұлының, Василий Журавлевтің және Бауыржан Байбосынның өлтірілуіне қатыстылығы мәніне алдын ала тергеу жүргізілетін болады.

Көрсетілген құқықтық процесстердің нәтижелері туралы қосымша хабарланатын болады.

prokuror.gov.kz

6 ПІКІРЛЕР

  1. қуырдақтың көкесін түие сойғанда көрерсің дегендей, ертең ақ рахат қораз дүниені тағы бір шулатып кукарекуге басатыны айдай анық. Алтекең атылғанда анық болған ақпаратты американдықтарсыз ақ біліп түсінгенбіз. Алтнкеңнің «Рахат келсе соғыс басталды»- дегенін ел ұмытқан жоқ.Аруақ ешкімді жібермейді ғой, алдынан келтіріп, аяғын аспаннан шығарып, тырақай асырады әлі

  2. Рахат: Алтынбекті кім өлтірткенін білемін, қолымда дәлелдер құжат бар, деген еді, енді сол құжатты көрсете қарсы шабуылға шығар. Иә, егер өзі сол жауыздыққа араласпаған болса. Алтынбекпен соттасқан қатынын қорғап араласқан болса, онысын да айтар. Тосайық.

  3. Рас бұл оқиғаның басында-ақ бәле Рахаттан келгені белгілі болған. Енді қолға түссе оңбайтыны белгілі. Тек шет елдердің оны несіне тықпалайтынын түсінбеймін.

  4. Өтембаевты ақтамау керек,Оған сол керек,Себебі,міне осындайлар ,су жүрек қояндар әлі де арамызда шын қылмескерлердің қолшоқпары болып жүр. Олар ашық жаулардан да жаман,әрі қауіпті,Себебі,ондайлар потенциал «киллерлерге» есек дәмелік еткізеді. Ал Рахаттың Алтынбекті өлтіргенін есі дүрыс адамдар баяғыда білген!

  5. Спекталь жалғасатын болды… Өтембаев сол күндері президент Назарбаевқа хат жазып, Алтынбекті өлтіруге тапсырыс бергенін мойындаған жоқ па еді, енді не демекші онысын?

Пікір жазу

Пікіріңізді енгізіңіз!
мұнда сіздің атыңызды енгізіңіз