Рысқалиевтер үшін әкесінің жаназасына қатысу бұйырмаған бақыт болды

3
1056

Халықаралық іздестіруде жүрген ағайынды Рысқалиевтардың әкесі Ақтөбе қаласында көз жұмды. 78 жасқа қараған шағында көз жұмған Сәулебай ақсақалдың жаназасына ұлдары мен үш күйеу баласы және кісі өлтіруге тапсырыс берді деп айыпталған қызы да қатыса алған жоқ. Әкесінің артынан бір уыс топырақ салмаған қашқындар қазір Еуропа елдерін паналап жүрген көрінеді.

Ал туыстарының айтуынша, балалары істі болғаннан кейін марқұмның жүрегі сыр берген. Қазынаның қыруар қаржысын қалтасына басып қашқан ағайынды Рысқалиевтердің әкесі 10 жылдан астам мына үйде тұрып келген.Жаназаға жиналғандардың көп болғаны сонша, жол бойына қойылған көліктерден көшедегі қозғалыс бірер сағатқа тоқтап қалды.

Ал көңіл айтып келгендерді туыстары қақпа алдынан күтіп алып, жаназасы үй ауласында сырт көзден таса жерде шығарылды. Балалары елден кеткелі бері Сәулебай Рысқалиевтің жүрегі сыр берген. Өмірінің соңғы күндерін ол хабар күтіп, теледидарға телміреумен өткізіпті.

«Балдарын аңсайды ғой. Аңсамайтын адам бар ма? Бала-бауыр еті ғой. Баласын ата-анасы ақ сүтін берген, қалай жоқтамасын?», – дейді марқұмның досы Алпысбай Жұмырғазин.

«Денсаулығы, жүрегі ауырып жүреді ғой. Курортқа барды, емделіп жүрді. Бәрібір дәмі біткен соң кетті ғой. Не шара… «, – дейді басқа құрдасы Құндызбай Берлепесов.

Ал, ақсақал өмірінің соңғы күндері үнемі жаңалықтарды қалт жібермей қарап жүріпті.

Туыстарының айтуынша, балаларының ақталатынына сенген. Және үнемі: «әлі заман түзеледі, бәрі орнына келеді» деп жиі айтыпты.

Атыраудың бұрыңғы әкімі Бергей Рысқалиев пен Мәжіліс депутаты болған бауыры Аманжан әкелерін соңғы сапарға шығарып сала алмады. Оларға 35 адамнан тұратын қылмыстық топ құрып, 71 миллиард теңгені жымқырды деп айып тағылған болатын.

Сыбайластарының қатарында үш күйеу баласы тағы бар. Олар да шетел асқан. Ал үлкен әпкесі кісі өлтіруге тапсырыс берді деп айыпталып, қазір Халықаралық іздеуде жүр. Қазір Швейцария прокуратурасы да ағайынды Рысқалиевтерге қатысты қылмыстық іс қозғапты.

Осы елдегі банктердің бірнен өздері мен туыстарының атына үш есеп шот ашып, ақша ұрлаған. Бұдан өзге қазір шоттарында 100 миллион еуродан асатын қаржылары сақтаулы тұрғаны тағы белгілі болды.

Алайда елдің ақшасын жеп, ен байлыққа кенелсе де әкелерін ақтық сапарға аттандыру, оларға бұйырмаған бақыт болды.

«КТК» телеарнасы

3 ПІКІРЛЕР

  1. қазақ неге өлгенге иман айтудың орнына мысқылдап, табалағандай болып тұрамыз.ктк каналы осы сандырақтарын қашан қояды.артур деген мықты жорналшы, бірақ соңғы уақытта ол да биліктің сойылын соғып келе жатқанын байқамайтын сынды.әр сөзіндегі астарлы мысқылдан ұлтты мазақтау көрінеді

  2. Кезінде Қажыгелдин де келе алмаған. Енді Бергейдің де басына түсті. Туған әкесіне бір уыс топырақ сала алмаған нағыс қасірет емес пе? Обал! Әкеден ақша қымбат болды деген осы.

  3. «Адам бір боқ, арқалаған боқтың қабы» деген Абай сөзі еске түседі осындайды. Соншама дүние қуып не керек әкелеріне бір уыс топырақ салып, ақтық сапарға шығарып сала алмасы. Қу, дүние-ай, қу тойымсыз ашкөздік-ай десеңізші!

Пікір жазу

Пікіріңізді енгізіңіз!
мұнда сіздің атыңызды енгізіңіз