ЕЛГЕ ДЕ, ЕЛБАСЫҒА ДА КІР КЕЛТІРЕТІН МАСҚАРА МЕРЗІММЕН КЕЛІСПЕЙМІЗ!..

2
1437

Сонда біз отыз жылдан соң ғана «сөйлейтін» Қожанасырдың «кейіпкеріне»

айналуымыз керек пе?

             «Самарқанда бір әпкем бар, бұдан да өткен сорақы» дегендей, сенатор Симамбаевтың сауалына Үкімет басшысы Кәрім Мәсімов елп ете қалып, ертеңіне-ақ эфир арқылы жауап берді. Мәсімов мұртынын күліп тұрып, «мемлекеттік тілге енді 10 жылдан кейін, 2020 жылы ғана көшеміз» деп былш еткізді. Біреу бетімізге түкіріп жібергендей, жалма-жан қол орамалымызды іздедік…

          Тоқ күлкісі сыртқа теуіп, жылтырап тұрған Кәрекеңнің жүзінен аса бір ризашылық кейіп танылып тұрды… Иә, мәселенің мәнісін ұқпайтын Мәсімов Симамбаевтың сауалына бір тәулікке жеткізбей жауап қайтарды. -Енді он жылдан кейін әрбір азамат қазақ тілінде еркін сөйлеуі керек,-деді. Сонда он жылға дейін әрбір азамат қазақ тілінде еркін сөйлеуге болмайды екен ғой… «2020 жылды айтқанша, 2030 жылды бір-ақ айту керек еді…» деп күйініп жатқандар көп.

         Баяғыда Қожанасыр «отыз жылдан кейін есекті сөйлетемін» деп ханға уәде беріпті. «Отыз жылда сөйлемесе қайтесің», – дегендерге, Қожекең: «отыз жылда не хан өледі, не есек өледі, немесе мен өлемін»- депті саспастан…

          Мәсімовке қарап тұрып менің есіме осы хикая түсті. Егер Қожекең ғайыптан тайып бүгінгі Қазақстандағы қазақ тілін күтумен өткен ғұмырды көрсе «отыз жылда есек те сөйлер еді », – деп жауабын өзгертер еді. Біздің мемлекеттің мемлекеттік тілде сөйлеуін күткенімізге 21 жыл болды. Енді тағы 10 жыл күтсек, 31 жыл болады.

         Сонда Мәсімов нені меңзеп, бізді неге («кімге» емес) теңеп отыр… Мен Мәсімовпен келіспеймін. Ол елдің де Елбасының да атына кір келтіруде. Бұны кім болса да, қай мемлекет болса да, елдің интеллектуалдық ресурсын жоққа шығару, қорлау деп түсінеді.

          Мысалы, ғылым докторы, экс-министр Ертісбаевқа, немесе әлгі Симамбаевқа, тіпті қытай тілін білетін Мұрат Әуезов пен әлемдік масштабтағы атақты ғұлама ақынымыз, мың бір тілді зерттеп жүрген Олжас Сүлейменовке қазақша жаза білу үшін міндетті түрде тағы 10 жыл керек пе? Олар жап-жақсы сөйлеп қалды, енді 1 жыл қоссақ жетіп жатыр. (Ал тағы бір сенатор Ғани Қасымов пен бүкіл Парламент алдында «менің басымаоперация жасап, миымды ауыстырмаса, қазақ тілін үйрене алмаймын»-деп, елшілік туралы заңнан «мемлекеттік тілді білу міндетті», – деген бапты алғызып тастаған экс-министр, ағылшын тілін білетін елші Ерлан Ыдырысов туралы не ойласаңыздар да өз еріктеріңіз.) Сонда біз 30 жылдан соң ғана сөйлейтін Қожанасырдың «кейіпкерлеріне» айналуымыз керек пе? Жоқ, мен сізбен келіспеймін, Мәсімов мырза!

           Бұл мәселені бірінші жағы, енді екінші жағына келейік. Мәсімов айтқан 2020 жыл дегенде, біздің мәңгілік сайлауға түсуге хақы бар Президентіміз 2012 жылы сайлауға тағы да түсіп, 2020 жылға дейін басқара беретіні мәлім. Биылғы Жолдауында да 2020 жылдың бағдарламасын жариялады.

          Сонда, мемлекеттік тілдің 2020 жылы ғана іске кірісуі, яғни мемлекеттік тілдің жаппай қолданылуы Президентінің саяси аренадан  кетуіне ғана тіреліп тұр екен ғой… Егер Елбасымыз 2030 жылға дейін отырса ше? Онда енді тағы да 20 жыл күтеміз бе? Сонда Мәсімовтың ойынша, тілімізді 20 жылдан бері 20 шенеуніктің үйренбеуі Нұрсұлтан Назарбаевқа ғана байланысты ма? Елдің тілінің дамуына Елбасы кедергі ме? Жоқ, Мәсімов мырза, біз бұлай ойлай қойған жоқпыз әлі. Ақыр солай болып, олай ойласақ, онда не тілді, не Елбасыны таңдау керек шығар…

            Мемлекеттік тілді білу үшін міндетті түрде 30-40 жыл күтіп (Н.Назарбаев мерзімі бітетін уақыт) Қожекеңнің «кейіпкеріне» айналу ЕҚЫҰ-ға төраға болып отырған елге масқара емес пе ? Біздің азаматтардың санасы өзге елдердің санасынан кем бе?

           Елдің де, Елбасымыз да атына кір келтіретін мұндай масқара ұзақ мерзіммен келіспейміз, Мәсімов мырза!

           Ал, сіз қалай ойлайсыз, құрметті оқырман?!

 

Қазыбек ИСА

2 ПІКІРЛЕР

  1. Қара мұртты ней дейді тағы?!
    «Ана тілін ұмытқан адам өз халқының өткенінен де, болашағынан да қол үзеді»… Қаншама Алаш арыстары қазақтың қазақ тілінде сайрағанын армандап, аңсап еді. Қолымызды осы күнге енді ғана әне,міне деп жеткіземіз деп жүргенде ұйғыр тағы былай быдықтап шықты. Бір жылда жүзеге асыруға болатын мәселені 10 жылға созғаны несі? Мақаланың авторы өте дұрыс жазған. Біз сонда Қожанасырдың кейіпкерлері болғанымыз ба?! Бұл НӘН-нің кінәсі.Егер ол қаласа, бұл түйіні түйіншектелген мәселе бааааяғыда шешілер еді.Егер өзі барлық жиынды тек Ана тілінде өткізсе және барлық қол астындағылардан соны талап етсе…Ниет жоқ! Енді 20 жыл күтетін болсақ, онда тілімізді осірмейміз, керісінше өшіреміз…ендеше, болашағымыздан да қол үземіз деген сөз.
    Бірақ, бұған жол бермеуіміз керек!Бұл мәселені ушықтырмай шешу керек. Кедейдің күйін кешіп жүрген Ана тілімізге қамқорлық керек!

Пікір жазу

Пікіріңізді енгізіңіз!
мұнда сіздің атыңызды енгізіңіз