Еңбек нарығында қандай өзгерістер орын алуда?

Әр екінші басшы кеңседе «жайлы атмосфера, икемді график, тату ұжым» деп уәде береді. Осының қаншасы – шындық, қаншасы – сырты жылтыр қаптама ғана? Біз жұмысқа алар алдын айтылған сөздерге сеніп үйренгенбіз, бірақ бір нақтысы – әдемі уәделер дәуірі аяқталды.

Жуырда Астана қаласында Human Capital Forum 2026 өтті. Форум бірінші сағаттан-ақ бір нәрсені көрсетті: бизнес енді болжаммен емес, деректермен жұмыс істейді. Ұйымдастырушылары «Paryz» ұлттық жұмыс берушілер конфедерациясы мен Қазақстанның HR-менеджерлер қауымдастығы болып 150-ден астам топ-менеджерді, HR-директорды және сарапшыны бір алаңға жинап, бір ғана нақты сұрақ қойды: отандық компаниялардың ішінде шын мәнінде не болып жатыр?

Форумның ұраны қатаң әрі нақты болды: «Фактілер күші. Деректерден іс-әрекетке дейін». Қатысушылар абстрактілі трендтерді талқылаудың орнына нақты реалдылықты дәл деректермен талдады. Форум аясында:

- Нақты стресс пен эмоционалды сарқылу картасы – экономиканың 8 негізгі саласы бойынша қызметкерлердің тартылу деңгейі мен командалардағы ішкі шиеленіс алғаш рет ашық бенчмарк түрінде көрсетілді.

- Деректерге негізделген басқару – сарапшылар нақты мысалдармен дәлелдеді: шешім интуицияға емес, цифрларға негізделмесе, компания ұтылысқа ұшырайды.

- Халықаралық тәжірибе – EY (Ernst & Young) сарапшылары әлемдік жалақы және еңбек жағдайлары трендтерін қазақстандық шындықпен салыстырды.

- Тірі коммуникация форматы – жас көшбасшылардың (Forbes 30 Under 30) тізіміндегі кейстері мен HR Recognition марапаттау рәсімі форумды астананың іскерлік өмірінің басты орталығына айналдырды.

Жиынның басты жаңалығы – Paryz Bridge зерттеуінің нәтижесі болды. Бұл – жыл сайын Конфедерация бастамасымен өткізілетін ең ауқымды әрі толықтай тәуелсіз зерттеу, ол 100-ден астам ірі компанияны және 150 мыңнан астам қызметкерді қамтыды.

Бұл зерттеудің басқалардан айырмашылығы неде? Жеңімпаздар «әдемі логотипке» қарап емес, төрт тәуелсіз дереккөзді біріктірген бірегей әдістеме бойынша анықталды: қызметкерлердің ішкі көңіл-күйі, HR-үдерістерінің жетілу деңгейі және компанияның ашық нарықтағы беделі.

«Бүгінде мамандарды еңбек нормалары бойынша үздіксіз оқыту – жай ғана сөз емес, бизнестің өмір сүру салтына айналды. Жұмыс берушілер жасанды интеллектіні өте жылдам енгізіп жатыр. Біздің келесі қадамымыз – үздік практикалардың бірыңғай базасын құру, сарапшылар қауымдастығын қалыптастыру және халықаралық тәжірибе алмасуды қамтамасыз ету. Оның үстіне, Халықаралық еңбек ұйымының мүшесі ретінде Қазақстанда халықаралық еңбек стандарттарын енгізу – басты басымдығымыз, осылайша компанияларға ең озық шешімдерді қолдануға көмектесеміз» – деп атап өтті «Paryz» ұлттық жұмыс берушілер конфедерациясы Президиумы Төрағасының орынбасары Тимур Нахипбеков форум алаңында БАҚ өкілдеріне берген түсініктемесінде.

Назарбаев Университетінен шыға жатып, дүниенің қаншалықты жылдам өзгеріп жатқаны туралы ойладым. Жасанды интеллект, алгоритмдер, Big Data... Технологиялар жұмысымыздың бір бөлігін алмастыруы мүмкін, бірақ адамға құндылықпен қарау қабілетін ешқашан алмастыра алмайды.

Human Capital Forum 2026 бір нәрсені дәлелдеді: болашақ ең қатты уәде бергендерге емес, деректерді тыңдай білетін және адамды құрметтейтіндерге тиесілі.