ТҮРКІСТАН: МАҚТААРАЛ КЕҢШАРЫНА 100 ЖЫЛ

Биыл Мақтаарал кеңшарына 100 жыл толып отыр. Осы ретте Мақтаарал ауданында кеңшардың ғасырлық мерейтойы кең көлемде аталып өтті. Ең алдымен Атакент кентіндегі «Достық» мәдениет үйінде салтанатты жиын өтіп, аудан әкімі Бақыт Асанов мақтааралдықтарды мерейтоймен құттықтады. Сондай-ақ, кеңшарға еңбегі сіңген азаматтарды мерекелік төсбелгімен марапаттады. Кейін шараға қатысушылар «Қазақ мақта тарихы» музейі мен «Мақта және бақша ауыл шаруашылығы тәжірибелік станциясы» ЖШС-на саяхат жасап, қазақ мақтасының тарихымен танысты. 

Айта кетсек, 1924 жылы 1 қарашада Мырзашөл өңірінің темір қазығы болып ең бірінші Мақтаарал кеңшары құрылған. Ал, 1927 жылы кеңшар аумағында мақта тәжірибе станциясы құрылды. 1939 жылы ұжымға одақтық дәрежедегі үлгілі оқу-тәжірибелік кеңшар атағы берілді. Мақтаарал ауданының құрылуы Мақтаарал кеңшарының құрылуымен тікелей байланысты.