ТӨЛЕБИЛІК ОҚУШЫЛАР ЖАҢА ОҚУ ЖЫЛЫН ЖАҢА МЕКТЕПТЕ БАСТАДЫ

1 қыркүйек – Білім күніне орай Төлеби ауданында Тағайна жалпы білім беретін мектебінің жаңа ғимаратының салтанатты ашылу рәсімі өтті. 

Мерекелік жиынға ұстаздар мен оқушылар, ата-аналар ғана емес, мектептің ашылуына арнайы шақырылған азаматтар да қатысты. Олардың алдында Төлеби ауданының әкімі Төлеген Телғараев, облыстық мәслихаттың депутаты Дулат Әбіш, аудандық білім бөлімінің басшысы Бекайдар Тойлыбаев, ауыл ақсақалы Ирискул Омаралиев сөз сөйлеп, мектеп ұжымын, білім алушыларды, ата-аналарын жаңа ғимараттың пайдалануға берілуімен құттықтады. Жаңа мектептің лентасы қиылып, көпшілік ғимаратты аралап көрді. 

Жалпы, 200 орындық екі қабатты жаңа мектептің құрылысына 925 миллион теңге қаржы жұмсалды. Құрылыс жұмыстарымен «Дос и К Сервис» жауапкершілігі шектеулі серіктестігі айналысты.

Жаңа мектептегі оқу кабинеттерінің саны – 16. Онда акт зал, спортзал, асхана, кітапхана, медициналық кабинет, химия, биология, информатика, физика кабинеттері, лингафонды кабинет, ұлдарға, қыздарға арналған еңбек кабинеттері бар. Кабинеттер қажетті электрондық және техникалық құралдармен жабдықталған.

Жаңа оқу жылында жаңа мектепте 20 сыныпта 341 оқушы білім алады. Оларға 45 мұғалім сапалы білім, саналы тәрбие бермек. Мектепте 13 техникалық қызметкер жұмыс істейді.