Қоғам белсенділері қазақ тілінен онлайн курсты әзірледі

Курсқа этномәдени бірлестіктер мен шығармашылық одақтардың жас өкілдері қатыса алады. 

Республикада ҚР Ақпарат және қоғамдық даму министрлігінің қолдауымен «Жастар арасында мемлекеттік тілді насихаттауға бағытталған іс-шаралар кешенін өткізу» жобасы іске асырыла бастады. Ол жастардың шығармашылық әлеуетін тарту арқылы мемлекеттік тілді насихаттауға және дамытуға бағытталған. Жоба аясында бірқатар мәдени - ағартушылық іс-шара, дебаттық турнирлер өткізіледі деп жоспарлануда.

«Біздің мақсатты аудаториямыз – жас қазақстандықтар. Жобаны іске асыру барысында біз еліміздің барлық өңірлеріндегі этномәдени бірлестіктермен тығыз байланыста боламыз. Әр түрлі шығармашылық одақтардың жас белсенділері үшін арнайы дәрістер, практикалық тапсырмалар ұйымдастырамыз. Онлайн-курс барысында тыңдаушылар орфографиялық сауаттылық деңгейін арттыра алады. Өйткені мұнда тек емле ережелерін оқытылатын болады. Біздің курстарымыздан кем дегенде 500 адам өтеді деп ойлаймыз», - деді жоба үйлестірушісі Фаузия Саметова.

Оқу аяқталған соң тыңдаушылардың алған білімін бағалау үшін курс ұйымдастырушылары диктант өткізеді.

Айта кетейік, «Жастар арасында мемлекеттік тілді насихаттауға бағытталған іс-шаралар кешенін өткізу» жобасы 2022 жылдың соңына дейін жүзеге асырылады.