Полиция пунктерінің саны артады

Бес жылда облыста 23 жаңа учаскелік полиция пункті салынады. Бұл туралы облыстық полиция департаментінің басшысы Сағат Мәдиевтің Семей әкімі Бақытжан Байахметовпен өткен кездесуі барысында айтылды.

Полиция учаскелерін көбейтудегі мақсат – облыс тұрғындарына тәртіп сақшыларының қызметін қолжетімді ету. Сонымен қатар полицейлер жаңа техникамен және көліктермен қамтамасыз етіледі.

– Біз полиция қызметінің тұрғындар үшін қолжетімді болуын қамтамасыз еткіміз келеді. Осы мақсатта бес жыл ішінде 23 учаскелік полиция пунктін салуды жоспарлап отырмыз. Бүгінде жеті модульдік пост ашылды, оның бесеуі – Өскеменде, екеуі Семейде орналасқан. Сондай-ақ қызметтік көліктер мен компьютерлік техника сатып алу көзделуде. Қазір бірінші учаскелік полиция пункті өз жұмысын бастап кетті, – деді Сағат Мәдиев.

Оның айтуынша, учаскелік инспекторларға 20 қызметтік көлік беріліпті. Бұл іс-шаралар полиция жұмысының сервистік моделін енгізу жобасы аясында атқарылып жатыр. Айта кетейік, полиция жұмысының сервистік моделі адамдардың қорғалу дейгейі мен олардың билік органдарына деген сенімін арттыруға бағытталған.