Аида Балаева: БАҚ өкілдеріне қатысты бұндай келеңсіз жағдайларға жол берілмеуі қажет

ҚР Ақпарат және қоғамдық даму министрі Аида Балаева Алматыда күзетші журналисті әкімдіктен көтеріп шығарып тастаған оқиғаға қатысты пікір білдірді, деп хабарлайды ҚазАқпарат.

«Өздеріңізге мәлім, Алматы қаласы, Алатау ауданы әкімдігі қызметкерінің журналист Ақбөпе Тәңірбергенге күш қолданған теріс әрекеті интернет желісінде қызу талқыланып жатыр. Аудандық әкімдіктің жауапты тұлғаларының бұған қатысты еш шара қолданбауы мәселені тіпті де ушықтырып отыр. Бұл әрине өте өкінішті және біздің бүгінгі «еститін мемлекет», «ашық әкімдік» қағидаларына қайшы келетін жағдай», деп жазды Аида Балаева Facebook-тегі парақшасында. 

Министрдің мәлімдеуінше, журналистердің құқығын бұзуға, олардың ресми жұмысына кедергі келтіріп, күш көрсетуге ешқашан жол берілмеуі керек. 

«Олар өздерін қай жерде де еркін сезінуі тиіс. БАҚ өкілдері еліміздің тиісті заңнамалары мен нормативті-құқықтық актілеріне сәйкес қажетті толыққанды ақпарат алуға қай кезде де құқылы. Бұл жағдайға қатысты, Алматы қаласы әкімдігінің басшылығы қызметтік тексеру жүргізіп, тиісті шаралар қабылдауы қажет деп санаймын. Кінәлі тұлғалар жауапқа тартылуы тиіс. Алдағы уақытта қай жерде болмасын, БАҚ өкілдеріне қатысты бұндай келеңсіз жағдайларға жол берілмеуі қажет», - деді Аида Балаева. 

Еске сала кетсек, Алматы қаласы Алатау ауданы әкімдігі жағдайға қатысты түсініктеме берді.