Қарағандылық кәсіпкерлер «Ақ жол» депутатына тауарларды бірыңғай таңбалауға қарсы екендіктерін жеткізді

«Ақ жол» депутатына тауарларды бірыңғай таңбалауды енгізу шағын бизнеске кедергі келтіретіні және жабылуға әкелетіні туралы мәселемен қарағандылық кәсіпкерлер жүгінді. Өткен аптада Айгүл Жұмабаева облыс тұрғындарымен кездесу өткізді. Жұмыс сапары барысында А.Жұмабаева түрлі елді мекендерде болып, бірқатар кәсіпорындар мен ұйымдарды аралады.

Теміртау қаласының іскер әйелдер кеңесінің өкілдері атап өткендей, таңбалауды тәжірибеге енгізу тауарлар қозғалысының бақылауының еселеніп жатқанын көрсетті. Кәсіпкерлердің айтуынша, алкоголь мен сүт өнімдерін таңбалау бойынша пилоттық жоба басталды. Ол сауда процесін тежеуде, көптеген тауарлар оқылмайды, қайтарымдар да бар - мұның бәрі уақытты алады, қосымша қызметкерлердің жұмысын талап етеді…

«Шағын бизнестің жұмысына жасалатын мұндай кедергілер оның жабылуына, құрдымға кетуіне әкеледі. Процесс жүйелі емес, көптеген практикалық сәттер ескерілмеген», - деп есептейді кәсіпкер Марина Бошель.

«Ақ жол» депутаты фракция таңбалауды енгізуге екі рет қарсы шыққанын еске салды. Депутаттар тауарларды міндетті таңбалау жөніндегі келісімді ратификациялауды және бизнес ортаны дамыту және сауда қызметін реттеу мәселелері жөніндегі заң жобасын қолдамады. Содан кейін Азат Перуашев таңбалау бизнес пен халыққа қаржылық ауыртпалық әкелетінін және парламент министрліктің емес, мұқият ашық талқылаудан кейін тауарлардың әр тобы үшін шешім қабылдауы керек екенін айтты.

Сонымен қатар, кәсіпкерлер ҚҚС шегін төмендету мәселесін көтерді. Бір кездері енгізілген жеңілдетілген декларация шағын бизнеске қолдау болды. Енді оның мәні жоғалуда, ал ЖК іс жүзінде оларды банкроттыққа әкелетін жалпы белгіленген режимге көшуге мәжбүр.

Кәсіпкерлер микрокәсіпкерлік бойынша шекті 30-дан 100 мың АЕК-ке дейін көтеруді, айыппұл мөлшерін азайтуды қарастыруды, акциздердің өсуін тоқтатуды сұрайды.

Жеке мәселе ретінде кәсіпкерлер темекі сөрелерін жабуға тыйым салу мәселесін көтерді. Олардың пікірінше, бұл мәселені шешпейді, бірақ әкімшілік жаза қаупін тудырады. Кейде сатушы тауарды беру үшін темекі сөресін ашып, басқа жұмысқа алаңдап, жабуды ұмытып кетуі мүмкін. Дүкен иелері темекі сөрелерімен жұмыс істеу алгоритмін жасау немесе көзге көрінетін жерден алып тастау қажет деп санайды. 

Осыған байланысты, айтылған мәселелерді растау үшін Айгүл Жұмабаева партия филиалының басшысы Ермек Әбілдинмен, қалалық мәслихаттың депутаты Тимур Нұрғожинмен, кәсіпкерлермен және БАҚ өкілдерімен бөлшек сауда дүкендеріне барды.

Кәсіпкерлердің бастамашыл тобы атынан айтылған барлық проблемалар көрсетілген жазбаша өтініш «Ақ жол» фракциясының атына жіберілді.