Шымкент банкі клиенттерге 4 мың еуро жалған ақша берген

Шымкентте банк қызметкерлері клиенттерге жалған еуро беріп келген. Бұл қылмысты қалалық Экономикалық тергеп-тексеру департаментінің қызметкерлері әшкере қылған, деп хабарлайды ҚазАқпарат тілшісі. 

Шымкенттегі банктердің бірінің қызметкерлері еуроны 500 номиналды банкнотпен беріп келген. Департаменттің мәліметінше, банктің 5 қызметкері алдын ала сөз байласу арқылы клиенттерге жалпы сомасы 4 мың еуро жалған қағаз ақшаны өткізген. 

Тергеу барысында белгілі болғандай, 2020 жылы банк қызметкерлерінің бірі жалпы сомадан 25% көлеміндегі сыйақы үшін жалған 6 000 еуроны теңгеге айырбастаған. Әл-Фараби аудандық сотының үкімімен кінәлілер 5 жылға бас бостандығынан айырылды. 

Қазіргі таңда банк қызметкерлеріне жалған купюра берген адамға халықаралық іздеу жарияланды.