Бейнеуде соңғы қоңырау жаппай төбелеспен аяқталды

Маңғыстау облысында соңғы қоңыраудың соңы жаппай төбелеспен аяқталды. Бейнеу ауданындағы екі мектептің түлектері жанжалдасып жаға жыртысуға дейін барған. 

Бас-көзге қарамай бір-бірін төмпештеген Ыбырай Алтынсарин мен Жұмағали Қалдығараев атындағы мектептің 11-сынып оқушылары. Бейнеу ауданындағы екі мектептің 40-қа жуық түлегі бір жерде кездесіп, өзара келіспей қалып, көшенің қақ ортасында төбелескен, - деп хабарлайды КТК. 

Бұзақылық бабымен жеті оқушыға қатысты қылмыстық іс қозғалды. «Барлығы мектепаралық кикілжіңнең шыққан», - дейді полиция департаменті. 

Балалардың ешқайсысы да шағыммен ауруханаға бармаған.

- Оқиға орнынан 7 адам ұсталып, мән-жайды анықтауға полиция бөлімшесіне жеткізілді. Аталған факті 293 бабы, бұзақылық бойынша Бейнеу ауданының полиция бөлміне тіркелді. Полиция департаменті түлектердің ата-аналарына кәмелетке толмаған балалары үшін жауапкершілік түрін ескертеді. Мектеп оқушыларын қадағалауды шақырады, деді Маңғыстау облысы ПД баспасөз қызметінің жетекшісі Әйгерім Ибатуллаева.