Ералы Тоғжанов ақпарат саласындағы мамандарға алғыс айтты

2020 жылы коронавирустың таралуы кезеңінде Ақпарат министрлігінің жұмысы ерекше болды. Бұл туралы ҚР Премьер-Министрінің орынбасары Ералы Тоғжанов мәлім етті, деп хабарлайды ҚазАқпарат тілшісі.

«Әсіресе, «халық үніне құлақ асатын мемлекет» тұжырымдамасын жүзеге асыру ең алдымен министрліктің тікелей қызметіне байланысты. Дер кезінде халыққа жеткізе білу, халыққа түсіндіре білу маңызды. Осы орайда қиын жағдайда ештеңе жасырылған жоқ, барлығы елге жарияланды», - деді Е. Тоғжанов ҚР Ақпарат және қоғамдық даму министрлігінің кеңейтілген алқа мәжілісінде.

Бұл тұрғыда ол аталған министрлік тарапынан ауқымды жұмыстар атқарылғанын жеткізді.

«Ақпарат саласында жұмыс істейтін барлық азаматтарға алғыс айтуға рұқсат етіңіздер. Қиын жағдайда бірде-бір азамат кейін тартпады. Осы кезеңде ешқайсысы басын бұғып қалмады, тікелей атсалысты», - деді Үкімет басшысының орынбасары.

«Волонтерлік бағытта көптеген іс-шаралар атқарылды. Осы орайда Президенттің тікелей тапсырмасымен тиісті жұмыстар жүзеге асырылды. Бұл жұмысты ары қарай жалғастыруға қатысты тапсырмалар берілді, сондықтан осыны іске асыратын боламыз», - деді Ералы Тоғжанов.

Бұдан бұрын хабарланғандай, министрліктің алқа мәжілісінде алдағы уақытта қайырымдылық және волонтерлік жөніндегі заң жобаларын жетілдіру жоспарда бар екендігі айтылды.