COVID-19: 600 млн теңге жарнамалық роликтерге жұмсалған

Коронавируспен күреске бөлінген көлемді қаражат флеш-мобқа жұмсалған. Бұл туралы республикалық арнайы мониторинг тобының жетекшісі Айгүл Соловьева мәлім етті, деп хабарлайды Stan.kz ақпарат агенттігі.

"Кеше президент коронавирус инфекциясымен күресуге 191 миллиард теңге бөлінгені туралы айтты. Оған дейін шамамен 400 миллион доллар бөлінген болатын. Біздің сараптамалық топ бұл қаржы қандай шараға бөлінгенін анықтап жатыр. Мендегі ақпарат бойынша, 600 миллион теңге флеш-моб ұйымдастырған жарнамалық компанияға бөлінген. Дәл қазіргі жағдайға жеткізбес үшін бұл қаржыға қажетті дәрі-дәрмек, медициналық құралдарды алуға болар еді", - деді ол бүгінгі онлайн брифинг кезінде.

Дегенмен, оның сөзіне қарағанда, 600 миллион теңгенің 200 миллион теңгесі әлі жұмсалмаған. Бірақ, ол қаржы денсаулық министрлігі ұйымдастырған тендерге қатысып, ұтып алған компанияға аударылып қойыпты.

Сонымен қатар, Айгүл Соловьева азаматтардың дәрілердің қай түрі жоқ, қайсысының бағасы өскенін хабарлап жатқанын атап өтті.

"Президенттің үндеуінен оның болып жатқан құқық бұзушылық жағдайлар туралы хабардар болып отырғанын білдік. Мемлекет басшысы құқық қорғау органдарына дәрі-дәрмектің жасанды тапшылығын жасап отырғандармен жұмыс істеуге тапсырма берді. Республикалық арнайы мониторинг тобы президент бұл тапсырманы бергенге дейін екі күн бұрын жұмысты бастап кетті. Орын алып жатқан жағдайларға наразы болу – бір бөлек, ал мәселені шешуге үлес қосу – бір бөлек. Алматы, Нұр-Сұлтан қалаларында, Маңғыстау, Шығыс Қазақстан облыстарында мониторинг жүргізіп, дәрі-дәрмек бағасын 1,5-2 есе қымбаттатқан фактілерді анықтадық", - деді республикалық арнайы мониторинг тобының жетекшісі.