- Қалыптасқан дәстүр бойынша біз мереке қарсаңында өзіміздің ең үздік отандастарымызды жыл сайын марапаттаймыз. Тәуелсіздік жылдарындағы жетістіктердің бәріне барша қазақстандықтардың еңбегінің арқасында қол жеткіздік. Олардың арасында түрлі салаларда: өндірісте, ғылым мен техникада, мәдениетте, спортта, құқық қорғау органдары мен әскери ұйымдарда жемісті қызметімен үлгі бола білген адамдар бар, - деп атап өтті Мемлекет басшысы. «Отан» орденімен марапатталған «Соколов-Сарыбай кен байыту өндірістік бірлестігі» АҚ президенті Мұхамеджан Турдахунов кәсіпорын ұжымының атынан шын жүректен алғысын білдірді. - Бұл - мен үшін ғана емес, комбинаттың бүкіл ұжымы үшін үлкен құрмет. Біз кәсіпорынға деген Сіздің көзқарасыңызды білеміз. Соның арқасында біз бүгінде еңбек етудеміз, дамып келеміз және жаңа жобаларды іске асырудамыз. Біз өз Отанымыз – Қазақстан Республикасының дамуы мен өркендеуіне өз үлесімізді қоса отырып, Сіздің бастамаларыңызды әрдайым қолдап келдік және қолдай береміз, - деді М.Турдахунов. «Парасат»  орденінің иегері «Кардиохирургия ұлттық ғылыми орталығы» АҚ-ның басқарма төрағасы Юрий Пя бұл награда – еліміздің астанасы тәрізді қарқынды дамып келе жатқан Қазақстанның бүкіл денсаулық саласының жұмысына берілген баға екенін атап өтті. - Бүкіл Медициналық холдингтің және Кардиохирургия ұлттық ғылыми орталығының атынан осындай жағдайда жұмыс істеуімізге мүмкіндік жасағаныңыз үшін алғысымызды жеткізгім келеді. Сондай-ақ бүгінде бізде бүкіл жаңа технология бар, ал біздің жабдықтарымыз өзге елдерден кем түспейтініне сендіргім келеді. Әлемде жасалып жатқан барлық операция Қазақстанда да жасалуда. Оның бәрі еліміздің барлық азаматтары үшін қолжетімді, - деді Ю.Пя. ІІІ дәрежелі «Барыс» орденінің иегері «Қазақстан» «Телерадиокорпорациясы» АҚ директорлар кеңесінің мүшесі, тәуелсіз директор С.Оразалы әрбір саналы азамат үшін өз халына қызмет атқарғаннан артық бақыт жоқ екеніне тоқталды. - Егер сол еңбегін халық, мемлекет және ел Президенті бағалайтын болса, бұл - нағыз бақыт. Осында жиналғандар осындай сезімді бастан кешіп отыр деп ойлаймын, - деді С.Оразалы. «Арқатірек» поэмалар жинағы үшін Әдебиет пен өнер саласындағы Қазақстан Республикасы Мемлекеттік сыйлығының лауреаты атанған, ақын Н.Айт Мемлекет басшысына қазақ әдебиеті мен өнеріне көрсеткен зор қолдауы үшін алғысын айтты. Ол Қазақстанның игілігі үшін одан әрі қызмет етуге дайын екендігін атап өтті. «Жиырмасыншы ғасыр» роман-эпопеясы үшін Әдебиет пен өнер саласындағы Қазақстан Республикасы Мемлекеттік сыйлығының лауреаты болған, прозашы С.Досанов сыйлық алып тұрған сәтінде ойына француз философы Вольтердің «Мемлекеттік құтқару үшін бір ғана ұлы адам жеткілікті» деген сөзі оралғанын айтты. Ол әлем мойындап отырған Қазақстанның жетістіктеріне Нұрсұлтан Назарбаевтың арқасында қол жеткізгендіктен бұл сөзді Мемлекет басшысына арнап айту әділеттілік екенін атап көрсетті. Рәсім барысында «Қазақстан Республикасы Тұңғыш Президенті-Елбасы Нұрсұлтан Назарбаев» ордені Еуразиялық экономикалық комиссияның энергетика және инфрақұрылым жөніндегі алқасының мүшесі Даниал Ахметов пен Алматы қаласының әкімі Ахметжан Есімовке тапсырылды. І дәрежелі «Барыс» орденімен Шығыс Қазақстан облысының әкімі Бердібек Сапарбаев пен «Қазақстан электролиз зауыты» АҚ президенті Алмаз Ибрагимов марапатталды. ІІ дәрежелі «Барыс» орденіне Қазақстан Республикасы Мұнай және газ министрі Сауат Мыңбаев, «Самұрық-Қазына» Ұлттық әл-ауқат қоры» АҚ басқарма төрағасы Өмірзақ Шөкеев, Қ.И.Сәтбаев атындағы Қазақ Ұлттық техникалық университетінің профессоры Әбдіғаппар Әшімов ие болды. ІІІ дәрежелі «Барыс» ордені ақын К.Салықовқа берілді. ІІ дәрежелі «Достық» орденіне Қазақстан Республикасы Қорғаныс министрінің орынбасары Талғат Жанжүменов, Қазақстан Республикасы Бас прокурорының орынбасары Нұрмаханбет Исаев, Қазақстан Республикасы Бас прокурорының орынбасары Андрей Кравченко және Республикалық Ұлан Қолбасшысының бірінші орынбасары Ермек Үкібаев ие болды. Сондай-ақ Қазақстан Республикасы Премьер-Министрінің орынбасары Ербол Орынбаев, Жамбыл облысының әкімі Қанат Бозымбаев және Қазақстан Республикасы Орталық сайлау комиссиясының төрағасы Қуандық Тұрғанқұлов «Парасат» орденімен марапатталды. «Қазақстанның еңбек сіңірген қайраткері» құрметті атағын алғандар қатарында әнші Дильназ Ахмадиева мен Қазақстан Жазушылар Одағының Батыс Қазақстан облысы бойынша филиалының төрайымы Ақұштап Бақтыгереева бар. Сонымен қатар, әнші Әлібек Дінішев пен скрипкашы Гаухар Мырзабекова Әдебиет пен өнер саласындағы Қазақстан Республикасы Мемлекеттік сыйлығының лауреаттары атанды. Қазақстан Республикасы Тұңғыш Президенті-Елбасының бейбітшілік пен прогресс мемлекеттік сыйлығы халық артисі Жәния Әубәкіроваға берілді. Іс-шараны аяқтай келе, Мемлекет басшысы марапатталған қазақстандықтарды құттықтады. - Кез келген адам үшін мемлекет тарапынан еңбегінің бағалануы маңызды. Жұмысты одан әрі ынталандыру тұрғысынан алып қарағанда, бұл үлкен мәнге ие. Марапаттау еліміздің барлық өңірінде жүріп жатыр. Марапатталғандар бұдан қуат алып, мемлекет алдында тұрған міндеттерді орындауда, өз қызметін атқаруда үлгі көрсетеді деп үміт артамын, - деді Нұрсұлтан Назарбаев. Мемлекет басшысы барша қазақстандықтардың жұмысының арқасында «Қазақстан-2030» Стратегиясының басым бөлігі іске асырылғанын атап көрсетті. - Қазір бүкіл әлем XXI ғасырдың ортасына дейінгі өздерінің стратегиялық бағдарламаларын дайындауда. Біз де қазіргі жағдай мен одан әрі дамуымыздың келешегін ойластырдық. Мен еліміздің халқына, әсіресе жастарға стратегиялық бағдарламамен үндеу жасаймын. Сол арқылы Қазақстан 2050 жылға қарай қандай биіктерге қол жеткізетінін олар білетін болады. Бұл бағдарламаны орындау үшін Қазақстан халқы еліміздің болашақ игілігі мен біздің жастарымыздың бақыты үшін бірлесіп жұмыс істеуі тиіс, - деп атап көрсетті Нұрсұлтан Назарбаев. Мемлекет басшысы биылғы 14 желтоқсанда «Астана Опера» жаңа мемлекеттік опера және балет театрында Қазақстан халқына Жолдау арнайды.  

Азаматтардың үлкен бір тобы мемлекеттік наградалармен марапатталды

Еліміздің Тәуелсіздік күні қарсаңында Қазақстан Республикасы Президентінің Жарлығымен елдің әлеуметтік-экономикалық және мәдени дамуына, халықтар арасындағы достық пен ынтымақтастықты нығайтуға қосқан елеулі үлесі және белсенді қоғамдық қызметі үшін азаматтардың үлкен бір тобы мемлекеттік наградалармен марапатталды

  Олардың қатарында мәдениет, ғылым, білім, денсаулық сақтау қайраткерлері, өндірістік сала, бизнес өкілдері, құқық қорғау органдарының қызметкерлері, әскери қызметшілер, спортшылар, соғыс және еңбек ардагерлері бар. «Отан» орденімен «Соколов-Сарбай кен байыту өндірістік бірлестігі» АҚ президенті М.М.Турдахунов марапатталды. І дәрежелі «Барыс» орденімен марапатталғандардың қатарында «Қазақстан электролиз зауыты» АҚ президенті А.Т.Ибрагимов, жазушы Ш.Мұртаза, ІІ дәрежелі «Барыс» орденімен - Қ.И.Сәтбаев атындағы Қазақ Ұлттық техникалық университетінің профессоры Ә.Ә.Әшімов, академик С.С.Қирабаев, ІІІ дәрежелі «Барыс» орденімен - Шығыс Қазақстан облысындағы «Багратион» ШҚ басшысы В.Г.Воропай, «Конденсат» АҚ директорлар кеңесінің төрағасы В.К.Жүнісов, ақын К.Салықов, Қостанай облысындағы «Шеминовка» ЖШС директоры Ю.Б.Чеховский бар. Солтүстік Қазақстан облысындағы «Тұқым» ЖШС бас директоры Т.К.Ақаев, Қазақстан Республикасы Ұлттық Банкінің бас дизайнері М.Қ.Әлин, Иассауи атындағы халықаралық қазақ-түрік университетінің вице-президенті  Қ.Ергөбек, Қарағанды облысы «Қайнар» ЖШС директоры С.А.Нығметов, қоғам қайраткері Ө.О.Озғанбаев, Абай атындағы Қазақ ұлттық педагогикалық университетінің ректоры С.Пірәлиев, «Кардиохирургия ұлттық ғылыми орталығы» АҚ басқарма төрағасы Ю.В.Пя, Қазақстан Республикасы Шахмат федерациясының вице-президенті Д.Қ.Сәдуақасов, ақын  И.Сапарбай, жазушы Ә.Т.Сарай және басқалар  «Парасат»  орденінің иегерлері атанды. ІІ дәрежелі «Достық» орденімен наградталғандар арасында «Жамбыл облыстық гректер қоғамы» ҚБ төрағасы Г.И.Буюкиди, Түркі мәдениеті халықаралық ұйымының (ТҮРІКСОЙ) бас директоры Д.Қ.Қасейінов, Қарағанды мемлекеттік медицина университетінің кафедра меңгерушісі В.Б.Молотов-Лучанский, Ақтөбе облысы «Даут-М» ЖШС директоры А.Р.Муширов, Ақтау қаласының «Народное согласие» ҚБ төрағасы  Ю.А.Шахшаев бар. Бір топ белгілі ғалымдар мен мәдениет, спорт қайраткерлері, өндірістік сала  өкілдерінің еңбегі «Құрмет» орденімен атап өтілді. Олардың арасында «Таукент тау-кен химиялық кәсіпорны» ЖШС уран өндіру өндірісінің операторы Е.К.Абдуғамитов, «Ұлттық сараптау және сертификаттау орталығы» АҚ Қызылорда филиалының директоры Ә.Әмірғалиұлы, Астана қаласы №1 қалалық емханасының дәрігері Л.Г.Астахова, Ғ.Мүсірепов атындағы Қазақ академиялық балалар және жасөспірімдер театрының актері М.Н.Ахманов, «KEGOC» АҚ Жамбыл аумақтық электр торабының электромонтеры Қ.М.Байменов, Алматы облысы «Қарасу» су пайдаланушылар кооперативінің төрайымы К.Бердіғұлова, «Эра» телекомпаниясы» ЖШС байқаушы кеңесінің төрайымы Б.Н.Жексенбай, С.Торайғыров атындағы Павлодар мемлекеттік университетінің профессоры Қ.П.Жүсіп, Ақмола облысы «Аждар және К» ӨК төрағасы А.Тайшытаев, «Ембімұнайгаз» АҚ машинисі З.О.Өркенғалиев, Шымкент қалалық гимнастикадан мамандандырылған балалар мен жасөспірімдер спорт мектебінің директоры Ә.М.Юсупова бар. Әскери және қызметтік бор­ы­шын үлгілі атқарғаны, заңдылық пен құқықтық тәртіпті қамтамасыз етуде, елдің ұлттық қауіпсіздігі мен қорғаныс қабілетін нығайту кезінде көрсеткен ерлігі мен қажырлылығы үшін әскери қызметшілер, құқық қорғау органдары өкілдерінің бір тобы ІІ дәрежелі «Даңқ», І, ІІ және ІІІ дәрежелі «Айбын» ордендерімен, «Ерлігі үшін» және «Жауынгерлік ер­лігі үшін» медальдарымен марапатталды. «Қазақстанның еңбек сіңірген қайраткері» құрметті атағы ғылым, мәдениет, өндіріс пен әлеуметтік са­ланың 79 көрнекті өкіліне беріліп, Қазақстан Республикасының Құрмет грамотасына 275 адам ие болды. Мемлекеттік награда алғандардың тізімі жергілікті баспасөзде жарияланады.

www.akorda.kz