Ұстаздық еткен жалықпас

«Ұстаздық еткен жалықпас - үйретуден балаға» деген қазақтың дана сөзі жылдар бойы ұлт болашағы балалар үшін тынымсыз еңбек етіп келе жатқан барша ұстаздардың синонимдес сөзіне айналғандай… Солардың бірі, оқуды бітіргенімізге он жыл өтсе де әр шәкірттерімен тығыз байланыста жүретін Аралтөбе орта мектебінің директоры, география пәні мұғалімі Қабасов Бекет Мырзағұлұлы.

Бекет Мырзағұлұлы біз мектеп оқыған жылдары оқушылардың шығармашылық шындалуына еркіндік беріп, білім алуда бар мүмкіндік жасады. Ол тек ұстаз емес һәм диқан сиақты. Әр адамның жанына білім дәнін себеді. Әр шәкіртін аялап өсіріп, тек білім ғана беріп қоймай, өмір атты шексіз ғаламға топшысын қатайтып ұшырады. Дәлірек айтқанда, баланы өмір сүре білуге тәрбилейді. Әлі есімде, бесінші класқа қадам басқанда Бекет Мырзағұлұлы жаратылыстану сабағынан берді. Жаратылыстану ғылымының бізге оятқан қызығушылығы соншалықты ел-жерлерді тануда класс болып жарыса оқитынбыз. Кез-келген елдің астанасы, әр материктегі мемлекеттер саны, жер ғаламының қыр-сырларынан дейін әлі күнге жадымызда. Бекет Мырзағұлұлы Кабасов – беделді азамат, мектеп ұжымы мен ата-аналар арасында сыйлы, шығармашылықпен жұмыс жасайтын мектеп директоры, аудандық білім беру бөлімі қызметкерлері мен аудан басшылық алдында құрметке ие азамат. Тек ұстаз ретінде емес, тұлға ретінде үлгі алуға болады.

Еңбек жолын 1989-1993 жылдары Жымпиты аудандық білім беру бөлімінің жолдамасымен Тасқұдық ауылы, Тінәлі негізгі мектебіне жіберіліп, директор қызметін атқарды. 1993 жылдан бастап Сырым ауданы, Аралтөбе ауылы «Жалпы білім беретін Аралтөбе орта мектебі» мемлекеттік мекемесінде бүгінгі күнге дейін мектеп директоры жұмысын атқарып келеді. Ұстаздық қызметін атқарып өзінің кәсіби мамандығын жетік білеуімен, талапшыл, ізденімпаз, оқу үрдісінде жаңа технологияны қолданып білім сапасын арттыруда елеулі еңбегімен танылған педагог ретінде еңбегі бағаланып аудандық, облыстық білім басқармасының грамоталарымен, Қазақстан Республикасының Тұңғыш Президенті Н.Ә.Назарбаевтың алғыс хатымен, «Білім саласына қосқан елеулі үлесі үшін», Республикалық «Білім шыңы – ғылым сыры» редакциясының арнайы комиссиясының шешімімен «Мәртебелі мектеп директоры» төсбелгісімен, «Білім және ғылым қызметкерлерінің кәсіподағына сіңірген еңбегі үшін» төсбелгісімен марапатталды.

Адам баласымен сымбатты, ұрпағымен қымбатты дегендей, жас ұрпақ тәрбиесіне жауапкершілікпен қараған ұстаздың шәкірттері де еңбегін ақтап жатыр. Нұржан Искарин – Қаратөбе аудандық апробация қызметінің аға инспекторы, әділет капитаны. Гұлнұр Шынтемірова – Қазақстандағы Италия елшілігі қаржы бөлімі басшысының ассистенті. Гүлдана Айдын – Сырым аудандық ішкі істер бөлімінің криминалисті. Назгүл Бисенова –Орал қалалық №3 ауруханасында дәрігер-эндикренолог қызметін атқарады. Марс Бельгибаев – Бөрлі ауданының полиция бөлімі басшының орынбасары, полиция майоры. Армат Жоламанов – Ұлттық қауіпсіздік комитетінің әскери бөлімі медициналық пунк басшысы, Т.Бигелдинов атындағы медаль иегері. Айнұр Базарова –«Болашақ» бағдарламасының 2015 жылғы стипендиаты, «Халықаралық журналистика» мамандығының магистрі, «National Geographic» басылымының ағылшын-қазақ тілді аудармашысы. Сырым Мәсәлім – Т.Бигелдинов атындағы әуе қорғаныс күштері әскери институтын бітіріп, Ақтау қаласындағы әскери бөлімінде капитан шеңінде жұмыс атқарған болатын. Бекет Мырзағұлұлының шәкірттерінің бұл тек бір қарасы, елімізде ғана емес кішкентай мектептен түлеп ұшқан шәкірттері әлемнің түкпір-түкпірінде әр түрлі салада қызмет атқрауда. Олардың бірі өзім, халықаралық «Global gift foundation» ұйымының ресми мүшесі, медиаменеджер, қазақстандық көптеген тележобалардың продюсерлік қызметіндемін. Әр бастамамда ұстазыммен ақылдасу, кеңес сұрау мен үшін де, өзге шәкірттер үшін де үлкен көмек. Бұл тарапта Бекет Мырзағұлұлының бағыт-бағдар берер ақылы да баршылық.

Әріптестерімен тәжірибе алмасуда «Ашық сабақ. Факультативті сабақтар» журналына «Дүниежүзілік мұхит» тақырыбындағы сабағы, облыстық «Ел және мұғалім» газетіне «Өлкетану туған өлкенің жаңа келбетін ашты», «Ауа райына байланысты халық болжамдары» мақалалары, аудандық «Сырым ұстазы» газетіне «Қазақтың ырым-тыйымдары» мақаласы да жарық көріп, көптеген оқырманға өз көмегін тигізді.

Білікті басшымызды үлгі тұта отырып барша шәкірттері атынан 27 сәуір есте қалар елеулі 55 жасқа толуымен шын жүректен құттықтаймын! Білім жолында біліктілік пен қырағылықты қанат етіп, шәкірт тәрбиелеуде шыдамдығыңыз пен шынайылығыңыз шындала берсін! Отбасыңыз аман, қуанышыңыз еселене түссін!

Алпамыс Шаримов,

Шәкірті, БҚО, Сырым ауданы, Аралтөбе орта мектебінің тәлімгері