Петропавлға Абылай xанның, Павлодарға Кенесарының, Семейге Әлиxанның атын беру керек

Елордада Демократиялық күштердің «Қазақстан-2050» жалпыұлттық коалициясының кезекті отырысы өтті. Nur Otan партиясы Төрағасының бірінші орынбасары Мәулен Әшімбаев төрағалық еткен алқалы жиын астанамыздың аты Нұр-Сұлтан болып өзгеруіне орай ұйымдастырылды. Жиынға барлық саяси партия басшылары  мен қоғамдық ұйымдар жетекшілері қатысты.

 

"Ақ жол" партиясы төрағасы орынбасары Қазыбек Исаның

Демократиялық күштердің "Қазақстан -2050" жалпыұлттық коалициясы отырысында сөйлеген сөзі

  Армысыздар, ағайындар! Бәріңізді алдымен Ұлыстың Ұлы күні - Наурыз мерекесімен құттықтаймын! Біріншіден, Биылғы Наурыз -Жаңа жыл еліміз үшін ерекше зор тарихи жаңалықпен басталды! Тәуелсіз Қазақстан Республикасының Президенті Нұрсұлтан Назарбаев өзінің Президенттік өкілеттігін  кенеттен тоқтатты!.. 2019 жылғы 19 наурыздың 19-00 сағаты қазақстандықтардың мәңгі есінде қалатын болды! Тәуелсіз Елімізді 28 жыл басқарған  Нұрсұлтан  Назарбаевтың Президент ретіндегі  соңғы сөзін 28 минут бойы  бүкіл еліміз тырс етпей тыңдады. Тәуелсіз Қазақстанымызды, ортақ Отанымызды, Мәңгілік елімізді сақтай біліңіздер! Бұл – біздің халқымыз, біздің ұлы бабаларымыздың жері!»-деді Елбасы Президент ретіндегі ең соңғы Жарлығына қол қойып жатып… Кеше ғана Президентті сынап жүрген талай жүректі адамның  жүрегі сыздап, қимастық сезім орнады… Толғанып сөйлеген Тұңғыш Президентті толқып тыңдадық. Қазақстанның Тұңғыш Президенті -Елбасы Нұрсұлтан Назарбаев «Нұр Отан» партиясының жетекшісі және Қауіпсіздік кеңесінің төрағасы болып қала береді. Назарбаев Қазақстан Президенті міндетін Конституцияға сәйкес  ҚР Сенат төрағасы Қасым-Жомарт Тоқаев атқаратынын мәлімдеді. Қазақстанда Жаңа дәуір осылай  басталды! 2019 жылғы  20 наурыздан  бастап, Қазақстан 30 жылдан бері Президент Назарбаевсыз оянатын болды…. Иә, президенттік өкілеттігінің бітуіне әлі екі жылдай уақыт болса да, тіпті, Конституциямыз бойынша өмір бойы шектеусіз президент болуға  хақысы бар болса да, елінің болашағы  үшін  осындай орасан ерік күшін талап ететін Ерлікке баруы -Нұрсұлтан Назарбаевтың  ел алдындағы  қалыптасқан Нар тұлғасын одан сайын  асқақтатып жіберді. Шығыс елдерін қайдам, бүкіл мұсылман, түркі  мемлекеттерінің  патшалық кезеңдерінен бастасақ та, ел басшыларының бүкіл  тарихына  қарасақ, мұндай Ел болашағы үшін өз еркімен алтын тақты тастап шығып,  Ерлік жасап отырған Тұңғыш мемлекет басшысы – Қазақстанның  Тұңғыш  Президенті  Нұрсұлтан Назарбаев  болса керек! Ал биліктің президенттен сенат төрағасына өту процесі әлемде тұңғыш рет болып отыр. Елбасымыз соңғы жылдары Ұлытау ұлағатын ұқтырып, Рухани жаңғыруды бастап, Ұлттың жеті қырын жариялап, ел рухын  көтеріп жіберді. Таяуда ғана «Нұр Отан» партиясының кезекті съезінде Әлеуметтік бетбұрыс кезеңін бастауы да халқының  жағдайына алаңдап, Нар жолында жүк қалдырмай кетуінің жарқын  көрінісі. Нұрсұлтан Назарбаевтың Қазақстан тізгінін Кеңес Одағы құрамындағы кезінде, 1989 жылы ұстағанын ескерсек,  елімізді отыз жыл бойы басқарып, Алтын Орданың мұрагер елін Ақ ордаға айналдырып, Астанасын асқақатқанын әлем жоғары бағалап келеді. Қазақстанның Тәуелсіз мемлекет ретіндегі отыз жылдай кезеңі   Назарбаев дәуірі болып қалады. Әлемдік саясатқа «Қазақстан моделі» болып енген  Қазақстанның  ынтымақ пен бірліке құрылған, Тыныштық  жолы алда да тынысын ашып, өрісін кеңейте береді деп сенеміз! Нұрсұлтан Назарбаев тұрғызған Тәуелсіздік Бәйтерегі тамырын тереңге тартып, жапырағы жайқалып, биіктей береді деп білеміз! Екіншіден, Елбасымыз Нұрсұлтан Назарбаев жаңа Астанамызды салу идеясының авторы және бас сәулеткері ретінде елордамызды өзі салдырғаны елге белгілі. Егер астанамыз Арқаға ауыспағанда, бүгін біз бұл жерде келелі кеңес өткізіп отырмас едік. Целиноград қаласы тұрғындары түгел шетелдің мемлекеттік тілінде сөйлейтін,  табиғи ауа-райы да, саяси ауа-райы да суық Қазақстанның бір қаласы ретінде қала берер еді. Бірақ Қазақ Елінің Елбасы тапсырмасымен Үкіметі мен Парламенті де қазақ тілінде сөйлей бастаған астанасы болмас еді. Нұрсұлтан Әбішұлы астананың ауысуына жаппай өре түрегеліп, қаншама қарсы болғандарға, тіпті серіктестерінің сенімсіздік білдіргендеріне де селт етпей, саяси ерлік көрсетіп, ел ордасын Арқаға ауыстырды.  Солтүстіктің суық қаласының  суық саяси ауа-райын Тәуелсіз Қазақ Елінің астанасы ретінде жылытып жіберген Елбасының еңбегін  елмен бірге қарсыластары да мойындағанына куә болдық. Иә, сол ең бір экономикалық, әлеуметтік қиын кезеңде Жер жәннаты - Жетісудан, абат қала Алматыдан ақ бораны адам ұшыратын, сары аязы сақылдаған Сары Арқаның төріне астана ауыстыру саяси да,  табиғи да қиын кезеңде жасалған ерлік екеніне ешкімнің дауы жоқ шығар.. Астанаға ел басшысының атын беру әлемдік дәстүрлі жәйт. Демократияның атасы болып отырған отырған Америкада АҚШ-тың тұңғыш президентінің құрметіне қойылған ел астанасы  Вашингтонды айтсақ та, өзіміздің тарихымыздан тартсақ, Алтын Орданың хандарының құрметіне қойылған ел астаналары Сарай Бату, Сарай Берке қалаларын айтсақ та жеткілікті. Тек кеше "Қазақ үні" ұлттық порталы дабыл қағып, жазғандай, шаш ал десе, бас алған әкімдердің "социалистік жарысы" арқасында ұлы тұлғаларымыз Абайдың, Әбілқайыр ханның, Төле бидің, ғұлама ғалым Қаныш Сәтбаевтың аттарын, тіпті Тәуелсіздік атауын  ауыстырып жіберіп жатқанын қалай түсінуге болады? Батыр бабаларымыздың қанымен келген, бағасы да, баламасы да жоқ Тәу етер Тәуелсіздігіміз болмаса, Ел бола ма, Елбасы бола ма? Ақпарат министрі Дәурен Абаев пен Мәдениет министрі Арыстанбек Мұқамедиұлына рахмет, дер кезінде ресми жауап беріп, бұндай келеңсіздіктердің тоқтатылғанын мәлімдеді. Үшіншіден, үш күн бұрын Елбасыға елорданың аты берілгесін, енді тариxи сабақтастық ретінде Петропавл қаласына кезінде өзінің ордасы тұрған, үш жүздің басын қосқан қазақтың ұлы xаны Абылай xанның атын, Павлодар қаласына қазақтың тәуелсіздігі үшін күрескен қазақтың соңғы xаны Кенесарының атын, кезінде Алаш қаласы атанған Семейге қазақ тариxында ғана емес, Орта Азияда тұңғыш саяси партия құрған Алашорда үкіметінің төрағасы Әлиxан Бөкейxанның атын беріп, жақсы жалғастырып алып кетуіміз керек.  Кеше ғана Қазақ xандығының 550 жылдығын тойлауды Елбасының өзі бастағанын білесіздер. Ендеше, бұл тариxи тамырымыздың тереңдігін, саясатымыздың кемелдігін көресетер іс болады деп білемін. Мәслихаттарымыз да, Парламентіміз де қала атын ауыстырудың ғарыштық жылдамдығын көрсетіп отыр, ендеше 28 жылдан бері неге созып келгенбіз бұл қалалардың атын ауыстыруды?.. Біз,  Парламент Мәжілісі депутаты Азат Перуашев басқарып отырған "Ақ жол" демократиялық партиясы, Әз Наурыз  мерекесі - Жаңа жылымызбен келген жаңаруымыз - Жаңа дәуіріміз -Жақсылық дәуірі болғай деп, елімізге ырыс-құт, бірлік пен тыныштық тілеп, Алла алдымыздан Ақ жол аша берсін дейміз!   Қазыбек ИСА, "Ақ жол" партиясы төрағасы орынбасары 25 наурыз, 2019 жыл.  Qazaquni.kz