Ақмолада өз-өзіне қол салғандар бөлек жерленеді

Ақмола облысы, Көкшетау қаласына қарасты Красный Яр елді мекенінде өз-өзіне қол жұмсағандар 2010 жылдан бері бөлек жерленеді.

Мұндай бастаманы Красный Яр мешітінің бас имамы Науан МҮТӘЛІҰЛЫ  көтерген, деп хабарлайды Sputnik Қазақстан.

Имам алғаш рет бұл бастаманы өзінің туған ауылы Жаңатілекте (Ақмола облысы Зеренді ауданы) жүзеге асырған. Кейін қызмет бабымен Красный Яр елдімекеніне ауысқаннан кейін, осы жерде де өз-өзіне қол жұмсағандарды бөлек жерлеу мәселесін көтереді.

«Өз-өзіне қол жұмсағандар көбейіп кеткеннен кейін, осындай бастаманы қолға алдық. Үлкен зираттан бөлек, оқшаулау тұрғаннан кейін адамдарға ой салар деп үміттендік. Әбу Ханифа мазхабында өз-өзіне қол салуды үлкен күнә деп есептеп, жаназасын шығарады. Бірақ тәртібі бойынша жаназасын елдің патшасы, әкімі немесе бас имамдары шығармайды, жай қатардағы намазхан адамдар шығарады. Ондағы мақсат – мұның жек көрінішті амал екенін көрсету», — дейді бас имам.

«Өз-өзіне қол жұмсағандарды орталықтан берілген үлкен зираттың шеті, нағыз бұрышына қойғыздық. Араларында бірнеше метр орын бар. Елдімекенге келіп-кеткен адамдардың өзі  «мына кісілер неге бөлек жатыр» деп сұрап жатады. Шыны керек, адамдарға үлкен ой тастап жатыр, жемісін көріп жатырмыз. Суицид жасамақ болған бірнеше адам райынан қайтты", — дейді Мүтәлұлы.

Имамның айтуынша, жеті жыл ішінде 9-10 адам зираттың шетіне бөлек жерленген.

«Өзіне қол жұмсағандардың дені – жастар, дегенмен үлкендері де жоқ емес. Тіпті 1942 жылғы ақсақал бар», — дейді ол.

Красный Яр халқы мұндай бастамаға бас кезінде қарсылық танытып, шу шығарған. Кейін тұрғындармен әңгімелесіп, мұның мәні мен маңызын түсіндіргеннен кейін дұрыс шешім екенін ұғыпты.

«Біздегі тәртіпті естіген адамдар, жақыны өз-өзіне қол жұмсап қайтса, басқа ауылға, алыс жаққа алып кетіп, сонда жерлейді. Себебі біздің позициямызды біледі», — деп түйіндеді сөзін бас имам.