ТҮГЕЛДІҢ САУАТЫ ТҮГЕЛ МЕ?

ЗАҢДЫ БІЛМЕЙТІНДЕР - ЗАҢГЕР,  ТІЛДІ ҚОРЛАУШЫЛАР - ҚОРҒАУШЫ болған заман-ай !!!

    Қазақ тілін - Қазақстан Республикасының Мемлекеттік тілін  толыққанды тіл деп санамайтын, өзінің Ана тілінен Ресейдің мемлекеттік тілін артық көретін  тағы біреу шықты... Ол Республикалық адвокаттар алқасының төрағасы деген дардай  қызметі бар Әнуар Түгел. Парламент  Мәжілісінде «Нотариат және адвокатура институттарын одан әрі дамыту және реформалау» тақырыбында өткен үкімет сағатында сұрақ қойған Мәжіліс депутаты  Сауытбек Әбдірахмановқа «Прошу ответить на русском языке. Так будет доступней» - деп соқты... Әрине, Әбдірахманов та қарап қалған жоқ:   - Республикалық адвокаттар алқасының төрағасы Әнуар Түгелге. Депутаттың сұрағына жауап қайтара отырып сіз «Прошу ответить на русском языке. Так будет доступней» дедіңіз. Бұл сөзіңізді қалай түсінуге болады? Депутат Магеррамовтың сұрағына жауап қайтарған кезде де солай сөйледіңіз. Сонда сіздің пікіріңізше, жауапты қазақ тілінде қайтарғанда ойды «доступно» жеткізудің мүмкіндігі жоқ па? Қазақ тілін кемсітіп сөйлемеуді сұраймын»,-деп қайтарып тастады. Қазақ тілінің мүддесі үшін араша түскен Мәжіліс депутаты, белгілі қаламгер  Сауытбек Әбдірахманов мырзаға көп рахмет!  Мемлекеттік тілдің мүддесі үшін мемлекетшіл депутаттар түгел Түгелдің миын түгелдеп, сауатын ашып, есін кіргізу керек еді... Бұл жерде "Түгелдің миын түгендеп" деп босқа айтып отырған жоқпыз.  Қазақ тілін қақпайтын қаптаған министрлер мен әкімдердің ішінде тіпті, "Менің миымды ауыстырмасаңдар, қазақ тілін үйрене алмаймын" деп, 2001 жылы дәл осы парламентте қасқайып тұрып мәлімдеген  министрлер  де болған Тәуелсіз Қазақстанның тарихында... Содан бері де  16 жыл, ал бодандықтан бостандыққа шыққанымызға 26 жыл өтіпті!..  Бірақ, "баяғы жартас-сол жартас" күйінде келеді.  Құлдық санадағылар әлі азаяр емес... Ең қорқыныштысы Құлдық санадан арылмағандар мемлекеттік басқару органдарында, Үкіметте, Парламентте, мемлекеттік мекемелерде отыр... Республикалық адвокаттар алқасының төрағасы деген  атағы бар, өзі кәсіби заңгер, еліміздегі адвокаттардың, яғни қорғаушылардың  жетекшісі болса, бұл неге Мемлекеттік тіл туралы заңды білмейді?  Білсе, неге заңды сақтамайды? Ата заңымызда айқын жазылып тұрған "Қазақ тілі - Мемлекеттік тіл" деген 7-ші бапты неге кемсітеді? Оған бұған кім құқық берді? Бұл неге алдымен Мемлекеттік мүдде - Мемлекттік тіл мүддесін қорғамайды, керісінше қорлайды? Ана тілі - Қазақ тілі - Мемлекеттік тіл Түгелге түгел  "недоступно", яғни жетімсіз  болса, жетесіне жетпесе, жетесіздігінен көрсін, оған ҚАЗАҚ ТІЛІНІҢ-МЕМЛЕКТТІК ТІЛДІҢ НЕ КІНӘСІ БАР?  Тегі Түгел болғанмен, рухани  ұлттық  санасы түгелдігіне күмәніміз бар... Түгелдің қазақ тілінен сауаты түгел ме деп сұрап отырғанмыздың мәнісі де осында... Көрші туыс еліміз Өзбекстанда немесе өзін сыйлайтын кез келген елде болса, Мемлекеттік тілін менсінбей "недоступно" деп, үстінен ат айдап, Ресейдің мемлекеттік тіліне жығып берген Түгел секілділердің  мәселесі түгел шешілер еді сол сәтте... Заңгеріміз заңды білмесе немесе сақтамаса,  қорғаушымыз мемлекеттік тілді қорғаушы емес, қорлаушы болса, жетіскен екенбіз.... Қазыбек ИСА, qazaquni.kz   Тақырып тарауы: http://www.qazaquni.kz/2017/06/10/70626.html