Қазақстандықтардың зейнетақысы "Экспо-2017" аумағындағы инвестициялық нысандарға жұмсалмақ

«Бірыңғай жинақтаушы зейнетақы қорынан» тартылған 15 млрд теңгені «Қазақстанның даму банкі» «ЭКСПО-2017» аумағындағы нысандар құрылысына жұмсайды деп хабарлайды "Астана" арнасы.

ҚДБ зейнетақы қорынан тартылған 15 млрд теңгені «ЭКСПО-2017» құрылысына жұмсайдыБұл туралы қаржы ұйымына сілтеме жасай отырып, "Интерфакс" мәлімдеді. Ақпаратта: "Қазақстан даму банкі" КАSЕ қорына облигациялар орналастыру арқылы шілде-тамыз айларында "Біртұтас жинақтаушы зейнетақы қоры" АҚ-нан 117,5 млрд теңге алды. Оның 15 миллиарды Астанада "ЭКСПО-2017" нысандары құрылысына; 17,5 млрд теңге отандық өндірісті "Қазақстан даму банкі-Лизинг" АҚ арқылы лизингтік қаржыландыруға жұмсалады. Қалған қаржы 2016-17 жылдары экономикалық өсімді ынталандыру мен халықты жұмыспен қамту жөніндегі іс-шаралар жоспарын іске асыруға, жеке кәсіпкерлік нысандарын қаржыландыруға жұмсалмақ"- делінген.

Ал "Астана-Экспо-2017" компаниясының өкілі зейнетақы қорының қаржысы тартылатын нысандар көрме павильондары емес" дейді. Сондай-ақ бұл нысандар 174 га аумақтың небәрі 25 гектарын ғана алып жатыр екен. Яғни, қаржы халықаралық көрме кешені аумағындағы өзге ғимараттар құрылысына жұмсалмақ.

"Бұл тұрғын үйлер - "Мега" сауда ойын-сауық орталығы және басқа да бірқатар нысандар. ЭКСПО аумағында орналасқанымен, олар инвестициялық нысандар болып табылады. Біздің компанияға қатысы жоқ. Бұл ақшаны компанияға инвесторлар салды", - дейді  "ЭКСПО-2017" ҰК бұқарамен байланыс департаментінің директоры Сергей Куянов.

Зейнетақы қорының қаржысын Қазақстан даму банкі қашан және қандай өсіммен қайтарады? Оған қоса қаражат қай компанияларға қанша пайызбен қарызға беріледі? Осы сұрақтарға жауап берген қаржы ұйымының баспасөз қызметі жақында толық мәлімет беріледі деп сендірді.