Шенеуніктердің тартысынан тұрғындар сусыз қалды...

Жамбыл облысы Меркі ауданының халқы төрт айдан бері ауыз суға жарымай отыр деп хабарлайды КТК. Ашынған халық шіліңгір шілдеде тіршілік нәрінен тарықтырды деп жауапты тұлғаларды кінәлайды.

"Баланың бетін жуатын су жоқ. Анау Екпіндіден су тасимыз. Не өмір?", - деп ашынады тұрғындар. Әкімдік өкілдерінің айтуынша, "Таза су" мекемесінің жұмысын жандандыру үшін жергілікті бюджеттен 3 жылға 150 млн теңге бөлінген. Бірақ бірде-бір құбыр жөнделмепті. Мекеме басшысының мемлекет қаржысын талан-таражға салғанын шенеуніктер растап отыр. Қазір бұл іс бойынша қылмыстық іс қозғалған. "Істелмеген жұмысқа ақша жұмсаған ғой. Орысша прорыв деп бәленше жерде құбыр тесілген, осындай жұмыстар атқарылды деп. Прокуратура тексерген кезде оның бәрі дәлелденген жоқ. Өтірік боп шықты. Бірталай шығын келтіріп отыр", - дейді Меркі ауданы әкімдігі ТҮКШ жолаушылар көлігі және автомобиль жолдары бөлімінің басшысы Қайрат Арғынбаев.

"Таза су" мекемесі мен жергілікті биліктің жанжалдасып жатқанына жарты жыл. Ал ауыз судың азабын тұрғындар тартып отыр. Аудан орталығына көршілес жатқан бес бірдей ауылда да су жоқ.

"Таза су" мекемесінің басшысы болса, атқамінерлер халықты маған қарсы қойып отыр дейді. Айтуынша, ауыз суға бөлінген ақша орнымен жұмсалған. Бөлінген қаржы мекеменің коммуналдық қарызын жабуға кеткен. "Бір екі адам бар Меркіде. Сол келген әкімдердің үстіне олар мініп алады. Қазіргі әкімге мініп алды. Теперь я от того акима остался же. Олар енді маған жабылып жатыр. Туысқаны деп", - дейді "Таза су" мекемесінің басшысы Мәлік Әділқұлов.