Аудан әкімі 13 млн теңгенің көлігін сатып алған

Қостанай облысындағы Қамысты ауданының әкімі Жаңабай Бисімбаев 13 млн теңгеге жуық қаржыға Land Cruiser Prado қызметтік көлігін сатып алады. Қамысты ауданы әкімі аппаратының жетекшісі Ибрагим Бекмұхамедов қымбат көлікті сатып алудың себебін түсіндірді.Бұл туралы Tengrinews.kz жергілікті "Наша газета" басылымына сілтеме жасап хабарлады. "Қазіргі уақытта аудан әкімі 2007 жылы сатып алынған Toyota маркалы автокөлік - седанды мініп жүр. Егер сіз Қамысты ауданында болсаңыз, білесіз - Денисов ауданымен арадағы шекараны кесіп өткеннен кейін ойқы-шойқы жерлер басталады. Седанның пластик бампері үнемі сынып қалады, қымбат жөндеу жасатуға тура келеді. Сондықтан толық жетек режиміндегі автокөлікке тоқтадық. Сән-салтанат үшін емес. Біз люкс санатындағы автокөлікті емес, элегант көлік сатып аламыз", - деді Бекмұхамедов. Басылымның мәліметінше, Қамысты ауданы әкімі аппаратының жол талғамайтын "Ниваны" сатып алғысы жоқ, себебі ол "аудан әкімінің деңгейі үшін аса жайлы емес". "2014 жылдан бастап, Кеден одағы аумағында өндірілетін автокөліктерді сатып алуға болатыны бізге белгілі. Toyota маркалы автокөлік РФ аумағында құрастырылады. Бұл бренд айтарлықтай беделге ие. Машина сенімді, сапалы, бағасы да соған сай. Әкімге Қостанайға жиі баруға тура келеді - айына 2-3 рет, облыс орталығына дейінгі жолдың жағдайы сын көтермейді. Әкім мемлекеттік қызметшілер қатарына ауыстырылғанымен, бірқатар себеппен саяси тұлға болып қала береді. Ауданның бірінші тұлғасының қауіпсіздігі қамтамасыз етілген болуы керек. Prado қауіпсіздіктің барлық талабына жауап береді. Әкім оны өз жекеменшігіне алмайды. Басқа әкім келсе, ол да осы көлікпен жүретін болады", - дейді аудан әкімі аппаратының жетекшісі.

tengrinews.kz