Саяси қуғын-сүргін құрбандарына ескерткіш тұрғызу – тарихи мәні зор саяси оқиға

2
2685

 

 

 

 

 Қазақстан Республикасының

                                                                           Премьер-Министрі 

                                                                           С.Н. Ахметовке

 

              Депутаттық сауал

 

Құрметті Серік Нығметұлы !

31 мамыр – Ашаршылық пен Саяси қуғын-сүргін құрбандары күні 1997 жылдан бері  ҚР Президентінің Жарлығымен атап өтіліп келеді. Жарлыққа сәйкес ҚР үкіметіне жыл сайын 31 – мамырда саяси қуғын-сүргін құрбандарына арналған іс-шаралар әзірлеп өткізу тапсырылған. Ал осы іс-шаралар өз дәрежесінде Үкімет тарапынан атқарылып жатыр ма?

ХХ ғасырдағы қазақ халқының жартысына жуығын қырып салған  1917-20-жылдары  мен әйгілі 30-шы жылдардағы қолдан ұйымдастырылған алапат ашаршылық пен  37 жылғы қанды қырғын – саяси репрессия бағасы әлі толыққанды берілген жоқ. Украина  Жоғарғы Радасы елді қырғынға ұшыратқан ашаршылықты  Голодомор деп жариялап, украин халқына жасалған геноцид деп тапты. Украина соты И.Сталиннен бастап, бұрынғы КСРО басшылары  мен Украин Кеңестік Социалистік Республикасы жетекшілерін де осы алапат қылмысты жасаған қылмыскерлер  деп үкім шығарды.

1930-1933 жылдар аралығындағы ашаршылықта  кейбір тарихшыларымыздың есебі бойынша 4 миллионға жуық  адам қырылған.  Алматыдағы үлкен жиында   қанды қырғынның авторларының бірі Голощекин «біз керемет жетістікке қол жеткіздік» деп баяндама жасап, оған барлық коммунистер ду қол шапалақтап жатқанда, көшеде бірінің үстіне бірі үйіліп аштан өліп жатқан мәйіттердің иісі ашық терезеден ішке еніп  тұрғанын айтады куәгер қайраткерлеріміз.

1897 жылы өткен Ресейдегі  халық санағының ресми статистикасына қарасақ, өзбек ұлты 1 миллион 690 мың, тәжік ұлты 350 мың адам болыпты. Сол уақытта қазақтың саны 4 миллион 84 мың адам болған екен. 100 жыл аралығында өзбек ұлты 25 миллионға жетсе, осы күндері Еліміздегі қазақ ұлтының саны 11 миллионға әрең жетті. Міне, ашаршылықтың орны толмас алапат зардабын осыдан-ақ білуге болады.

1937-1938 жылдардағы саяси репрессияда 100 мыңнан аса адам жазықсыз халық жауы атанды.

Алматыдағы Наурызбай батыр мен Қабанбай батыр көшелерінің қиылысындағы  осы саябақта  біз зор келеңсіздікке  куә болдық.  Жылдар бойы іске аспай келе жатқан Саяси қуғын-сүргін  құрбандарына арналатын ескерткіштің  белгісі – тастұғыр тарихымызда ауыр қасірет алып келген зұлмат пен зобалаңның  60 жылдығында, яғни 1992 жылы орнатылған екен.  Содан бері өткен 21 жылда осы тастұғырды ескерткішке айналдыра алмауымыз елдігімізге сын.

Қазақ халқының жартысына жуығын жалмап кеткен қолдан жасалған Ашаршылық пен Саяси қуғын-сүргін  құрбандарына арналған ескерткіш- мемориалдық кешен  тұрғызу – жастарымызға  өткеннен сабақ беріп, отаншылдыққа тәрбиелейтін тарихи мәні зор саяси оқиға болып табылады. Ендеше бұған Президент жарлығына  сәйкес жыл сайын 31 – мамырда саяси қуғын-сүргін құрбандарына арналған іс-шаралар әзірлеп өткізу тапсырылған  Үкіметіміз терең мән беріп, баса назар аударуы керек.

Құрметті Серік Нығметұлы!

Жоғарыда аталған саябақта аяқсыз қалған ескерткіш жұмысының қашан мәресіне жететінін және Саяси қуғын-сүргін құрбандарын, сол бір тарихымыздағы қасірет жылдарын зерттеп, ұрпаққа құнды мағлұмат қалдыру жөнінде Үкімет тарапынан атқарылып жатқан жұмыстармен хабардар етуіңізді сұраймыз.

«Ақ жол» партиясы 31 мамыр – Ашаршылық пен Саяси қуғын-сүргін құрбандары күні және Тәуелсіздігімізбен келген Мемлекеттік мерекелер: Тәуелсіздік күні, Наурыз мейрамы, Конститутция күні және Қарулы күштердің құрылған күндерінде барлық қазақстандықтарды тәуелсіз Қазақстанның Мемлекеттік туының бір бөлшегін – көгілдір лентаны тарихымызға көрсетілген құрмет белгісі ретінде тағып жүруге шақырады.

 

Біз:

–         Қазақстанда 1921- 1954 жылдар аралығында саяси себептермен 100 мыңнан астам көрнекті қоғам қайраткерлері жазаланғанын., 25 мыңнан астамы атылғанын;

–         Әртүрлі бағалаулар бойынша, тұтастай алғанда қазақ халқының 60-65 пайызын құраған 2-ден 3 миллионға дейін адамның  ашаршылық нәубетінен ажал құшқанын, Қазақ елінен 1,5 миллион адамның бас сауғалап, босып кеткенін;

–         Ұлттық мемлекеттілік мүддесін көздеген көзі ашық, көкірегі ояу зиялыларынан түгелдей дерлік айырылғанын;

–         Қазақстанның жүздеген мың жазықсыз жандардың және репрессияға ұшырап, қуғындалып келген басқа этностардың мекеніне айналғанын, сұрапыл зұлматты басынан кешкен біздің халқымыздың оларды сұмдық жұттан, адамдарды қынадай қырған ашаршылықтан құтқарғанын әрдайым ЕСТЕ САҚТАЙМЫЗ.  

 

 

       Құрметпен,

«Ақ жол» ҚДП

Парламенттік  фракция мүшелері                                        А. Тұртаев

 

                                                                                                                                            А. Перуашев 

                                                                      

                                                                                                    Е. Никитинская

 

                                                                                                      А. Әбілдаев

 

                                                                                                   Н. Жазылбеков

 

                                                                                                                                               М. Қазбекова

                                                                                 

                                                                                                       Т. Ерғалиев

30.05.2013 жарияланды

www.qazaquni.kz

 

 

2 ПІКІРЛЕР

  1. Ақ жол» партиясы болмаса, 31 мамыр – Ашаршылық пен Саяси қуғын-сүргін құрбандары күні екенін парламенттегі 150-дей депутаттың біреуі де есіне алған жоқ… «Ақ жолға» – Ақ жол!

  2. ХХ ғасырдағы қазақ халқының жартысына жуығын қырып салған 1917-20-жылдары мен әйгілі 30-шы жылдардағы қолдан ұйымдастырылған алапат ашаршылық пен 37 жылғы қанды қырғын – саяси репрессия бағасы әлі толыққанды берілген жоқ. Украина Жоғарғы Радасы елді қырғынға ұшыратқан ашаршылықты Голодомор деп жариялап, украин халқына жасалған геноцид деп тапты. Украина соты И.Сталиннен бастап, бұрынғы КСРО басшылары мен Украин Кеңестік Социалистік Республикасы жетекшілерін де осы алапат қылмысты жасаған қылмыскерлер деп үкім шығарды.

    1930-1933 жылдар аралығындағы ашаршылықта кейбір тарихшыларымыздың есебі бойынша 4 миллионға жуық адам қырылған. Алматыдағы үлкен жиында қанды қырғынның авторларының бірі Голощекин «біз керемет жетістікке қол жеткіздік» деп баяндама жасап, оған барлық коммунистер ду қол шапалақтап жатқанда, көшеде бірінің үстіне бірі үйіліп аштан өліп жатқан мәйіттердің иісі ашық терезеден ішке еніп тұрғанын айтады куәгер қайраткерлеріміз.

Пікір жазу

Пікіріңізді енгізіңіз!
мұнда сіздің атыңызды енгізіңіз