Ұшақ апатына ұшырағандардың отбасыларына көңіл айтамыз - Қазыбек Иса

Баку-Грозный бағытында ұшып, Ақтау қаласында апатқа ұшыраған Azerbaijan Airlines ұшағында 67 жолаушы болған. Құдай сақтап, ұшақ салонының артқы жағында отырған 29 жолаушы тірі қалған. Қаза тапқан 38 жолаушы арасында әзербайжандық ағайындармен бірге Қазақстанның 6 азаматы да бар екен өкінішке орай. Барлық қаза тапқандардың отбасылары мен туған-туыстарына қайғырып, көңіл айтамыз! Аман қалып, ауруханаға түскен 29 азаматтың тезірек сауығып кетуін тілейміз.

Мемлекет басшысы Қ.Тоқаев Әзербайжан Президенті И.Әлиев пен туысқан елге көңіл айтты. Президент тапсырмасымен Қазақстанда апат себебін анықтау үшін үкіметтік комиссия құрылды. Әзербайжаннан да мемлекеттік комиссия келіп жетті. Тиісті комиссия анық-қанығын тексерген соң, 38 адамның өмірі қиылған апатқа кінәлілер шығып жатса, қатаң жауап беруі тиіс.

Грозный маңынан қонатын жер таппай, қазақтың кең құшағына, киелі Маңғыстаудың маң даласына, Каспидің жағасына келіп құлаған ұшақтан құдай қолдап, 29 адамның аман қалуы Алланың рахымы!

Апатқа ұшырағандарға алғаш көмекке келіп, құтқарғандар да, сол маңда жұмыс істеп жүрген қазақтың бауырмал, батыр жігіттері! Ақтау мен Астанада тб қалаларда апатқа ұшырағандар үшін еріктілер қан тапсырып, азаматтықтарын көрсетіп жатыр. Астаналықтар Әзербайжан елшілігі тұрған үйге қаралы гүл шоқтарын қоюда.

Бәрімізді әрдайым бір құдай сақтап, Алла жар болсын!

Ел аман, жұрт тыныш болғай!

Қазыбек ИСА,

ҚР Парламенті Мәжілісінің депутаты 

Редакциядан: 

Төтенше жағдайлар министрлігі 25 желтоқсан күні Ақтау қаласында апатқа ұшыраған Әзербайжан әуекомпаниясына тиесілі ұшақта болған Қазақстан азаматтарының аты-жөнін анықтады.

Министрлік ұсынған дерекке сай, ұшақ апатынан Қазақстанның 6 азаматы қайтыс болған. 

Төлесінов Сәндібек Екібайұлы, 16.11.1988 ж.т., туған жері: Маңғыстау облысы, Жаңаөзен қаласының тұрғыны.Жұмағұлов Бауыржан Жұмабайұлы, 30.09.1985 ж.т., туған жері: Маңғыстау облысы, Жаңаөзен қаласының тұрғыны.Махсудова Галина Растамбековна, 12.01.1978 ж.т., туған жері: Маңғыстау облысы, Ақтау қаласының тұрғыны.Шаймерденова Гаухар Жұмағатқызы, 17.07.1975 ж.т., туған жері: Алматы қ., Астана қаласының тұрғыны.Жұмағат Эльдар 23.08.2013 ж.т., Астана қ. тұрғыны.Джутаева Салима Аманжолқызы, 21.02.1995 ж.т., туған жері: Қостанай облысы, Қарағанды қаласының тұрғыны.

Барлық қаза тапқандардың отбасылары мен туған-туыстарына қайғырып, көңіл айтамыз!

Фото el.kz сайтынан алынған.