Шардарада «Қара бауыр қасқалдақ» атты облыстық ән байқауы өтті

Бүгін Шардара қаласында сазгер, әнші Лесбек Амановтың 70 жылдығына арналаған «Қара бауыр қасқалдақ» атты облыстық ән байқауы өтті. Байқауға аудан әкімінің орынбасары Бауыржан Шомпиев, сазгердің бауыры мен ұл-қыздары қатысты. 

Екі кезең бойынша өткен сайыста үміткерлер сазгер Лесбек Амановтың шығармаларынан бөлек, қазақ композиторларының әндерін шырқады. Байқау мақсаты – Лесбек Амановтың халық арасында кеңінен танылған әндерінен бөлек, сирек орындалып жүрген шығармаларын жарыққа шығару, жастарды отансүйгіштікке баулу, ән өнерін дамыту, жастарды ұлттық рухта тәрбиелеп, сазгердің әндерін кеңінен насихаттау арқылы оны еске алу. 

Өнер сайысында Қазақстан Республикасы мәдениет саласының үздігі, облыстық Мәдениет және халық шығармашылығы орталығының директоры Мейіржан Алиакбаров, Қазақстан Респбуликасы мәдениет саласының үздігі, күйші Бөрі Иса, Қазақстан Республикасының мәдениет қайраткері, Қазақстан композиторлар одағының Түркістан облысы бойынша төрайымы, композитор Құралай Сәтмұхамбетова, Қазақстан Республикасының мәдениет қайраткері, жыршы-термеші Хадиша Мұсабекова, Шәмші Қалдаяқов атындағы филармонияның әншісі, сазгер, халықаралық байқаулардың лауреаты Азамат Алиакбар қазылық етті. 

Байқау қорытындысы бойынша Шардара ауданынан қатысқан «Мерей» ансамблі жеңімпаз атанды. Сондай ақ, Түлкібас ауданының «Арша» квартеті жүлделі І орынға, шардаралық Сәкен Бегманов пен Нұржан Жигелиев және төлебилік Жорақұл Аңсар мен Бақтыбай Кадиров жүлделі ІІ орынға ие болды. Ал, Созақ ауданынан келген Айдос Әлқуат, Мақтарал ауданынан келген Алмасбек Байсейітов және Жетісай ауданыныың өнерпазы Саним Ермекбаева жүлделі ІІІ орынды иеленді. Сонымен қатар Сайрам ауданының «Жалын» тобы облыстық мәдениет және туризм басқармасының арнайы жүлдесімен, Келес ауданының «Келес» тобы Шардара ауданы әкімінің арнайы жүлдесімен, Ордабасылық өнерпаз Елнұр Өскенбек облыстық мәдениет және халық шығармашылығы орталығының арнайы жүлдесімен, Бәйдібек ауданынан келген әнші Қуат Қасен аудандық Мәдениет, тілдерді дамыту, дене шынықтыру және спорт бөлімінің арнайы жүлдесімен, Арыс қаласынан келген әнші Нұржан Уәлиев М. Жалаңбасов атындағы арнайы жүлдемен және Нұрбек Әбдірахман сазгер Лесбек Аманов атындағы арнайы жүлдемен марапатталды. Сондай ақ ынталандыру сыйлығы сарыағаштық Нұрлыбек Бұхарбаевқа, отырарлық Сейітқұл Төлешовке, шардаралық Мейірбек Ибадуллаевқв бұйырды.

«Қара бауыр қасқалдақ» әні 1990 жылдары отансүйгіш қазақ жастарының әнұранына айналған еді. Өз тәуелсіздігін талап етіп алаңға шыққан Алматыдағы қазақ жастары сазгер Лесбек Амановтың «Қара бауыр қасқалдақ» әнін рухани ту етіп ұстанатын. «Қара бауыр қасқалдақ» әні тарихи мәні жағынан қазақтың зар заман жылдары шыққан әндер қатарына жатады. Ол «Ақтабан шұбырынды, алқакөл сұлама» атымен тархта қалған «Елім ай» әнімен, Шәмші Қалдаяқовтың «Менің – Қазақстаным» әнұранымен рухтас ән.