Смағұл Елубай: Мемлекеттік қызметкерлер мемлекеттік тілді білуге міндетті болуы керек!

3
1594

ҚР Парламенті Мәжілісі депутаты, «Ақ жол» партиясы төрағасының орынбасары Қазыбек Иса Мәжілістің жалпы отырысында Үкімет басшысы Асқар Маминге депутаттық сауал жолдап, мемлекеттік тіл мәртебесін жеке дара анықтауды талап еткен болатын.

Осыған байланысты белгілі жазушы, қоғам қайраткері Смағұл Елубай те өз пікірін білдірді.

– Ұлт жанашыры, ҚР Парламенті Мәжілісінің депутаты Қазыбек Исаның «Ақ жол» партиясы фракциясы депутаттарының атынан мемлекеттік тілдің мәртебесін жеке дара анықтауды талап еткен депутаттық сауалын үлкен ризашылықпен қабыл алдық. Қазақ тілінің мәселесін қаншама уақыттан бері көтеріп келе жатқан қоғам қайраткері ретінде Қазыбек Исаның Парламент қабырғасындағы алғашқы депутаттық сауалының мемлекеттік тілге арналуы заңдылық деп білемін. Осы сауалы арқылы ол бір партияның ғана емес, тілім деп жүрегі тілімделген барша халықтың үнін жеткізді деп есептеймін. Мемлекеттік тіліміз – қазақ тілінің мемлекеттік мекемелердің төріне шыға алмай есігінен сығалап жүрген бүгінгідей өліара шақта Қазыбек Исаның үнін бар қазақтың баласы қолдайтынына нық сенімдімін.

Шынтуайтына келгенде, Мемлекеттік тіл туралы заңымыз бар ма жоқ па, жұмыс істей ме, істемей ме оны ешкім білмейді. Ал енді Алматы, Нұр-Сұлтан секілді ірі қалалдардың көшелеріне шықсаңыз, көптеген мекемелердің атауы ағылшынша жазылып кетті. Бұл тіл туралы заңды ешкім елемейтіндігінің көрінісі. Одан қала берді мемлекеттік мекемелердің қайсыбірінің есігін қақсаңыз да, орысша сайрап шыға келеді. Мұның барлығы өз кезегінде қарапайым халықтың наразылығын тудырып отырғаны жасырын емес. Міне, осындай жағдайда Қазыбек Исаның «мемлекеттік қызметкерлер мемлекеттік тілді білуге міндетті болуы керек» деген талабы өте орынды. Тіпті бұл – кезек күттірмейтін мәселе. Қажеттілік тудырмасақ, мемлекеттік қызметте жүрген шен-шекпенділерді міндеттейтін заң болмаса, біз бұл мәселені шеше алмаймыз. Сондықтан да, Қазыбек Исаның заң жүзінде мемлекеттік тілді мемлекеттік қызметкерлерден талап етуі – уақыт талабы, – деді жазушы.

Қазыбек Иса: Мемлекеттік тілдің мәртебесін жеке дара анықтайтын уақыт жетті (видео)

3 ПІКІРЛЕР

  1. Талап өте орынды. Бұл осыдан отыз жыл бұрын қабылдануға тиіс заң еді. Тіл туралы заңда өзгеріс болуы керек. Ата Заңда айқын көрсетілсін. «Ештен де кеш жақсы» деген қазақ бабам. Осы заң қабылданған күн ең маңызды күн болып қалары даусыз. Қазаққа қазақ болатын кез келді.

  2. Ағамның айтқаны 100 пайыз дұрыс!!! Мемлекеттік қызметте отыра мемлекеттік тілді білмейтін адам, қазақтың ашу-ызасын тудыруда!!!

  3. Президентті сайлағанда қазақ тілінен емтихан аламыз. Ал басқаларынан неге емтихан алмасқа? Тілді білмесе қызметке қабылдамау керек.

Пікір жазу

Пікіріңізді енгізіңіз!
мұнда сіздің атыңызды енгізіңіз