ӨЗГЕРГЕН ӨҢІР - СҮЙСІНГЕН КӨҢІЛ НЕМЕСЕ ШЫРАЙЛЫ ШЫМКЕНТТІҢ РУХАНИ КЕЛБЕТІ
1. Барлығы да денсаулыққа байланысты
Шымкент қаласы. 6 қараша 2011 жыл, дәлірек айтсам, Құрбан айт күні, таңғы намаз кезі. Тура шетелдің көп сериялы киносындағыдай астаң – кестең сапырылыс, жан дүниемде қопарылыс, мүмкін күйзеліс... Қаланың мейрамханасында кенже кызым Маржанның тұрмысқа шығу тойы өтіп жатқан. Үш айдан аса әлімді құртып діңкелеткен, асқазанымнан басталып сол көкірегімді иығыма дейін шыдатпай ауыртқан, қайта-қайта ұстаған шаншу той соңына таман мүлдем мазамды кетіріп, бажам Шыңғыстың үйіне қайтуыма тура келді. Қабылдаған емнен ешбір көмек болмады. Не жата алмаймын, не отыра алмаймын тікемнен тік тұрмын, тұла бойымды қысқан суық тер киімімнің сыртына шықты. Тойдан келген ағайын-туысқандардың мазасын алғым келмейді, бірақ мүмкін болмай қалды. Құлап қалмау үшін басымды жұбайым Қатираның иығына сүйей сала, жайлап, сыбырлап «жедел жәрдем шақырыңдар» дедім. Жедел жәрдем жедел жетті, өмір мен өлім айқасқа түскендей, жан шыдатпас шаншуға көкірегімді салдыр-күлдір еткізген шек-қарынды аузыма тақаған жөтел қосылды. Осыншалықты қиналыстан пайда болған қорқынышты Алланың құдіреті күшті – ғой көмекке келген дәрігерлер жастау келіншек пен ер жігіттің мейірімді сөзі, нұрлы жүзі, күйзелісімді дәл түсінген ыстық ықыластары қорқынышымды көмескілендіріп, үмітімді күшейткендей болды. Жылдам тексеріп, еппен қимылдап, тез-тез ем-домын жасады, сөйлеп жатырмын, мен сұраймын, олар жауап беріп жатыр. Бірден ауруымды айтты «Сіздікі инфаркт, қимылдамай жатыңыз» деп айтқан сөздерінде толқудан гөрі салмақтылық басым, қимылдары көз сүйсінтеді, ішің жылиды. Дегенмен асқынған ауру көнер емес, сонда да шарасыздық танытпай барын салып күресетіндей «Аға, сізге морфий саламыз, қорықпаңыз, ұшқандай боласыз» деді, бірақ оған да селт етпедім. Қолындағы ұялы телефонымен ауруханаға хабарлады: «жедел ота жасау қажет, дайындалыңыздар» деп. Не керек ота жасайтын орынға дейін жылдам жеткізілдім, іркіліс болмады. Тіпті, оташы – дәрігер де (аты Әлімбек пе, ұмыттым) көмекшілерінің бірі «аға» десе, бірі «көке» деп жылы сөздерімен «сәл шыдаңыз, сәл шыдаңыз» деп майда қоңыр желпиді. Кейін білдім, мен жатқан аурухана ашылғанына екі – үш жыл болған облыстық кардиология орталығы екен. Дәрігерлердің емделушіге қарым-қатынас мәдениеті қуантты. Екіншіден, Қазақ елі тәуелсіздік алғалы көптеген игі істердің атқарылып жатқанын оқып – білсем де, медицина саласының алға басқандығының осылайша нақты куәсі болдым. Жүректегі ақауды теледидардан көріп жатасыз, ота жасаудың әлемдегі ең озық үлгісін, яғни құралдарын Шымкент қаласында пайдаланып, өз мамандарымыз жетік меңгерген. Ауруханадан шыққасын Алматы қаласындағы біраз кардиологтармен жолықтым, тіпті қазір Тараз қаласында тұратын Кеңес Одағы кезінде кардиологтар арасында «алтын қол дәрігер» аталған С.Жошиевте Шымкенттегі кардиология орталығы мен оның дәрігерлері туралы өте жақсы пікірде екен. Кейде ойлаймын, Алла тағала пендесін сынаққа салып қиналтса да, рахымы түсіп ажалыңа арашашы болғысы келсе, жақсы адамдарды жанашыр, көмекші – дәнекер, қиындық азабынан кұтылуға себепші етіп қоятын тәрізді. Ауру азабынан төсекке таңылып, бес күн бойы жансақтау бөлімінде жалғыз өзім жатқанда, ой түбіне жете алмайсың, әсіресе жанымда жүрген «жақсылар» туралы жазған еңбектерімнің кітап болып жарыққа шыққанын көре алмай кетем бе деп қорықтым. Олар – анам Пітей Әбдіқызы, он жылдай «аурушаң» атанған қара домалақ бала мені емдеуден жалықпаған, «сенімді серік» еткізген ауылдың қарапайым дәрігері Сәбила Мырзахметова, студенттік шақтан күні бүгінге дейін рухани ұстазым болып жүрген академик Мекемтас Мырзахметұлы, өмірде де, ғылым жолында да бірге жүрген кездерде адалдық танытқан досым, өмірден ерте озған, талантты ғалым, филология ғылымдарының докторы Жұмабай Әбілов еді. Жүректен шыққан шынайы сезімімді қалам күшімен ақ қағаз бетіне түсірген едім, кітап етіп шығару арман күйінде ғана жүр.?!
Шындығын айтсам Сәбила апайдан кейін ерекше сүйіспеншілігімді тудырған осы Шымкенттегі облыстық кардиология бөлімінің дәрігерлері болды. Я... Сәбила апай туралы шығармамды қалай бастап едім, үзінді келтірейін: «Жетінші класта оқып жүргенде тағы да ауру айналдыра бастады, бұл жолы ұзағынан жүрекке әсер еткен ревматизм деген атаумен есепке алындым. Я, кәдімгідей есепке алындым. Кеңес Одағының жақсылығы, ұзақ емделуді қажет ететін ауруды есепке алып көктемде, күзде тексеруден өткізіп, ауруханаға жатқызып, болмаса «үйде ішесің» деп дәрі-дәрмегін тегін арқалатып жіберетін.
Менің бағыма қарай, Созақ ауданының орталығы Шолаққорғанға біздің ауыл жақын болса да, бар-жоғы 25 км-дей, «Жартытөбе» совхозының орталығында жиырма бес орындық аурухана бар еді. Аудан орталығына көп жүгіре бермейміз, себебі бас дәрігері – Сәбила Мырзахметова көпшіліктің көңілінен шыққан, біліктілігімен ел аузына іліккен маман – терапевт еді.
Сәл суықтасам тамағым ісіп, ауырады, аяғым сырқырайды, әсіресе жүрегім шаншып, сыздайды, көбінесе күн бұлттанғанда көңілсіздік басады.
Сәбила апайдың бір қасиеті ауруға дауыс көтермейді, аяушылық білдіріп тұрғанын да байқатпайды, егжей-тегжейлі тексеріп майда дауыс, жылы лебізбен сырқатының жай-күйін айтады. Аса жайдары болмаса да, орнықты айтқан сөзіне ауруыңнан жеңілденгендей, тыншып қаласың. Бас дәрігердің аға медбикесі шешемнің сіңлісі – Мүкен Әбдіқызы, біздің елде әпкесін «қызапа» дейді, яғни нағашы қызапам. Екеуі апалы-сіңлідей қаз-қатар жүргенде, олардың жүрісіне, езу тарта күлісіне аққудай шаң жұқтырмай тап-таза ақ халатты абзал жандардың жүректері мейірімге тола ықыластарына кім-кімде сүйсіне қарайтынын байқайтынмын. Адам деген асығыс, ненің болса да тез нәтижесін көргісі келеді, ал маман асықпайды, ненің болса да оң нәтижесіне жеткісі келеді. Сәбила апайды еске алсам жақсы адам деген ойға келсем де, жақсы дәрігердің теңеуін таппай жүргем, бірде қолыма Кейкаустың «Кабуснама» кітабы түсті, төмендегі жолдарды оқығанда іздегенімді тапқандай болдым: «Нағыз дәрігер аурулар жататын жерде көп болып, араласып, зерттеу нәтижесінде әртүрлі кеселдердің ерекшелігін жете пайымдап аурудың өту жағдайларын жақсы білгені жөн. Сонда ғана ол аурудың түрін (диагнозын) дұрыс қояды. Кеселдің шығу төркіні мен диагнозын білсе, оны емдеу де оңай болады. Дәрігердің кеселдің аты-жөнін білмей емдеуі – үлкен надандық. Бірлі-жарым емдеумен қорытынды шығарып, бұл кеселдің емін мен білемін деме. Ауруды емдегенде Бахараттың өсиетнамасын ойыңнан шығарма. Емдеуде ықтияттық шартын қолдан шығарып алсаң, керісінше жанға жәбір жасаған боласың. «Надан молда иманыңды алады, надан тәуіп жаныңды алады» деген мақал бар. Дәрігердің ділі мен ой-өрісі және ішкі жан-дүниесі мен сыртқы дүниесі де таза болуы шарт. Әрдайым хош иісті әтірлерді пайдаланып жүрсін. Ауру алдына барғанда ашық жарқын, жылы жүзбен күле сөйлеп, жақсы сөз айту керек. Жақсы сөз жанға қуат беріп, аурудың сауығуына жәрдемі тиеді» дейді.
Ауруханадан шығарда бас дәрігер С.Бекжігітов мырзаның «Сізді қазақтың белгілі ғалымы ретінде біздің ұжым ғана емес, облыс әкімінің орынбасары Әли Бектаев мырза да қал-жағдайыңызды үнемі сұрап, біліп бақылауында ұстап отырды» деген сөзі жүрекке жылы тиіп, Хакім Абай атаның шарапатын көпшіліктен көп көретініме іштей риза болсам да, әсіресе мені қуантқаны жүректен жапа шеккен мыңдаған адамдардың, шетелге емделуге қалтасы көтермейтін қалың қауымның шипа болар орталығы Шымкент қаласында орнауы айрықша сүйсінтті. Көпке керегі осы емес пе!?!
2. Шымкент төрінде – Хакім Абай.
Абайдың туған күні Алматыда, ақын ескерткішінің алдында жылда тойланады. Жүз қаралы адам ғана жиналады, қолында алдын-ала жазылған сценарий бар «пысық жігіт» елпең қағып жүреді, кейде тәртіпті арқалы ақындар «бұзып жібереді», бәрібір баяғы қалыпқа түседі. Сол аздың ішінен де көрініп қалғысы келетіндер шығады, сол күні олар Абай атында «мынадай бар, мынадай бар» деп жағы талмай қайталайды...
Абайдың тойы ма, әлде жай адамның тойы ма, әйтеуір не айтса да тойда жараса береді деп, «өйдә» мақтанамыз, ешкімге де дес бермейміз ..
Тойды науқаншылдыққа айналдырамыз, Абайға науқаншылдық жүрмейді. Науқаншылдық «Уралап» ұрандатқан алдамшы жалаң көрініс, сондықтан данышпан Абайдың 150 жылдық тойында сөйлеген Қазақстан Республикасының Президенті Нұрсұлтан Назарбаев «Абай туралы сөз» баяндамасында «Абай жылын өткізген жақсы. Абай жырын жаттаған дұрыс. Ал оның терең ойы мен өжет пікірі тек айта жүрер әңгіме болмай, күнбе-күнгі тірлігімізге бір кірпіш боп қаланып жататын нақты іске айналса, тіптен құба-құп. Ол үйреткен тағылым мен ол көксеген мұраттарды шын қастерлей білгендігіміздің, әділет пен абзалдық ұстазы алдындағы перзенттік қарыздарымызды терең түсініп, өтей алғандығымыздың бірден-бір белгісі де осы болып табылады» деген болатын. Сірә, облыс әкімі Асқар Мырзахметов Қазақстан Республикасының Президенті Н.Назарбаевтың әрбір сөзін жіті қадағалап, терең талдап, алдағы атқарар ісінде тікелей басшылыққа алатынын ешкім айтпай-ақ, облыс жеріне, Шымкент қаласына аттап басқаннан бірден аңғарады.
Ол облыс әкімі болып жұмысқа кірісе сала, облыс жұртшылығына арнаған алғашқы сөзін, ой-пікірін, алға қойған мақсатын қасиетті Түркістанда жария етті. Елбасы былайша ой қорытқан еді: «Әрбір халық, әрбір тәуелсіз мемлекет өзінің рухани орталығын нақтылап алуы керек. Қазақстанның рухани орталығы Түркістан болады. Жалпы бұл жалғыз қазақтың ғана емес, бүкіл түркі дүниесінің руханият орны болып табылады». Сөзіміздің дәлелі ретінде қазақ пен түрік ақынының өлең жолдарын оқып көрейік:
Мағжан Жұмабаев
Шер батса кім іздемес туған елін?
Тұлпар да көксемей ме туған жерін,
Арқаның ардагері қалың алаш,
Тұран да, біле білсең,
Сенің жерің!
Кемал Федайы Жошқұнер, түрік ақыны:
Жол беріңдер белден асайын, Түркістан!
Шәйіттік тәжін киейін, Түркістан!
Тамырымда соққан, Түркістан!
Келмейді қолымнан басқа іс, Түркістан!
Жалғыз сені сөйлейді тілім, Түркістан!
Тәуелсіздік алған Қазақстан мемлекетін, қазақ ұлтын әлемге таныту үшін Елбасымыз аса жауапты, аса ізгілікті ісін қазақтың данасы Абай Құнанбайұлының 150 жылдығын және түрік дүниесінің орталығы қасиетті Түркістан шаһарының 1500 жылдық тойын дүниежүзілік деңгейде атап өтуден бастағаны бәрімізге аян. Осы үрдісті тамаша жалғастырған облыс әкімінің өзіміз куә болған тағы да бір ісіне тоқталғымыз келеді.
2009 жылдың жаз айының соңына таман Оңтүстік Қазақстан облысының әкімі Асқар Мырзахметовтың тікелей тапсыруымен Шымкент қаласындағы Абай атындағы саябақтан музей ашу қолға алынды. Алматыдан белгілі дизайнер Аманжол Найманбай мен осы жолдың авторын Оңтүстік Қазақстан облысы әкімінің орынбасары Әли Бектаев «музейді қалай, қай жерде жасасаң дұрыс болады?» деп ақылдасуға, пікір алысуға шақырды. Соңынан облыс әкімі мен оның орынбасары айтқан ұсыныстарымыз көңілінен шық-
қасын, «сіздер орындаңыздар» деп тапсырыс берді. Мен бірден музейді «Хакім Абай музейі» деп атау туралы ұсыныс жасадым. Мұндағы ойым Семейдегі Абай музейінен ерекшелендіру емес, бірақ сол музейдің тәжірибесін негіз ете отырып, заман талабына сай жаңаша сипатта, жаңа мәнде өрнектеу еді. Екіншіден, біз 2008 жылдың қыркүйегінен бастап Абай атындағы Қазақ ұлттық педагогикалық университетінің ректоры Серік Пірәлиевтің бастамасымен, ұстазым, белгілі абайтанушы Мекемтас Мырзахметұлы екеуміз Қазақстанда тұңғыш рет «Абайтану» ғылыми-зерттеу орталығын ашып, іске кіріскен едік. Бұл ғылыми-зерттеу орталығының басты мақсаты етіп, бүкіл еліміздің мектептерінде, жоғары оқу орындары үшін жаңа сипатта оқу бағдарламасын, оқулығын хрестоматиясын жасап, «Абайтану» деген пән енгізу еді. Бұл пәннің негізі етіп абайтану-
дың көшбасшысы М.Әуезовтың жүзеге асыра алмай кеткен ой-арманын Мекемтас ағай 50 жылдан аса өмірін арнап келе жатқан, Абайдың Шығыс құндылықтарын негізге ала отырып, адамзат баласын өркениетке, прогреске бастайтын Хакім Абай даналығын оқыту еді.
Шымкент қаласындағы Абай саябағындағы Абайдың туған күнін атап өткен іс-шара да басқа еліміздің қалаларындағыдай шарттылықтан ада, көпшілікті күштеп шақырудан гөрі үгіт-насихатпен, ұйымдастырушылық қабілетпен шақырылғаны облыс әкімшілігінің Абайды насихаттауға шындап кіріскендігі, ескіден қалған «науқаншылықтан» ада екені бірден байқалады. Көпшіліктің көп келетін парктің аты – «Абай», алғаш аттап кіреберісте толғаныста отырған Абай атамыздың ескерткіші, одан жоғары көк шөппен, жайқалған гүлмен көмкерілген төрге қарай жүрсеңіз, «Хакім Абай» мұражайы тұр, одан әрі өтсеңіз Абайдың талантты ұлы Тұрағұлға арналған ескерткіш белгі бірден көзге ұрып тұр. Түрлі-түрлі үгіт-насихат жұмыстары қолға алынғандығын растағандай.
Абай саябағында қандай іс-шара өтсе де, зиялы қауым, ақын-жазушылар, оқушы, студенттер, тіпті шенеуніктер де Абайдың шынайы оқырмандары көптеп келетін тәрізді. Біз көрген Абайға арналған іс-шаралар жаттанды сценарий бойынша жүргізіліп, аз ғана адамға ақындардың тақырыбын мүлде бөлек өлеңдерін оқумен шектелетін. Әйтеуір даталы күнді атап өттік қой деген көңіл жықпас бір нәрсе көретінбіз. Ал бұлардың жиынында Абайдың мұрасы да, өнегесі де сөз болады, қара сөзі мәнерлеп оқылады, әндері шырқалды, жан-жақты қамтылған кітап көрмесі ашылады музейді аралатады. Абай туралы көркем және деректі фильмдерді тамашалаумен қорытындыланып, әйтеуір басты мақсат Абайды білсем деп келген көпшілік сұранысын қанағаттандыруға бағытталған.
Қазақстанда қазақэтнодизайынының негізін қалаушылардың бірі, атақты дизайнер А.Найманбайұлы «Хакім Абай» мұражайын Елбасыға өзі таныстырды. Ол кісінің «музей шағын болса да, іші мәнді екен, келген қонаққа ұялмай көрсететін әрі көпшілікке тағылымы мол музей екен» деген ризашылық лебізін құлағымен есітті. Осы тарихи оқиғаны ерекше құлшыныспен айта отырып « менімше, «Хакім Абай» мұражайының жақсы шығуына біз ғана үлес қосқан жоқпыз, Асқар Исабекұлының Абайға жеке өзінің қызығушылығы, мұражайға отбасын ертіп те қайта-қайта келіп тұруы, орынбасары Әли Бектаевтың ақынжандылығы да (кейіннен,тұңғыш өлеңдер жинағын кітап етіп шығарыпты) ықпал етті» деуі көкейге қонады. Күннен-күнге гүлденіп келе жатқан Шымқаланың рухани жағынан да өнегелі шаһарға айналғанына «Отан Ана» «Тәуелсіздік» саябағы мен «Ел бірлігі» монументін, «Мемлекеттік рәміздер» алаңын, «Шәмші әлемі» гүлзарын, «Жұлдыздар аллеясын», ең соңғы сәулет үлгісімен салынған «Оңтүстік – Цирк» ғимаратын көргенде, шырайлы қала теңеуінің дәл айтылғанына күмәніңіз қалмайды.
Жабал Шойынбет,
Абай атындағы ҚазҰПУ
«Абайтану» ғылым-зерттеу
орталығы директоры,
«Хакім Абай» қоғамдық
қорының директоры