"Ақ жол-жастар" қанаты бес жылдық белесті бағындырды

 «Ақ жол» ҚДП, Маңғыстау облыстық әкімдігі мен Облыстық жастар ресурстық орталығының қолдауымен, Ақтау қаласындағы «Ханшаһар» салтанат сарайында, Қазақстанның «Ақ жол» Демократиялық Партиясы Маңғыстау облыстық филиалы жанындағы «Ақ жол-жастар» жастар қанаты 5 жылдық мерекесіне орай мерекелік шарасы өтті. Шараға, Партияның Нұр-Сұлтан қаласымен Ақтөбе, Қарағанды, Қызылорда, Жамбыл, Павлодар облыстық филиалдарының төрағалары мен белсенді жастары, өңірдің зиялы-қауым өкілдері, жастар ұйымдары мен оқу орындарының ұстаздары мен ата-аналар және "Ақ жол-жастар" жастар қанатының мүшелері қатысты. Шара алдымен «Ақ жол» жастар театры қоржынындағы «Қыршын», «Елім деп өткен – Ер Жалау», «Махаббат мұңы», «Жұлынқұрт», «Ананың ақ сүті» атты спектаклдердің сүбелі сахналарынан үзінділер сахналанып, Партия төрағасы Азат Тұрлыбекұлының бейнеқұттықтауымен басталды. Сондай-ақ, «Ақ жол-жастар» жастар қанатының 5 жыл ішінде атқарған жұмыстары туралы арнайы репортаж көрсетіліп, «Мен қазақпын» мега жобасының жеңімпазы, әнші-термеші Оспан Құлсымақ кешті Сәттіғұлдың термесімен тербеді. Кеш барысында, Партия тұғырнамасында көрсетілген мақсат-міндеттерді орындауда салмақты үлес қосып, Алаш арыстарын ардақтау жолындағы жұмыстарды жүйелі жүргізіп, Еліміздің қоғамдық-саяси іс-шаралары мен жастар саясатын дамытуға үлес қосқан жігерлі жастарды және жастар қанатының атқарған жұмыстарына әрдайым тілеулес болған ата-аналар мен қолдау танытқан мекемелерге Партия төрағасы Азат Тұрлыбекұлының алғыс хатын «Ақ жол» ҚДП Орталық Кеңесінің хатшысы Асылхан Төлеббергенұлы табыстады. Сонымен қатар, Өңірде мемлекеттік жастар саясатының дамуына қосқан «Ақ жол-жастар» жастар қанатының мүшелері, Маңғыстау облысының әкімі С.Тұрымовтың, Ішкі саясат басқарма басшысы Е.Күмісқалиевтың және Облыстық жастар ресурстық орталығы директоры А.Фазылбекұлының алғыс хатымен марапатталды.   "Ақ жол-жастар" қанатының баспасөз қызметі qazaquni.kz