Жаңаөзенде төтенше жағдай жарияланды

Жаңаөзендегі оқиға туралы дәйекті-дәйексіз пікірлер көп айтылуда. Бейресми ақпарат көздеріне сүйенсек, 16 желтоқсандағы оқиғада 70-тен астам қаза тапқан. Ал Қазақстан бас прокуратурасының соңғы мәлімдемесіне қарағанда, 14 адам көз жұмған. Қазақстан Президенті Нұрсұлтан Назарбаев құқық қорғау орындары қызметкерлерінің ісі заңға сай болғанын айтады. «Полицейлер қызметтік парыздарын мүлтіксіз атқарып, заң рұқсат еткен өкілеттері аясында әрекет етті» деп мәлімдеді ол сенбі күні өткен Қауіпсіздік кеңесі мәжілісінде. Қазақстан Президенті Жаңаөзенде 2011 жылдың 17 желтоқсанынан 2012 жылдың 5 қаңтарына дейін төтенше жағдай жариялаған қаулыға қол қойды.