Қосымша білім беруде ашықтық қажет

Балаларға қосымша білім берудің бірыңғай веб-порталын әзірлеу қажет. Бұл туралы ҚР Премьер-Министрінің орынбасары Ералы Тоғжанов айтты.

       «Білім және ғылым министрлігімен бірге балаларға қосымша білім берудің бірыңғай веб-порталын әзірлеу мәселесін де пысықтау қажет деп ойлаймын. Бірыңғай веб-портал секциялар мен үйірмелерге баратын балалардың статистикасын жүргізуге, мемлекеттік қаражаттың жұмсалуын қадағалауға және ата-аналар үшін тиісті секцияларға өтінім беруге өте ыңғайлы деп есептеймін» - деді Ералы Тоғжанов. Оның айтуынша бұл жерде де мәселе аз емес. Бұған кей жерлерде азаматтардың қарсы шығып жатқаны да жасырын емес. Қалай болғанда да веб-портал өте ыңғайлы, ашықтықты барынша қамтамасыз етеді. Балалардың қай жерде шұғылданып жатқанын, бапкердің біліктілігі туралы ақпараттарды алуға болады. «Берілген қаржының нақты, нәтижелі ұйымдастырылуының өзі тікелей алдымызда тұрған міндет», - деді бұған қоса вице-премьер Мәдениет және спорт министрлігінің алқа отырысында. Осы ретте Ералы Тоғжанов Мәдениет және спорт министрлігіне мемлекеттік спорттық тапсырысты Білім және ғылым министрлігінің қосымша білім беру жүйесімен ықпалдастыруды тапсырды. «Оңай жұмыс емес. Бірақ, осыны ұйымдастыруымыз керек. Әрбір бала қайда баратынын білуі керек. Бала үйірмеге бүгін барғанымен бір айдан кейін айнып, басқа жерге барамын деуі

мүмкін. Жарты жылдан кейін ойы тағы өзгеруі мүмкін. Негізгі мақсат бөлінетін ақшаның баланың соңында жүруі тиіс. Оның есебі болуы қажет»,- деді Үкімет басшысының орынбасары.