Қазақстанда жалақының шекті мөлшері белгіленеді

Қазақстанда барлық салалар бойынша жалақының шекті мөлшерін белгілеу мәселесі қарастырылып жатыр. Министрдің айтуынша, жалақы мәселесіне қатысты бірқатар елдердің тәжірибелері сараланған.Бұл туралы бүгін Парламент Мәжілісінде "Кәсіптік одақтар туралы" заң жобасының таныстырылымы барысында Еңбек және халықты әлеуметтік қорғау министрі Тамара Дүйсенова мәлім етті. Атап айтқанда, АҚШ, Ұлыбритания, Жапония елдерінде белгілі бір біліктіліктер бойынша олармен атқарылатын жұмыстың ауқымы, сапасы және жағдайына қатысты жалақының шекті көлемі белгіленеді. "Мұндай жағдайда жұмысшылардың еңбек ақысын төлеу бойынша бір-біріне жақын біліктіліктер бойынша айтарлықтай теңсіздіктер туындамайтын болады", - дейді Т. Дүйсенова. Оның сөзіне қарағанда, "ҚазМұнайГаз" ұлттық компаниясында дәл осындай жүйе әзірленген, қазіргі уақытта бұны барлық мұнай-газ саласына тарату мәселесі көзделуде. "Бұдан кейінгі кездері осы мәселелерді басқа салалардың кәсіптік одақтарымен бірлесе қарастыру жоспарлануда", - дейді министр.

nur.kz