Қытайлық компания басшысы Сапарбаевтан сөз естіді

Ақтөбедегі «СНПС-Ақтөбемұнайгаз» компаниясының бас директоры жалақыны 10 пайызға көтеру керек деген ұсынысқа ойланып қалды. Бұл туралы NUR.KZ тілшісі хабарлайды.

Сапарбаевтың өңірдегі кезекті кездесуі «СНПС-Ақтөбемұнайгаз» АҚ-да өтті. Компанияның бас директоры мен қызметкерлері, бұрын соңды жұмысшылармен кездесу өткізіп көрмеген аумақтың кәсіподақ басшысы да жиында болды. Облыс әкімі мұнайшылардың жалақысын 10 пайызға көтеру керектігін нұқып көрсетті, жолын табуды тапсырды. Бірақ бұл ұсыныс Ван Цзюньжанья мырзаның оң жамбасына оңай тиген жоқ. Аймақ басшысына ештеңе айта алған жоқ. Ал, осы «жалақы көтеріле ме?» деген сұрақты қойған қызметкеріне «ақылға қонымсыз сауал» деп күліп жауап берді. «Біз 18 жылдан бері жұмыс жасап келеміз. Осы жыл ішінде өңірді дамытуға 13 млрд, теңгедей қаржы бөлдік. Ал, өткен жылы 600 млн теңгеден аса қаржы аударылды. Жергілікті әкімшілік тарапынан да көп қолдау көріп жүрміз, ол үшін рахмет. Осы жылы жағдай қиын. 2006-2007 жылдары да оңай болған жоқ. Бірақ, қазіргі жағдай басқаша. Мұнай бағасы түскен дағдарыс кезінде жалақы көтеру туралы ұсыныс ақылға қонымсыз-ау деп ойлаймын. Тек мұнай бағасы 60 пайызға көтерілсе ойлануға болады»,- деп әрең күлген Ван Цзюньжанья жауабы аймақ басшысына ұнаған жоқ. Іле жауапқа жауап қатты, қытай компаниясын ойлантып тастады. «Жақын арада мұнай бағасы 60 пайыз болмайды, 40 пайызға көтерілсе қалай?! Елбасының тапсырмасы бар «жұмысшылар жалақысын көтеру керек» деген. Осыны ұмытпау керек. Талдама жасап, керек емес шығындарды қысқартып, жұмысшылардың жағдайын ойлаған дұрыс. Мұнай бағасы төмен деп өндіріс көлемін азайтпаған жөн. Инвестиция тартуды ойлаңыздар. Компанияда 220 жұмысшы қысқарған. Бұл дұрыс емес. Әр адамның тағдырын қарау керек, олардың орнына өздеріңді қойыңдар, отбасын қалай асырайды? Елбасы тапсырмасын есте ұстаған жөн», – деген Сапарбаевтың  өктем ұсыныстары қытайлық компания басшысының мысын басты. Фото: Максим Токарь Ван Цзюньжанья  «Ол біздің басты міндетіміз» дегеннен басқа ештеңе айта алмады. Кәсіпорын басшылығы облыс әкімдігі мен кәсіподақтар бірлестігі  арасында өткен меморандумға қол қойды. Онда ұжымдық келісім шарттың орындалуы, жұмысшылар үшін әлеуметтік кепілдемелерді одан әрі қамтамасыз ету, еңбек қатынасын реттеу және жалақыны 10 пайызға көтеру туралы ұсыныс жазылған. «СНПС-Ақтөбемұнайгаз» АҚ аймақтағы 67 пайыз мұнай және 88 пайыз ғаз өндіретін алпауыт компания болып саналады. Ондағы қызметкерлердің саны 6,5 мың адамды құрайды. Орташа жалақы 159,7 мың теңге. «Егер мұнай бағасы бұдан әрі түсетін болса жағдай қиындайды. Сондықтан басқа жұмыстарды да қарастыру керек. Мен халықпен кездескенімде олар мұнайшы болып қалғысы келетіндерін айтады. Ешкім мұнайшы болып туған жоқ. Сондықтан ойланыңыздар»,- деді облыс әкімі. Қорытынды сөзінде облыс әкімі өз ұранын айтты. «Лениннің ұранын білесіз дер, ал біздің ұран басқаша. Жұмыс, жұмыс және жұмыс! Жұмыс жасаңыздар!», - деді Сапарбаев.