Анель Пимичева: Түріміз басқа болғанмен, тіліміз басқа болмауы керек

Шілденің 1-күні Нұр-Сұлтан қаласындағы Достық үйінде Қазақстан халқы Ассамблеясының ұйымдастыруымен және ҚР Ақпарат және қоғамдық даму министрлігінің қолдауымен «Ұлы Даланың ұлтаралық тілі» атты республикалық онлайн конференциясы өтті.

Бұл туралы «Қазақ үні» ақпарат агенттігі хабарлайды.

Аталмыш шара ҚХА-ның 25 жылдығына арналған Қазақстан халқы Ассамблеясының «Тұңғыш Президент жолымен» халық экспедициясы» жобасын жалғастырып, ҚР Тұңғыш Президенті – Елбасы Н.Ә.Назарбаевтың Тәуелсіз Қазақстанның құрылуы жолындағы ерен еңбегін айшықтауға бағытталған.

Сонымен қатар, Мемлекет басшысы Қ.К.Тоқаевтың республикалық «Ана тілі» газетінде жарияланған «Қазақ халқының тағдыры тарих таразысында тұр» атты мақаласын талқылау және «Қазақ тілін жақсы білетін өзге ұлт өкілдерін қолдау» тапсырмасын жүзеге асыруды көздейді.

Онлайн конференцияға ҚХА Төрағасының орынбасары – Хатшылық меңгерушісі Жансейіт Түймебаев, ҚР Ақпарат және қоғамдық даму вице-министрі Марат Әзілханов, ҚР Ақпарат және қоғамдық даму министрінің кеңесшісі Бибігүл Жексенбай, ҚР Президентінің жанындағы Ұлттық қоғамдық сенім кеңесінің мүшесі Қазыбек Иса, филология мен лингвистика саласының сарапшылары, ҚХА мүшелері, мемлекеттік тілді меңгерген өзге ұлт өкілдері мен этномәдени бірлестіктердің, жастар ұйымының өкілдері қатысты.

Конференция жұмысына қатысушылар ZOOM конференц-платформасы және ҚХА-ның Фэйсбук желісіндегі ресми парақшасында көрсетілген тікелей эфир арқылы онлайн режимде қосылды.

Жиын барысында сөз алған биылғы мектеп түлегі, украин этносының өкілі Анель ПИМИЧЕВА мемлекеттік тілдің дамуына қатысты ойларымен бөлісті.

- Сөзімді бастамас бұрын, сіздерге басымнан өткен бір қызық оқиғаны айтайын.

1 жыл бұрын Қызылорда қаласында өткен экологиялық форум қатысқан едім. «Жиналғандар өздерін қазақ тілінде ианстыруы керек»  деген талап болды. Сол уақытта ту сыртымнан «Біздің арамызда бір кісіге қиын болатын болды»  деген мысқылды дауыс шықты. Әрине, сол топтың ішіндегі жалғыз өзге ұлт өкілі мен едім,  оның үстіне оңтүстікке солтүстік аймақтан делегат ретінде барып отырмын.

Әлгі сөзге намыстанғаным соншалық, жалт бұрылып «өтініш, адамды сырт-келбетіне қарап бағаламаңызшы» деп сөз бастадым. Яғни, қазіргі қоғам түрі басқаның тілі басқа емес екенін түсінуі керек.

Бұнымен не айтқым келеді?

Құдайға шүкір, елімізде үш тіл қоса дамып келе жатыр, дегенмен мемлекеттік тіліміздің кейбір азаматтардың жүрегіндегі соңғы орынға ие болып келе жатқаны алаңдатады. Неге біздің мемлекеттімізде ағылшын, қытай тілін білетіндерге таңғалмайды, ал осы мемлекетте туған өзге ұлт өкілдері қазақша сөйлегенге соншалықты таңғалады?

Біз осы әдеттен арылып, бір үйдің бір тілді, бір мақсатқа жұмылған тату баласына айналуымыз қажет, - деді ол.

qazaquni.kz