Қызылқұмда көптен күткен мешiт ашылды

Өткен жұмада Қызылқұм ауыл­дық округiнiң орталығында жаңа мешiт ашылды. Қызылқұм кеңшарының iргетасын қалап, мемлекеттiк жоспарды жылда артығымен орындап, халықтың тұрмыстық-әлеуметтiк әлеуетiн көтерген, шаруашылықты ұзақ жыл басқарған Батырбай Сей­данұлының аманаты орындалды. Ол қызылқұмдықтарға спорт ке­шенiн, мешiт пен медресе са­лып берудi мұрат еткен азамат едi. Өкiнiштiсi мешiттiң iргетасы құйылып бiткен кезде Батекең өмiрден озды. Басталған мешiт құрылысы аяқталмай қалды. Араға бiрнеше жыл салып оның бауырлары мен перзенттерi құ­рылысты қолға алып, мешiттi Батекең жобалағандай етiп бi­тiрдi. Мешiт Батекеңнiң анасы­ның құрметiне “Дiлдаш ана” мешiтi аталды. Мешiттiң ашылу салтанатына республиканың әр тарапынан қонақтар келiп қатысты. ОҚО орталық мешiттiң найб-имамы аруақтарға және Б.Сейданұлы­ның рухына бағыштап құран оқыды. Алланың жердегi имандылық үйi – мешiттiң ашылу құрметiне арналған салтанатты жиынды Болат Ермекбаев ақсақал бас­қарды. Мешiт құрылысына қар­жылай қолдау көрсеткен Марат қажы Сұлеев көпшiлiктi мешiттiң ашылуымен құттықтап, иман­дылыққа шақырды. Аудандық мәслихаттың хатшысы Т.Бердi­беков, аудандық ардагерлер кеңесiнiң төрағасы Т.Ағманов құттықтау сөз сөйледi. Алматы­лық қонақ Қасқабай Асанов ақ­сақал, Мақтаарал ауданының құрметтi азаматтары Бегiм Се­рiков, Тойым Жұнiсов қариялар қызылқұмдықтарды имандылық үйiмен құттықтап сөйледi. Сонымен қатар,  қызылқұмдық жерлес ақын, республикалық “Жас қазақ үнi” газетiнiң бас редакторы, Халықаралық Алаш сыйлығының лауреаты  Қазыбек Исаның құттықтау хаты оқылды. ОҚО орталық ме­шiттiң найб-имамы Б. Қым­батов “Дiлдаш ана” мешiтiнiң имамы молда Битас Орынбаевқа “құран кәрiм” кiтабы мен мешiттiң төл­құжатын тапсырды. Кеңшардың бұрынғы бас агрономы, ардагер Сапарәлi Асанханов, алматылық қонақ Қасқабай Асанов Б.Сей­данұлының шаруашылыққа сi­ңiр­ген өлшеусiз еңбегi мен адами асыл-қасиеттерi жайында тебi­рене әңгiмеледi. Шардаралық қарт ақын Ш.Бекшораев, Алатау батыр ауылынан Жақсылық Орын­басаров және Құрманбек Шәме­товтер мешiт пен Б.Сейданұлына арнаған өлең-жырларын оқыды. Салтанатты жиынның мазмұнды өтуiне ауыл биi Бекайдар Ыс­майлов пен ел ағасы Жұмабай Исымовтардың   үлесi мол бол­ды. Жаңа мешiттiң ашылу салтанатынан кейiн 300-ден аса адам жұма намазға тұрып, ғибадат еттi. Жаңа мешiт қызылқұм­дық­тарға имандылық пен қуаныш сыйлады. Аудандық орталық мешiттiң найб-имамы Нұрмұ­хаммед Нұржанов бастамасымен жұма намазы оқылды. Б.ЕРУБАЙ

АЛЛА ҮЙІ

Биссимиллаһир рахманир рахим!

Ардақты әлеумет! Қадірлі жамағат!

Ордалы оңтүстікте, шежірелі Шардара өңірі, қызыр қонған Қызылдың құмындағы Қызылқұм ауылында Алла үйі-мешіттің ашылуымен құттықтаймын. Осы ауылды құраған ел ағасы Батырбай Сейданұлының өмірінің соңындағы  иманды ісі  осы Ділдаш ана мешітін бастап кетуі еді. Алла иманын салауат етіп, жанын жәннатта етіп, пейіште нұрын шалқыта берсін, Батекең мен Ділдаш ананың. «Сен Аллаға қарай бір қадам жүрсең, Алла саған он қадам жүреді» дейді қасиетті хадисте. Осы  өсиетте айтылғандай, Батекеңнің игі ісін жалғастырған  барлық иманды ағайындарға, Асқан бауырымыз бастаған атпал азаматтарға, қол ұшын созған бар жамағатқа Алланың нұры жаусын деп тілеймін! Мешітте жамағат көбейіп, Алланың нұрынан үміт еткендердің ордасына айнала берсін!               Алла үйі Бар адам  бару тиіс бір босаға – Алла үйі мешітті нұрға сана. Батырбайдай батырды – жалғыз ұлды Өнегемен өсірген Ділдаш ана.   Алла десең, жақсылық несіп болар. Намаз сайын рухың өсіп қалар. Алла  нұрын себеді адамзатқа, Қасиетті Мекке мен мешітке бар.     Қоңыратта жайылған көп дүбірі, Байлар – Жандар кең қолтық Көктің ұлы. Батырбай бұл бас болған бар еліне, Мешіт салды Алланың текті құлы.   Батекең лайық жан  дастанға бір, Аманат ағайынға тастан да ауыр. Арқалап алып шықты ауыр жүкті, Азаматтар бастаған Асқан бауыр.   Ел әрдайым еңселі ерін іздер. Жақсыны әркез жамағат, көріңіздер. Қызылқұмда ашылды әсем мешіт, Алла үйіне ағайын, келіңіздер!

                                                                               Құрметпен,     Қазыбек ИСА,

08 маусым 2012 жыл.