Исабеков әлемі Нобель отанында
2024 ж. 11 маусым
1367
0
![Исабеков әлемі Нобель отанында](/uploads/2024/06/6667cf4d50b35_b.jpeg)
Стокгольм қаласында Дулат Исабековтің шығармашылығына арналған әдеби кеш өтті.
Бұл – швед еліндегі қазақ әдебиетін дәріптеген тұңғыш шара. Бұл елде осы уақытқа дейін, тіптен, Орта Азия елдерінің де әдебиетіне арналған кеш өтпеген екен.
Кешке швед жазушылар одағы мүшелері, баспа үйлерінің редакторлары, әдеби сыншылар, театр мамандары, филология факультетінің оқытушылары, елшілік пен түрлі диаспора өкілдері, қазақ қоғамы мен БАҚ өкілдері қатысты.
Шара аясында онлайн режимінде автормен сұхбат жүргізілді, оның өмірі мен шығармашылығы бойынша деректі фильм көрсетілді.
Кеште Д.Исабековтің швед тілінде шыққан "Brännande Sol, Isande Vind, Levande Stäpp" кітабы жөнінде сыншылар пікір айтып, оқырман өз әсерін ортаға салды. Аталған жинаққа жазушының "Гауһар тас", "Өкпек жолаушы", "Біз соғысты көрген жоқпыз" секілді бес хикаяты мен екі әңгімесі енген.
Стокгольмдегі қазақ диаспорасының өкілдері өнер көрсетті.
Кештен кейін ұйымдастырылған фуршет кезінде қонақтардың Дулат Исабековтің туындылары жөніндегі оң пікірлері жалғасын тауып жатты.
Әсіресе, "Өкпек жолаушыдағы" жалғыздық тақырыбы көп қозғалды.
Швед зиялы қауымы Исабековтің пьесаларын өз елінде сахналау, оның шығармаларының желісімен түсірілген фильмдерді қазақ тілінде ағылшынша субтитрмен көрсету,
повестерін жеке-жеке кітапша етіп шығарып, мектептерге тарату бойынша ұсыныстар айтуда. Қазақ әдебиетінің апталығын ұйымдастыру, қазақ-швед әдеби байланысын нығайту жөнінде де идея қозғалды.
Бұған дейін Ресей, Грузия, Корея, Түркия, Болгария, Англия, Австралия елдерін баураған туындылар, ендігі жерде Скандинавия елдерінде де өз бағасын алды.
Алдағы уақытта швед оқырмандарынан талай пікірлер жазылып, Исабеков әлемінен рухани ләззат аларына сенім мол.
Ол пікірлер аударылып, қазақ халқына да жол тартатын болады.
Солардың бірі – танымал сыншы Юкико Дукенің пікірінен үзінді:
"Дулат Исабеков – дәстүр-салтын осы заманға дейін сақтаған тарихи Қазақстанның заманауи өкілі. Ол шабыты мен кейіпкерлерін өз дәуірінен алады.
Исабеков өз шығармаларында тағдыр сынақтарына төзімді қарапайым да ұлы адамдардың бейнесін асқан шеберлікпен сомдайды.
Оның лирикалық прозасындағы қарапайым адамдардың өмірге құштарлығын суреттеуі орыстың ұлы жазушылары Горький мен Гоголь шығармашылығымен астасады".
Жергілікті БАҚ өкілдері кеш жөніндегі материалдарды жариялауда.