Арыс халқының абыз ақсақалы еді

1488
3
Бөлісу:

«Ақ жол» демократиялық партиясы Түркістан облыстық филиалының төрағасы Абзал Салықбаевтың атасы Арыс халқының абыз ақсақалына айналған Әуесхан қажы Салықбаев 91 жасқа қараған шағында фәниден бақиға аттанды. Сырдария мен Арыс өзенін тел емген қабырғалы қалың ел қашан да қазақ бүтіндігі мен бірлігі жолындағы күрестің алғы шебінен табылғаны белгілі. Бұл өңірде Алпамыс пен Қобыландының, Алатау батырдың, олардың ізбасарлары Жаманқара батырлардың тағы да басқа ондаған көсемдер мен шешендердің, билердің, батырлар мен ақындардың іздері сайрап жатыр. Осынау ерлік пен елдіктің сабақтастығы бүгінге дейін үзілмей келе жатқаны арыстықтар үлкен мақтаныш етеді. Арыстан шыққан бес бірдей Социалистік Еңбек Ерінің бірі Әуесхан Салықбаев сол ерлік дәстүрінің бірден бір үлгісі екені даусыз.

Ә.Салықбаев 1929 жылдың 20 мамырында Арыс қаласында дүниеге келген. 1944 жылы 20 мамырда 15 жасында Арыс стансасына қатардағы теміржолшы болып жұмысқа орналасты. Қызметтің барлық баспалдақтарынан өтті. Қатардағы вагон нөмірлеушіден Шымкент темір жол бөлімшесінің бастығына дейін жетті. Қазақстан Компартиясы Орталық комитетінің қаулысымен Қазақ ССР-нің Алтын кітабына енгізілді. 1959 жылы Қазақ КСР Жоғары Советіне депутат болып сайланды. Озат теміржолшы, еңбек ардагері. 1966 жылы оған Социалистік Еңбек Ері атағы беріліп, кеудесіне «Алтын жұлдыз» медалін қадады.

Арыс стансасы Әуесхан Салықбаев басқарған жылдары жоғары табыстарға жетіп, Одақтағы №1 сұрыптау «фабрикасына» айналды. Әсіресе, арыстықтарды сол кезде ауызсу мәселесі қинады. Әуесхан Салықбаев бастап, көпшілік қолдап, Арыс өзені жағасынан екінші су тарту стансасы салынды. Қаланы жаппай көріктендіру, көгалдандыру жұмысы қызу қолға алынды. Көптеген көпқабатты тұрғын үйлер, балалар бақшалары мен мектептер пайдалануға берілді. Арыс шипажайының іргетасы қаланды.  Ә.Салықбаевтың теміржолшы ғана емес, құрылысшы ретіндегі де қолтаңбасы Арыс қаласының әрбір көшесінде сайрап жатыр десек артық айтқандық емес.

«Ақ жол» партиясының ұжымы Әуесхан Салықбаевтың отбасына, туған-туысқандарына қайғысына ортақтасып көңіл айтады.  Жеті ұл-қыздың әкесі, өз әулетінің ғана емес арыстықтардың атасына айналған теміржол майталманы Әуесхан Салықбаевтың жатқан жері жайлы, топырағы торқа болып, иманы пейіште шалқысын.

 

«Ақ жол»  Қазақстан

демократиялық партиясы

Бөлісу:

Facebook арқылы жазылған пікірлер

Сайтта 3 пікір жазылған

  1. Арыстың баласымын 25 Ақпан, 2020 18:19 Жауап

    Арыстың мақтанышы еді қайран көкем, Құлшығаштың жоқтаушысы еді қайран көкем. Əужан болыстың тоғызыншы баласы елі қайран көкем, Біздерге ақылын айтып бағыт-бағдар беруші еді. Амал не. Пейіште болыңыз көке. Арыстан шыққан бес Социалистік Еңбек Ері мен бес Кеңес Одағының Батырының соңғы буын өкілі еді. Жатқан жеріңіз жайлы, топырағыңыз торқа болсын. АУМИН.

  2. Арыстың баласымын 25 Ақпан, 2020 18:31 Жауап

    Ұлы адам еді, көрнекті темір жол ұйымдастырушысы асыл азамат қой нағыз. Орныңыз əрқашан да білінетін болды ау бізге. Жаныңыз жəннатта болсын. Жатқан жеріңіз жайлы, топырағыңыз торқа болсын.

  3. Арыстың баласымын 25 Ақпан, 2020 18:37 Жауап

    Əуелі Социалистік Еңбек Ері Əуесхан көкем, артынан олимпиада чемпионы Бекзат Саттархановтың əкесі Сейлхан Саттарханов, Мысырдың бұрынғы президенті Хосни Мубарак, бүгін міне Кеңес Одағының ең соңғы Маршалы Дмитрий Тимофеевич Язов өмірден өтті. Бұл жер бетінің астан кестені шығып кетті ғой. О Алла, алдарынан жарылқай көр пенделеріңді

Пікір немесе жауап жазу