Түркияда Абай мұрасы ұлықталды

154
0
Бөлісу:

Адамзаттың ақылманына айналған Абайдың мерейтойы Түркияда аталып өтті. Ақынның әдеби мұраларын кеңінен насихаттау мақсатында Анадолы жерінде Қазақ ұлттық қыздар педагогикалық университеті тағылымды шара ұйымдастырды.
Нийде Өмер Халисдемир университетіндегі Қазақ-түрік мәдени білім беру ғылыми-зерттеу орталығында өткен жиын бауырлас мемлекеттер арасындағы өзара ынтымақтастықты айқын аңғартты. Қыздар университетінің делегациясы аталған орталыққа Абай Құнанбайұлының шығармалары мен ол туралы іргелі зерттеу еңбектері топтастырылған елу кітапты сыйға тартты. Сондай-ақ қазақстандық жетекші жоғары оқу орнының бастамасымен «Абай тағылымы» тақырыбында көрме ашылды.

Көрменің ашылу рәсіміне түркиялық ғалымдар, қазақстандық делегация өкілдері мен студенттер қатысты.
Игілікті шараныНийде Өмер Халисдемир университетінің Оқу ісі жөніндегі проректоры Иляс Гукхан ашып, Абай қазақтың ұлы ақыны ғана емес, сондай-ақ түбі бір түркі дүниесіне ортақ тұлға екендігін атап өтті. Сонымен қатар ол ойшылдың адамзаттың асыл мұрасына айналған шығармалары әлемнің 30-дан астам тілімен қатар түрік тіліне де аударылғанын айтты.
–Әкенің баласы емес, адамның баласы болуды мақсат тұтқан ақынның құнды қазынасы өскелең ұрпақпен бірге жасайтын мәңгілік мұраға айналуы тиіс. Осы орайда Қазақстан Президенті Қасым-Жомарт Тоқаев мырзаның Абай хақындағы мақаласы, ой-толғамы басты бағдаршам болуы тиіс деп ойлаймын. Ол жоспарланған шаралардың барлығы «той тойлау үшін емес, ой-өрісімізді кеңейтіп, рухани тұрғыдан дамуымыз үшін өткізілмек» екендігін атап өтті. Біз де өз тарапымыздан ақын мерейтойын жоғары деңгейде өткізуге атсалысамыз. Бүгінгі шара соның бастауы іспеттес. Түркия жұртшылығы үшін де Абайдың өміршең поэзиясының орны бөлек. Оның әдеби туындыларының астарына үңіліп қарасаңыз үлкен мағына жатыр. Оның пәлсапалық өсиеттері мен шығармалары уақытпен үндес яки қанаттас, – деді Иляс Гукхан.
Жиында сөз алған Қыздар университе­тінің Ғылыми жұмыстар және инновация жөніндегі проректоры Нұрғали Аршабеков ұлы ақынның тағылымына терең бойлау – бүгінгі күнде үлкен маңызға ие екендігін баяндап, тағылымды іске ұйытқы болғандарға ізгі лебізін білдірді.
–Абайға бет бұру, «өткеннің арты, жаңаның басы едім» деген ұлы ақынның тағылымына терең бойлау – бүгінгі күнде үлкен маңызға ие. Абай – ұлттық болмыстың айқын үлгісі. Абай – дала даналарының барша жақсы қасиеттері мен асыл мұраларын бойына сіңіре отырып, ұлт әдебиеті мен мәдениетін һәм қоғамдық ойды баға жетпес қазыналармен байытқан дана да дара тұлға. Абай – адамзатқа ортақ тұлға. Ұлы ойшылдың шығармалары әлемдік әдебиеттің алтын қорына енуі бұл сөзімізге айқын дәлел. 75 жылдық тарихы бар университет ұжымы атынан ақын мерейтойы қарсаңында ұйымдастырылғаншараның өтуіне қолдау көрсеткен туысқан түрік бауырларымызға алғысымызды білдіреміз, – деді өз сөзіндеНұрғали Аршабеков.
Алдағы уақытта Түркияда білім алып жүрген қазақ жастарымен қатар көпшілік қауым Нийде қаласындағы Қазақ-түрік мәдени білім беру ғылыми-зерттеу орталы­ғында Абай мұрасымен кеңінен танысуға мүмкіндік алмақ. Бұл бастама өз кезегінде туысқан халықтар арасындағы рухани сабақ­тастықтың артуына ықпал ететіндігі рас.
Көрменің ашылу рәсімінде Халықаралық Түркі әлемі зерттеулері симпозиумының директоры, профессор Хикмет Кораш, Еуразиялық зерттеулер мамандығының басшысы, PhD Турғай Дүйен, Қазақ-түрік мәдени білім беру ғылыми-зерттеу орталығының басшысы, профессор Мурат Барут сынды сынды ғалымдар да сөз сөйлеп, ниеттестігін білдірді.

Жандар АСАН,
Қыздар университетінің баспасөз және қоғаммен байланыс бөлімінің басшысы

qazaquni.kz

Бөлісу:

Facebook арқылы жазылған пікірлер

Пікір немесе жауап жазу

он екі − бір =