ادەبيەت تارلانىنىڭ تاعىلىمدى تويى

596
0
بولىسۋ:

قر مەملەكەتتىك سىيلىعىنىڭ لاۋرەاتى, رەسەيدىڭ شولوحوۆ اتىنداعى حالىقارالىق سىيلىعىنىڭ يەگەرى, ماحمۇد قاشقاري اتىنداعى «تۇرىك الەمىنە سىڭىرگەن اسا زور ەڭبەگى ۇشىن» حالىقارالىق سىيلىعىنىڭ يەگەرى, «پاراسات» وردەنىنىڭ يەگەرى, بەلگىلى جازۋشى سابيت دوسانوۆتىڭ سەكسەن جاسقا تولعان مەرەيتويى اباي اتىنداعى وپەرا جانە بالەت تەاترىندا اتالىپ وتىلدى. سالتاناتتى شاراعا ادەبيەتتىڭ بەلدى وكىلدەرى, قوعام قايراتكەرلەرى جانە شەتەلدەگى قالامداس دوستارى قاتىستى. جيىندى اشقان الماتى قالاسىنىڭ اكىمى باقىتجان ساعىنتاەۆ جازۋشىعا دەگەن ىزگى تىلەگىن ارناپ, ەلباسى نۇرسۇلتان نازارباەۆتىڭ, ەل پرەزيدەنتى قاسىم-جومارت توقاەۆتىڭ جولداعان قۇتتىقتاۋىن جەتكىزدى. سونداي-اق, سابيت ايمۇحانۇلى مەن جان جارى قۇرالاي اققوشقاروۆا ەكەۋىنىڭ ارنايى سالىنعان كارتيناسىن تابىستاپ, توي يەسىنىڭ يىعىنا قازاقتىڭ سالتىمەن زەرلى شاپان جاپتى.

ەلباسى ن.نازارباەۆتىڭ قۇتتىقتاۋ حاتىندا جازۋشىنىڭ وقىرمانداردىڭ ىستىق ىقىلاسىنا بولەنىپ, كەڭ تىنىستى كەسەك تۋىندىلارىنىڭ ۇلتتىق ادەبيەتتىڭ, سونىڭ ىشىندە كوركەم پروزانىڭ وركەندەپ, ورىسىنىڭ كەڭەيۋىنە ەلەۋلى ۇلەس قوسقانى ايرىقشا اتالىپ وتىلەدى.

ال, مەملەكەت باسشىسى قاسىم-جومارت توقاەۆ جولداعان جەدەلحاتتا: «قۇرمەتتى سابيت ايمۇحانۇلى! سىزدى 80 جاسقا تولعان مەرەيتويىڭىزبەن قۇتتىقتايمىن! حالقىمىز وزىڭىزدى قارىمدى قالامگەر, قوعامدىق-ساياسي ماڭىزدى وقيعالارعا وي-پىكىرىن بىلدىرىپ وتىراتىن قايراتكەر رەتىندە جاقسى بىلەدى.ۇزاق جىلعى شىعارماشىلىق ەڭبەگىڭىز وز جەمىسىن بەرىپ كەلەدى. سىزدىڭ قالامىڭىزدان شىققان كوركەم دۇنيەلەر بۇگىنگى زامانمەن ۇندەستىك تاۋىپ, عاسىرلار توعىسىنداعى كوكەيكەستى ماسەلەلەردى كوتەرۋىمەن ەرەكشەلەنەدى. الداعى ۋاقىتتا دا وقىرماندارىڭىزدى تارتىمدى تۋىندىلارىڭىزبەن قۋانتا بەرۋىڭىزگە تىلەكتەستىگىمدى بىلدىرەمىن. سىزگە زور دەنساۋلىق, اۋلەتىڭىزگە اماندىق پەن قۇت-بەرەكە تىلەيمىن», – دەلىنگەن.

«مەن ۇشىن مەرەيتوي – توي تويلاۋ ەمەس, وي تولعاۋ» دەپ جازۋشى سابيت دوسانوۆتىڭ وزى ايتقانداي, ىس-شارا بارىسىندا سەكسەننىڭ سەڭگىرىنە شىققان قارىمدى قالامگەردىڭ ونەگەلى ومىرىن ورنەكتەگەن كوركەم فيلم ەكراننان كورسەتىلىپ, جازۋشىنىڭ شىعارماشىلىعىنان جيىلعان جۇرتقا مول ماعلۇمات بەردى.

سونداي-اق, مەرەيتوي اياسىندا قر پارلامەنتى سەناتىنىڭ توراعاسى داريعا نازارباەۆانىڭ,  قر پارلامەنتى ماجىلىسىنىڭ توراعاسى نۇرلان نىعماتۋليننىڭ, قر كونستيتۋتسييالىق كەڭەسىنىڭ توراعاسى قايرات ماميدىڭ, قر مادەنيەت جانە سپورت مينيسترى اقتوتى رايىمقۇلوۆانىڭ, قر ۇلتتىق بانكىنىڭ توراعاسى ەربولات دوساەۆتىڭ قۇتتىقتاۋ حاتتارى وقىلدى.

سەكسەننىڭ سەڭگىرىنە شىققان جازۋشىنى قۇتتىقتاپ, الىستان ات ارىتىپ كەلگەن شەتەلدىك ارىپتەستەرىنىڭ قاراسى كوپ بولدى. قىرعىستان رەسپۋبليكاسىنىڭ پرەزيدەنتى سوورونباي جەەنبەكوۆتىڭ قۇتتىقتاۋ حاتىن حالىق جازۋشىسى, قىرعىستان پرەزيدەنتىنىڭ كەڭەسشىسى سۇلتان راەۆ جەتكىزدى. فرانتسييالىق بەلگىلى جازۋشى, پرەزيدەنتتىك بەيبىتشىلىك جانە كەلىسىم سىيلىعىنىڭ يەگەرى البەرت فيشلەر, ماسكەۋ جازۋشىلار وداعى باسقارماسىنىڭ توراعاسى ۆلاديمير بويارينوۆ,  ازىربايجان جازۋشىلار وداعىنىڭ حاتشىسى رزا حەيال, «چينار» ادەبي جۋرنالىنىڭ باس رەداكتورى زال ەلحان (ازىربايجان), تۇرىك دەلەگاتسيياسىنىڭ باسشىسى پارماكسياز, بەلگىلى جازۋشى افشار يمدات, (تۇركييا), اقىن نينا پوپوۆا (ماسكەۋ), جازۋشى ستانيسلاۆ وگانيان, (ارمەنييا), «جاحون  ادەبيەتى» ادەبي جۋرنالىنىڭ باس رەداكتورى احمەتجون نەليباەۆ(وزبەكستان) جانە ت.ب كوپتەگەن شەتەلدىك ادەبيەت وكىلدەرى ايتۋلى شاراعا ارنايى كەلىپ, اق تىلەكتەرىن اقتارىپ, سىي-سيياپاتتارىن تابىستادى.

جازۋشىنىڭ تۋعان ەلىنىڭ سالەمىن, ياعني, قوستاناي وبلىسىنىڭ ىستىق ىلتيپاتىن وبلىس اكىمى ارحيمەد مۇحامبەتوۆتىڭ قۇتتىقتاۋىن ەكونوميكا عىلىمدارىنىڭ دوكتورى, اكادەميك كەنجەعالي ساعاديەۆ جەتكىزدى. سونداي-اق, دۇبىرلى دۋماننىڭ تورىنەن قازاقتىڭ تۇڭعىش عارىشكەرى, توقتار اۋباكىروۆ, قازاقستاننىڭ ەڭبەك ەرى ولجاس سۇلەيمەنوۆ باستاعان قوعام قايراتكەرلەرى مەن اقىن-جازۋشىلار تابىلدى.

الىس-جاقىن شەتەلدىك ادەبيەت تارلاندا­رىنىڭ باسىن قوسقان سالتاناتتى شارا مەرەيتوي يەسى سابيت دوسانوۆتىڭ تەك قازاق ەلىنە عانا ەمەس, دۇنيەجۇزىنە اتى مالىم كوركەم سوزدىڭ كورنەكتى شەبەرى ەكەندىگىن ايعاقتاي تۇستى.

قازاقستاننىڭ ەڭبەك سىڭىرگەن قايراتكەرى, بەلگىلى كومپوزيتور شامىل ابىلتاۆتىڭ شىرقاتا سالعان «سابەڭ سال» اتتى سابيت دوسانوۆقا ارنالعان انى كەشتىڭ شىرايىن كىرگىزىپ, كورەرمەندەردىڭ زور قوشەمەتىنە يە بولدى.

سونداي-اق, اباي اتىنداعى قازاق مەم­لەكەتتىك اكادەمييالىق وپەرا جانە بالەت تەاترىنىڭ ونەرپازدارىنىڭ ونەرى دە كوپتىڭ كوڭىلىنەن شىقتى.

عابيت مۇسىرەپوۆ اتىنداعى قازاق مەم­لەكەتتىك بالالار مەن جاسوسپىرىمدەر تەاترى ارتيستەرىنىڭ سابيت ايمۇحانۇلى شىعار­ماشىلىعىنان وقىعان «مەن قۇداي ەمەسپىن» اتتى ولەڭى كەش يەسىنىڭ ومىر تۋرالى جان تەبىرەنىسىنەن سىر اقتاردى.

بەلگىلى انشىلەر جازيرا مەن جانبولات سالعان «انامنىڭ اق جاۋلىعى» اتتى ان انالارعا دەگەن قۇرمەتتى ەسەلەي تۇسكەنىن اتاپ وتكەنىمىز جون.

قازاق ەستراداسىنىڭ جارىق جۇلدىزدارى «مۋزارت» توبى, «قوڭىر» توبى, مادينا سادۋاقاسوۆا جانە تاعى باسقالارىنىڭ اۋەلەتە شىرقاعان اسەم اندەرى توي يەسىنە جاسالعان تاماشا تارتۋ بولدى.

قازاق ادەبيەتىنىڭ كورنەكتى وكىلىنىڭ وسىناۋ تاعىلىمدى جازۋشىنىڭ عانا ەمەس, بۇكىل قازاق ادەبيەتىنىڭ مەرەيلى مەرەكەسى ەكەنى سوزسىز.

وقىرماندارىڭىزدىڭ باعىنا شىعار­ماشىلىق جولداعى جۇيەلى جوسپارلارىڭىز جۇزەگە اسا بەرسىن دەگەن تىلەگىمىز بار.

بىز دە توي يەسىنە مەرەيتويىڭىز مەرەيلى بولىپ, جۇزىڭىز جارقىن كۇيدە جۇزگە جەتىڭىز دەگىمىز كەلەدى.

 

گۇلميرا سادىق

qazaquni.kz

فوتو اۆتورى: الەكساندر پاۆسكيي

 

بولىسۋ:

Facebook ارقىلى جازىلعان پىكىرلەر

پىكىر نەمەسە جاۋاپ جازۋ