Bilim mınıstri muǵalimderdi daıarlaıtyn JOO sanyn qysqartpaq

1756
0
Bólisý:

Bilim jáne ǵylym mınıstrligi baǵalaý júıesiniń tizbesine engen 13 ýnıversıtetti tekserdi. Buǵan deıingi jasalǵan eskertýler joıylmaǵandyqtan, 5 ýnıversıtettiń lısenzııasy bir aıǵa toqtatyldy.

Bul týraly bilim jáne ǵylym mınıstri Ashat Aımaǵambetov Facebook-tegi paraqshasynda jazdy.

«Sondaı-aq 12 joǵary oqý ornyna aıyppul salynyp, 1 ýnıversıtet boıynsha is sotqa jiberildi. Jyl sońyna deıin taǵy 12 JOO boıynsha buryn berilgen nusqamalardyń oryndalýyn tekserýdi josparlap otyrmyz. Buzýshylyqtar qaıta anyqtalǵan jaǵdaıda, lısenzııadan aıyrý jáne JOO jabý úshin qujattar sotqa jiberiledi», – dedi Ashat Aımaǵambetov.

Aıtýynsha, qazirgi ýaqytta mınıstrlikke lısenzııa beretin organ retinde, mindetterine jaýapsyz qaraıtyn joǵary oqý oryndarynyń lısenzııalaryn óz tarapynan keri qaıtaryp alýǵa quqyq beretin zań normalaryn engizý josparlanýda.

«Bul bastama memleket basshysy tarapynan qoldaýǵa ıe boldy. Qazirgi ýaqytta lısenzııany qaıtaryp alý úshin sotqa júginý nemese qajet bolǵan jaǵdaıda barlyq shaǵymdaný prosedýrasynan ótý kerektigin esterińizge salamyn. Oǵan qosa, premer-mınıstrdiń ókimine sáıkes Úkimet janynan joǵary oqý oryndaryn ońtaılandyrý komıssııasy quryldy», – dep atap ótti.

О́z sózinde joǵary oqý oryndaryna qoıylatyn biliktilik talaptarynyń da kúsheıtilip jatqanyna toqtaldy.

«Ásirese lısenzııalarynda pedagogterdi daıarlaýǵa arnalǵan qosymshalary bar joǵary oqý oryndaryna qosymsha talaptar daıyndaýda. Olardyń sany – 85». Alaıda olardyń sapasy syn kótermeıtindikten, qoıylatyn talaptardy kúsheıtý arqyly muǵalimderdi daıarlaıtyn JOO sanyn 85-ten 20-25-ke deıin qysqartý josparlanyp otyr. Olar basqa baǵyttar boıynsha mamandar daıarlaı beredi, al pedagogıka boıynsha lısenzııalary qaıtarylyp alynýy múmkin. Shamamen alǵanda, ár aımaqta muǵalimderdi daıarlaıtyn 1 myqty JOO jáne Almatyda birneshe oqý orny bolmaq», – dep jazdy mınıstr.

Nashar sabaq úlgerimi úshin oqýdan shyǵarylǵandardyń bárin oqýǵa qabyldaı berý esebinen keıbir joǵary oqý ornyna 100 adam túsip, 800-ge jýyq túlek bitiretinin atap ótti.

«Taǵy bir jaıt, bıyl 37 myń stýdent taıaý sheteldiń JOO-da bir semestr nemese bir jyl oqyǵan soń qazaqstandyq shaǵyn JOO-na aýysyp keldi. Aqpartaqa súıensek, UBT sertıfıkatynyń talap etilýin aınalyp ótý úshin talapkerler qujattaryn sheteldik JOO jiberip, bir semestr nemese bir jyldan keıin vırtýaldy túrde qazaqstandyq ýnıversıtettke aýysyp alatyn tendensııa da bar», – dedi mınıstr.

Aıtýynsha, 20-23 myńǵa deıin stýdent oqıtyn jáne olardyń kópshiligi ádette sabaqqa da barmaıtyn keıbir óńirlik jeke menshik joǵary oqý oryndary da bar.

«Sondyqtan da Mınıstrlik osyndaı jaǵdaılar men jaýapkershiligi tómen JOO qatysty qatań saıasat júrgizýde. Álbette, bul sharalar barlyǵyna birdeı unamaı bermeıtini anyq. Degenmen, Elbasy men Memleket basshysynyń tapsyrmalaryna sáıkes, Mınıstrlik joǵary bilim berý salasynda sapany qamtamasyz etý saıasatyn odan ári jalǵastyrady», – dedi bilim jáne ǵylym mınıstri.

Bólisý:

Facebook arqyly jazylǵan pikirler

Pikir nemese jaýap jazý