بىلىم مينيسترى مۇعالىمدەردى دايارلايتىن جوو سانىن قىسقارتپاق

1752
0
بولىسۋ:

بىلىم جانە عىلىم مينيسترلىگى باعالاۋ جۇيەسىنىڭ تىزبەسىنە ەنگەن 13 ۋنيۆەرسيتەتتى تەكسەردى. بۇعان دەيىنگى جاسالعان ەسكەرتۋلەر جويىلماعاندىقتان, 5 ۋنيۆەرسيتەتتىڭ ليتسەنزيياسى بىر ايعا توقتاتىلدى.

بۇل تۋرالى بىلىم جانە عىلىم مينيسترى اسحات ايماعامبەتوۆ Facebook-تەگى پاراقشاسىندا جازدى.

«سونداي-اق 12 جوعارى وقۋ ورنىنا ايىپپۇل سالىنىپ, 1 ۋنيۆەرسيتەت بويىنشا ىس سوتقا جىبەرىلدى. جىل سوڭىنا دەيىن تاعى 12 جوو بويىنشا بۇرىن بەرىلگەن نۇسقامالاردىڭ ورىندالۋىن تەكسەرۋدى جوسپارلاپ وتىرمىز. بۇزۋشىلىقتار قايتا انىقتالعان جاعدايدا, ليتسەنزييادان ايىرۋ جانە جوو جابۋ ۇشىن قۇجاتتار سوتقا جىبەرىلەدى», – دەدى اسحات ايماعامبەتوۆ.

ايتۋىنشا, قازىرگى ۋاقىتتا مينيسترلىككە ليتسەنزييا بەرەتىن ورگان رەتىندە, مىندەتتەرىنە جاۋاپسىز قارايتىن جوعارى وقۋ ورىندارىنىڭ ليتسەنزييالارىن وز تاراپىنان كەرى قايتارىپ الۋعا قۇقىق بەرەتىن زاڭ نورمالارىن ەنگىزۋ جوسپارلانۋدا.

«بۇل باستاما مەملەكەت باسشىسى تاراپىنان قولداۋعا يە بولدى. قازىرگى ۋاقىتتا ليتسەنزييانى قايتارىپ الۋ ۇشىن سوتقا جۇگىنۋ نەمەسە قاجەت بولعان جاعدايدا بارلىق شاعىمدانۋ پروتسەدۋراسىنان وتۋ كەرەكتىگىن ەستەرىڭىزگە سالامىن. وعان قوسا, پرەمەر-مينيستردىڭ وكىمىنە سايكەس ۇكىمەت جانىنان جوعارى وقۋ ورىندارىن وڭتايلاندىرۋ كوميسسيياسى قۇرىلدى», – دەپ اتاپ وتتى.

وز سوزىندە جوعارى وقۋ ورىندارىنا قويىلاتىن بىلىكتىلىك تالاپتارىنىڭ دا كۇشەيتىلىپ جاتقانىنا توقتالدى.

«اسىرەسە ليتسەنزييالارىندا پەداگوگتەردى دايارلاۋعا ارنالعان قوسىمشالارى بار جوعارى وقۋ ورىندارىنا قوسىمشا تالاپتار دايىنداۋدا. ولاردىڭ سانى – 85». الايدا ولاردىڭ ساپاسى سىن كوتەرمەيتىندىكتەن, قويىلاتىن تالاپتاردى كۇشەيتۋ ارقىلى مۇعالىمدەردى دايارلايتىن جوو سانىن 85-تەن 20-25-كە دەيىن قىسقارتۋ جوسپارلانىپ وتىر. ولار باسقا باعىتتار بويىنشا ماماندار دايارلاي بەرەدى, ال پەداگوگيكا بويىنشا ليتسەنزييالارى قايتارىلىپ الىنۋى مۇمكىن. شامامەن العاندا, ار ايماقتا مۇعالىمدەردى دايارلايتىن 1 مىقتى جوو جانە الماتىدا بىرنەشە وقۋ ورنى بولماق», – دەپ جازدى مينيستر.

ناشار ساباق ۇلگەرىمى ۇشىن وقۋدان شىعارىلعانداردىڭ بارىن وقۋعا قابىلداي بەرۋ ەسەبىنەن كەيبىر جوعارى وقۋ ورنىنا 100 ادام تۇسىپ, 800-گە جۋىق تۇلەك بىتىرەتىنىن اتاپ وتتى.

«تاعى بىر جايت, بيىل 37 مىڭ ستۋدەنت تاياۋ شەتەلدىڭ جوو-دا بىر سەمەستر نەمەسە بىر جىل وقىعان سوڭ قازاقستاندىق شاعىن جوو-نا اۋىسىپ كەلدى. اقپارتاقا سۇيەنسەك, ۇبت سەرتيفيكاتىنىڭ تالاپ ەتىلۋىن اينالىپ وتۋ ۇشىن تالاپكەرلەر قۇجاتتارىن شەتەلدىك جوو جىبەرىپ, بىر سەمەستر نەمەسە بىر جىلدان كەيىن ۆيرتۋالدى تۇردە قازاقستاندىق ۋنيۆەرسيتەتتكە اۋىسىپ الاتىن تەندەنتسييا دا بار», – دەدى مينيستر.

ايتۋىنشا, 20-23 مىڭعا دەيىن ستۋدەنت وقيتىن جانە ولاردىڭ كوپشىلىگى ادەتتە ساباققا دا بارمايتىن كەيبىر وڭىرلىك جەكە مەنشىك جوعارى وقۋ ورىندارى دا بار.

«سوندىقتان دا مينيسترلىك وسىنداي جاعدايلار مەن جاۋاپكەرشىلىگى تومەن جوو قاتىستى قاتاڭ ساياسات جۇرگىزۋدە. البەتتە, بۇل شارالار بارلىعىنا بىردەي ۇناماي بەرمەيتىنى انىق. دەگەنمەن, ەلباسى مەن مەملەكەت باسشىسىنىڭ تاپسىرمالارىنا سايكەس, مينيسترلىك جوعارى بىلىم بەرۋ سالاسىندا ساپانى قامتاماسىز ەتۋ ساياساتىن ودان ارى جالعاستىرادى», – دەدى بىلىم جانە عىلىم مينيسترى.

بولىسۋ:

Facebook ارقىلى جازىلعان پىكىرلەر

پىكىر نەمەسە جاۋاپ جازۋ