СОТ ЗАЛЫНДА оқылған жыр: ЕРДІҢ ҚҰНЫ – ТРИЛЛИОН! (видео)

5658
33
Бөлісу:

Ислам Әбіштің соты Қазақ тілін қорғау және Қазақ жырын қолдау алаңына айналып кеткелі біраз болды…

Сотты жүргізіп жатқан Қ. Мекемтасты екі бет қағаздан Қазақ тілінен 76 қате жібергені үшін екі рет, оған араша түсуші сот Шаяхметованың өзін бір рет, жалпы үш рет сотқа сенімсіздік білдірілді. Бұл Қазақ соты тарихында болмаған оқиға!
Бірақ бәрінде де , алғашқы күні-ақ: «Ел астанасында Қазақ тілін Мекемтастан артық білетін сот жоқ. Көресіңдер қайтып соны әкеледі» деп айтқанымыз айдай келіп, бір емес…екі рет қайтып әкелді оны…Сонымен, сот Мекемтасымыз мекем тас болып, орнынан қозғалар емес…
Міне, біздің Тәуелсіздік алғалы отыз жылдағы жеткен «жетістігіміз»… Міне саған «Ұлттық» идеология!

Әлемге әйгілі жазушы-драматург Дулат Исабек бұл атышулы іске басынан араласып, баспасөз мәслихатына да қатысты. Қазір күніне үш рет хабарласады. Телефонды ала алмай қалсаң, жақсылап сөгіс естисің…. Мемлекеттік сыйлықтың лауреаты, Исекең туралы арнайы мақала, айшықты жыр жазған көрнекті ақын Темірхан Медетбек: «Сот залын мүшәйраға айналдырып жібергенсіңдер ме? Жыр оқылған жерде жақсылық болады. Жақсылықтан басқа жасағаны жоқ Ислам ініміз жайлы жақсы хабар күтеміз»-деп хабарласты. Сатира сардары Көпен Әмірбек пен белгілі ғалым, Парламенттің үш мәрте депутаты болған Мырзагелді Кемел сотқа күнде келіп қатысуда.
Кеше Алматыдан арнайы белгілі қаламгер-журналист, ҚР Педагогика ғылымы академиясы академигі, «Президент және Халық» газетінің бас редакторы Марат Тоқашбай келіп қатысты. Алыстан арнайы ат сабылтып келіп жатқан азаматтар қатарын толықтырып, талантты ақын, Қазақстан Жазушылар одағы Түркістан облыстық филиалының тұңғыш төрағасы Әлібек Шегебай келіп, әдемі жыр арнап кетті. ҚР Мәдениет қайраткері, Елбасының алдында талай рет өзі жетекшілік ететін «Алтын Алма» отбасылық ансамблімен өгер көрсеткен, Исекеңе қай өңірден қандай азамат қолдауға келсе де, дастарханын жайып, дәмі мен әнін сыйламай жібермейтін Алтынбай сері өзі ғана емес, операторлары бастаған бір топ қауымымен келіп қатысуда. Қазақтың Ақжүнісі атанған белгілі тележурналист, блогер Сәуле Әбілдаханқызы мен «Қазақ үні» ұлттық порталы Бас редакторы, дарынды ақын Азамат Тасқараұлы осында, халыққа ақпарат таратуда.

Сот залындағы мүшәйраны кеше Ислам көкеміздің өзі бастады!

Сот залындағы мүшәйраны кеше Ислам көкеміздің өзі бастады!

Ол қазақтың көрнекті ақыны Есенғали Раушановтың өзіне жіберген жырын оқыды. Содан соң Дағыстанның ұлы ақыны Расул Ғамзатовтың махаббат жырын өз атынан айтты. Содан соң қоршау терезе ар жағынан:
» Ал Қазыбек Иса не дейтінін тыңдаңдар» деп:
Жүрдім, жүрдім, жүрдім де,
Кетіп қалдым бір күнде…
Немкеттілеу ағайын,
Неге кеттім, білдің бе»-
деп, белгілі өлеңімді нәшіне келтіріп тұрып, шабыттанып оқып берді.
Содан соң менен өлең сұрады. Мен жолымды Ислам Әбішті қолдауға әр өңірден келіп жатқан көптеген азаматтардың бірі, Түркістан облысы Шардара қаласынан келген белгілі әнші-термеші, ақын-журналист, Республикалық термешілер байқауының лауреаты Әбдіғаппар Айдарға бердім. Ол ел мен жер жайлы, Шардара туралы, махаббат жырларын маздатып оқып берді. Содан соң кезек маған да келді.

«ЕРДІҢ ҚҰНЫ – ТРИЛЛИОН!» жыры жазылғалы төрт-бес ай болған. Дизайнер қарындасым Күлайна Оразбекқызы лезде баннер жасап фейсбук пен топтарда таратып жібергесін, «Қазақ үні» сайтында жариялауды да ұмытып кетіппін. Енді міне, Ерге арналған Ерлік жырының тұсаукесері сол Ердің ісін қарап жатқан сот залында кесілді.
Мен жыр оқып тұрғанда сот үзілісі бітсе де, жырды үзбей, есік сыртында кідірген сот қызметкерлеріне алғысымды айтамын. Бәлкім олар менің өлең оқыр алдында: «Жыр оқылып жатқанда сот болса да, кім болса да , үзіп жібергенін қаламаймын»-дегенімді естіген де болар. Дегенмен, рахмет, олар да адам ғой, соны білдірді.

Исекең жырын оқып болғанда мен Есенғали ағама сот залынан жазба жібердім:
«Ислам досыңыз соттағы үзілісте қазақтың ең мықты екі ақынының -екеуміздің жырымызды оқыды. Сіздікін қағаздан, менікін жатқа оқыды…»-дедім.
Ағам да кешіктірмеді:
«АЗАМАТ АМАН БОЛСЫН! ИСЛАМДАЙ ЕРДІҢ ЖАЛАДАН ҚҰТЫЛЫП, АҚТАЛЫП ШЫҒУЫНА ТІЛЕКТЕСПІН! Менен дұғай-дұғай сәлем!»-деп жауап жазып жіберді.
Мен ақын сәлемін қоршау терезенің аржағындағы Исекеңе жеткіздім.
«Кеше Әбдіжәміл Нұрпейістің 95 жасқа толлған тойында осы Есенғали, Ертай Ашықбай достарыңыз бастаған көп қаламгерлер амандаспай жатып, Сіздің жағдайыңызды сұрады»-деп едім Исекең жадырап, жалы көтеріліп шыға келді!
Иә, «Аққа – Құдай жақ» дегендей, күйе жаққандарға алақандарын жалатып, ақталып шығар күн тезірек келсін деп тілейміз!

ЕРДІҢ ҚҰНЫ –ТРИЛЛИОН

Ислам Әбішевке

«Ер жақсысы – түрмеде,
Ат жақсысы – кермеде.»
Халық мақалы

Тұрмайтындар сенің басқан ізіңе,
Аңдып жүрді әрбір басқан ізіңді…
Ұрлайтындар қарамай бет-жүзіңе,
Бәйге тікті басыңа олар құзырлы…

Жемқорларға жегізбеп ең байлықтан,
«Жемқор» етіп көрсетуде өзіңді…
Халық қамын ойлауыңнан қаймыққан,
Қамауда олар сынап сендік төзімді…

Триллионды үнемдеген түрмеде-
Қудалаған құлқынқұлдар мінбеде…
«Ер жақсысы – түрмеде» дер күнге де…
Жеттік қалай?
Тоқтамайды бұл неге?!.

Халық үшін күрескен сан алыптың,
Халық жауы атанғаны белгілі!
Қазынасын қорғап едің xалықтың-
Триллионға бағаланды Ер құны!

Сен жатырсың көшесінде Алаштың ,
Қуғын көрді кеше Алаштық ерлерім…
Түрмеде де жоқ-жітікке қарастың-
Қарап жатар қапаста да сен бе едің?!.

«Ат жақсысы – кермеде» боп
тұр бүгін –
Құрту керек тұрқы бөлек асылды…
Заңдастырып бермеп едің ұрлығын…
Заңсыздықпен сені торға жасырды…

Белден басқан Заңың менен Арыңды,
Билік айтса,
Биің билер
көп-көрім…
Пайғамбар жас – парасатты шағыңды
Темір торда қарсы аламын
деп пе едің?

Шын жағдайды ел басшысы білер ме-ей,
Өткізесің ойға батып күнді ұзын…
Жолдан келіп, үйге асығып кірердей,
Есік жаққа елеңдейді
ұл-қызың!

Сүйген жардың сенімі де
кепіл мол,
Махаббаттың жырында да дарасың!
Декабристер әйелдері
секілді ол,
Жол қылуда үй мен түрме арасын…

Төбеттер көп-
Төніп тұрған қауіп бар,
«Аққа күйе жұқпас»-
Алла қорғайды!
Жоғалса да, тары аңдыған тауықтар,
Қаранарын xалық іздеп, қолдайды!

Домбыра алса, ән мен күйге бөлеген,
Әкімдердің ішіндегі ақынсың!
Кең далаңдай кемел едің,
кенен ең,
Темір торға қалай сыйып жатырсың?

Азапта да Алған беттен қайтатын,
Ойың жоқ қой!
Бұл күнде оны білмес кім?
Қаламгерлер жоқ сырыңды айтатын,
Қасыңдағы қанішермен тілдестің…

Көтересің қиындықтың қандайын,
Аллам өзі Ерді сынап, баптайды!
Жарқырайды ертең-ақ кең маңдайың,
Алмас қылыш қын түбінде жатпайды!

Нарда жатыр-
Нарқы биік Нар тұлға!
Өршіп аққан өзенсің ғой-
Өр едің!..
Ел қаржысын қорғаған Ер,
артыңда,
Халқың бар ғой-
Қорғап қалар,
Сенемін!!!

Қазыбек ИСА
02.06.2019.

Бөлісу:

Facebook арқылы жазылған пікірлер

Сайтта 33 пікір жазылған

  1. нұрлан 25 Қазан, 2019 18:01 Жауап

    Əлібек Шегебайға да Қазыбек Исаға да көп рахмет. Исламға бостандық! Мойымаңыз, Алла жар болсын!

  2. Мәмбет Құрманбаев 25 Қазан, 2019 19:47 Жауап

    Керемет әсерлі жыр екен Қазеке! Байыбына жеткен жан түсінеді жырыңның терең мағынасын! Алла жар болып Ислам бауырымыз бостандыққа шығуына тілектеспін ! Әлібек Шегебай екеуіңнің жазған жырларың өте әсерлі де мағыналы екен !

  3. Жанабай Абзалулы 25 Қазан, 2019 20:17 Жауап

    Ислам бауырымыз ел қаржысын қорғаса Қазыбек баурымыз Ұлттық Кеңесте Қазақ тілінің абыройын қорқап жүр!
    Екеуі де Қазақ халқы үшін еңбек етіп жүрген азаматтар! Жырлаған жырыңыз рухты екен! Жасай беріңдер!

  4. Айбын Аргын 26 Қазан, 2019 14:22 Жауап

    Өте әсерлі өлең екен! «Ердің құны – триллион» деп атын да өлтіріпсіз!!! Ел игілігі үшін қызмет етіп, қазынасын триллиондап үнемдеген Ислам Әбішевке Алла бостандыққа шығуын нәсіп етсін!! Айтылған жырлар қамаудағы азаматқа демеу болып алдағы таңына үміт отын сыйласын дейміз!!!

  5. Айжан 27 Қазан, 2019 01:35 Жауап

    Алла жар болсын! Ислам аға.Қолдау көрсетіп жүрген баршаңызға Алланың нұры жаусын!

  6. А 27 Қазан, 2019 22:28 Жауап

    Жүрекжарды жырыңызбен де, соттың басы-қасынан табылған қамқор ісіңізбен де үлгі болып жүрсіз талай жанға!Қазыбек аға, Алла ісіңізді оңалсын! Ислам ағамызға бостандық!

  7. Гүлім 27 Қазан, 2019 22:30 Жауап

    Жырыңыздан шынайы өмір көрдім, ағаға деген қамқоршы көңіл көрдім! Жасай беріңіз жаза беріңіз Қаз-Аға! Ислам ағаға бостандық!

  8. Ғазиза 27 Қазан, 2019 22:33 Жауап

    Қазыбек аға бастаған шардаралық шайырлардың сот залын поэзия алаңына айналдыруы заңдылық! Құдай қуат беріп, тілектеріңіз қабыл болсын! Ислам ағаға бостандық!

  9. Мəриям 28 Қазан, 2019 11:29 Жауап

    Қазыбек аға, Алла сізге қуат берсін! Ислам Əбіш ісінде əрбір соттың басы-қасынан табылып, əрі қолдаушы азаматтарды да жұмылдырып жүрсіз! Жырыңызбен де, ісіңізбен де əділеттілік іздесеңіз, Әділеттілік алдыңыздан шықсын!Ислам ағамызға аман-есен отбасымен қауышу нəсіп болсын!

  10. Манзура 28 Қазан, 2019 11:31 Жауап

    Осынау жырыңызбен қоғамдағы дертті ашып көрсете отырып, Исламдай атпал азаматқа рух беріп, жігерлендіріп отырсыз! Алаш азаматтарына Алла жар болғай!

  11. Алик 28 Қазан, 2019 14:32 Жауап

    Әсерлі жыр екен Қазеке! Әуелетіп жыр шумағын қайырыпсыз, бәрекелді! Сіздей азаматтар қолдап жатса міндетті түрде әділдік орнайды! Ислам бауырымызға әділдік тілеймін!

  12. Шолпан Жартасова 28 Қазан, 2019 14:35 Жауап

    Еңселі ерді ақыны қолдап келіп жырлап рухты өлең оқып жатқаны қандай тамаша! Қазыбек Иса қолдаймыз! Ислам соты әділ болып, бостандыққа шығуы тиіс! Қолда бар алтынды қор қылмайық ағайын!

  13. Алтын Идрисова 28 Қазан, 2019 14:48 Жауап

    Ислам Әбіш колдауга лайык тулга! Казеке дурыс жасапсыз! Адилдик орнауы тиис!

  14. Ырысбек Аділет 28 Қазан, 2019 14:50 Жауап

    Ислам бостандыққа шығуы тиіс! Қазақ үшін қазақтың ақшасын экономдап, өз ұлты үшін болысқан ер! Не үшін қолдамасқа мұндай кісіні?! Қолдаймын!

  15. Жанабай Абзалулы 28 Қазан, 2019 14:52 Жауап

    Тақырып өте дәл таңдалыпты Қазеке. Керемет! Алла жар болсын! Рухтандырып жібердіңіз! Сәттілік! Әділдік орнасын сот залында!

  16. Даулет Байбосунов 28 Қазан, 2019 14:55 Жауап

    Қазақ үні сот залында әсерлі жырмен беріліпті Ғажап! Казыбек Иса қолдаймыз! Ислам Әбиш бостандыққа шығарылсын! Ьіздің қаржымызды қорқаған арда тұлғаны біз неге қолдай алмаймыз?!

  17. Алтынбек Ақжарқын 28 Қазан, 2019 14:58 Жауап

    Сот залын тым тырыс етіп Қазекеңнің әсерлі жыры отырғандардың тіпті видео арқылы тыңдаған біздің жүрегімізге жетті! Ислам бауыр босатылсын, әділдік іздейміз! Қолдаймыз Екі бауырымфзды да!

  18. Шерхан Морали 28 Қазан, 2019 15:00 Жауап

    Казак бир ауыз созге токтаган халык! Тындар кулакка асерли соз айтылган олен жолы болыпты! Казакты казак колдамама ким колдайды. Колдайык . Исламга адилдик орнасын!

  19. Салтанат Шораева 28 Қазан, 2019 15:20 Жауап

    Батыр ұлымыз абақтыда отырмауы керек халқым ау! Трилион үнемдеген кісі батыр емей немене! Қазеке ғажап! Тұлғаны тұла бойды шымырлатып жіберді жырыңыз! Шабытыңыз шарыықтай берсін!

  20. Жарас Агыбай 28 Қазан, 2019 21:02 Жауап

    Колдаймыз! Казекен казак тилинин дарежесин коргап журген азамат! Казакты казак колдаса ауызбиршиликтин белгиси! Сот адил шешим шыгарсын!

  21. Токтар Сайлыгараев 29 Қазан, 2019 14:53 Жауап

    Ақыны қолдаған бауырымыз әділдікке қол жеткізуі қажет! Жарайсыз Қазыбек Иса!

  22. Жадыра Шымалы 29 Қазан, 2019 14:59 Жауап

    Қазақты қазақ осылай қолдауы қажет! Не деген керемет жыр! Қай жерде болмасын қолдау қажетпіз бір-бірімізді! Болар елдің ұлдары бірін-бірі батыр дер демекші, елдің ақшасын үнемдеген тұлғаны тұрмеге жатқызу қиянат! Үлкен қиянат! Қазеке өз позицияңыз бар үлкен тұлғасыз, Керемет! Жарайсыз!

  23. Хамза Ақбай 29 Қазан, 2019 15:06 Жауап

    Қазіргі күннің батырын жырға қосып жатқаныңыз өте керемет! Алланың нұры жаусын! Ислам Әбіш сотына әділдік талап етеміз! Әділ сот Қазақ елі болашағының айқын бейнесі!

  24. Ерден Келешек 29 Қазан, 2019 15:08 Жауап

    Жырла ақыным! Пай пай! Рухты көтеріп еңсені тіктейтін қолдау жыры екен! Шабытың шарықтап шалқысын жампозым!

  25. Ураз Жандаулетов 29 Қазан, 2019 15:11 Жауап

    «Ердің құны құны триллион» тақырып дәл тауыпсыз Қазеке! Жүректі елжіреткен жыр болды ау сот залындағылардың. Жазарыңыз таусылмасын! Бауырымызға тек әділдік тілейміз!

  26. Бақыт Қайырғали 29 Қазан, 2019 15:14 Жауап

    Қазақ қашанда қадірлісін қолдай бідген! Ақыны қолдаған бауырымыз рухани және моральді түрде қолдау сезінген болар. Жарадыңыз Қазеке

  27. Нартай Занғали 29 Қазан, 2019 15:18 Жауап

    Қыраным бауырын қанатының астына алып қорғаштап жатыр екен ғой! Қолдауға Қорғауға лайық тұлға Ислам Әбиш ! Тілекшіміз! Әділдік орнайды деп сенеміз!

  28. Қанат Байгелді 29 Қазан, 2019 15:25 Жауап

    Пікірлердің барлығы қолдау білдіріп Әділдік сұрап жатыр екен. Осыдан ақ көрініп тұр қолдаушысы тілектес қазақтың бауырлары бар екені! Керемет .
    Бағы жанып бостандыққа шықсын деп біз де тілекшілердің қатарынан болайық!

  29. Мұхтар закирович 29 Қазан, 2019 15:29 Жауап

    Қолдаймыз! Әділ шешім шығарылсын! Ислам Абіш бостандыққа шығарылсын! Лайықты!

  30. Улықбек Ерғабыл 29 Қазан, 2019 15:32 Жауап

    Адал қызмет қылған адамның қащан аяғынан шалуды қоямыз осы қазағым?! Ислам бауыр біз бен сіз үшін осы жерде отыр. Біз не үшін қолдамаймыз олай болса бірігіп әділдік етуін талап етеміз! Жырқа қосқан өлеңің жанға дауа екен!

  31. Үкібай Жанасылов 29 Қазан, 2019 15:35 Жауап

    Триллионды үнемдеп түрмеде жатқан жанпозым ау! Елдегі сот жүйесінен әділдік сұраймыз! Шығарылсын! Біз сізбен біргеміз!

  32. Ая 2 Қараша, 2019 22:33 Жауап

    Қазақтың жырымен рухтанған атпал азамат! Рухыңызды ешкім сындыра алмас. Берік болыңыз күні ертең ақ күліп қарап шығып кетесіз теміп тордан.

  33. Даулет 24 Қараша, 2019 20:01 Жауап

    Қатенің әкесін (қате жазудың) әкесін латын алфавитіне өткенде көреміз. Көргеннен көрмегеніміз алда.

Пікір немесе жауап жазу

1 × төрт =