توقاەۆ: الاياقتار تۇرمەدە وتىرۋى كەرەك

2029
0
بولىسۋ:

قازاقستان پرەزيدەنتى قاسىم-جومارت توقاەۆ قۇرىلىس سالاسىندا «الاياقتاردىڭ» كوبەيگەنىن ايتىپ, ەلدىڭ باس پروكۋراتۋراسى مەن ىشكى ىستەر مينيسترلىگىنە وسى ماسەلەمەن ناقتى اينالىسۋدى تاپسىردى, – دەپ حابارلايدى qamshy.kz.

بۇل تۋرالى توقاەۆ نۇر-سۇلتان قالاسىنىڭ اكىمدىگىندە وتىپ جاتقان ەلوردانى ودان ارى دامىتۋ ماسەلەلەرى جونىندەگى ماجىلىستە ايتتى.

توقاەۆتىڭ ايتۋىنشا, قازىر نۇر-سۇلتاندا قۇرىلىسى اياقتالماعان «49 پروبلەمالىق نىسان بار جانە 13500 ۇلەسكەر سول نىسانداردىڭ قۇرىلىسىنىڭ اياقتالعانىن كۇتىپ جۇر».

– ۇلەسكەرلىك ماسەلەسى دە جەدەل شەشۋدى قاجەت ەتىپ وتىر. قالادا 49 پروبلەمالىق نىسان قالىپ وتىر. ولاردىڭ قۇرىلىسىنىڭ اياقتالۋىن 13 500 ۇلەسكەر كۇتۋدە. بۇل پروبلەمانى شەشۋگە 2018-2019 جىلدارى 40 ملرد تەڭگە بولىندى. بىراق, نەبارى 4,5 ملرد تەڭگەسى عانا يگەرىلگەن. بۇعان قوسا, اكىمدىك قوسىمشا 170 ملرد تەڭگە سۇرايدى, – دەدى پرەزيدەنت.

وسى ماسەلەگە قاتىستى تۇسىنىكتەمە بەرگەن قالا اكىمى التاي كولگىنوۆتىڭ ايتۋىنشا, اربىر پروبلەمالى نىسانعا قاتىستى جول كارتاسى ازىرلەنگەن.

– ولاردا جوبالىق-سمەتالىق قۇجاتتارىنىڭ بولماۋى سيياقتى پروبلەما بولدى. كوپتەگەن الاياقتار تۇرعىنداردى الداعان. قازىر ولار تۇرمەدە وتىر جانە زاڭعا سايكەس جاۋاپكەرشىلىكتەرى بار. ولار قۇجاتتارىن جوعالتىپ العان نەمەسە بەرمەگەن. سوندىقتان بۇكىل جاز بويى قۇجاتتارىن ازىرلەۋمەن اينالىستىق, قارجى ينستيتۋتتارىمەن, ەكىنشى دەڭگەيلى بانكتەرمەن, ورتالىق مەملەكەتتىك ورگاندارمەن جۇمىس ىستەدىك. ارقايسىسى بويىنشا ناقتى جوسپارىمىز بار. بىز سىزدىڭ تاپسىرماڭىزدى ورىندايمىز, – دەدى كولگىنوۆ.

وز كەزەگىندە توقاەۆ قالا اكىمنىڭ «كوپتەگەن الاياقتار تۇرعىنداردى الداعان» دەگەن سوزىنە توقتالىپ, قۇزىرلى ورگاندارعا «الاياقتارمەن» كۇرەسۋدى تاپسىردى.

– قازىر الاياقتار كوبەيىپ كەتتى. اسىرەسە, قۇرىلىسشىلار اراسىندا كوبەيدى. باس پروكۋراتۋرا مەن ىشكى ىستەر مينيسترلىگىنە وسى ماسەلەمەن ناقتى اينالىسۋدى تاپسىرامىن. الاياقتار تۇرمەدە وتىرۋى كەرەك. سەبەبى ولار وز ارەكەتتەرىمەن ازاماتتارىمىزدىڭ قۇقىن اياققا تاپتاپ جاتىر. بىزدىڭ ازاماتتاردى الدايدى, دالادا قالدىرادى. مۇنداي جاعدايدا مەملەكەت ۇنسىز قالماۋى كەرەك. تيىستى شارا قابىلداپ, بايانداڭدار, – دەدى توقاەۆ.

بولىسۋ:

Facebook ارقىلى جازىلعان پىكىرلەر

پىكىر نەمەسە جاۋاپ جازۋ

ەكى + 17 =