Президентке Ашық хат – Адам тағдырын ойынға айналдырған лауазымдылардың заңсыз әрекеттеріне тосқауыл болуыңызды сұраймыз!

Бөлісу:

Қазақстан Республикасының Президенті Қасым-Жомарт Кемелұлы Тоқаевқа

А Ш Ы Қ    Х А Т 

Құқық қорғаушылар мен бұқаралық ақпарат құралдарының назарына!

Біз, қазіргі күні пара алуға оқталғаны үшін айыпталып жатқан Ислам Алмаханұлы Әбішевтың және Серік Түкиевтың қорғаушылары Абзал Құспан және Ерлан Макенов осы қылмыстық іс бойынша орын алып отырған заңсыздықтарға байланысты төмендегідей мәлімдеме жасаймыз:

Біздің қорғауымыздағы И.А.Әбішев және С.А.Түкиев 14.03.2019 жылы жалалы айыппен қамалғанға дейін «Дүниежүзілік қазақ күресі» Федерациясының (бұдан былай ДҚКФ) президенті, соңғысы вице-президенті қызметтерін атқарған еді. Соңғы он бес жыл көлемінде, осы кісілердің басшылығымен қазақ күресі бұрын соңды қол жетпеген жетістіктерге жетті. Атап айтатын болсақ, 46 мемлекет ДҚК Федерациясына мүшелікке енді, 7 мәрте әлем, 11 рет Азия біріншілігі өткізілді, қазақ күресі 5-ші Азия ойындарының бағдарламасына енгізілді. Одан басқа, ДҚК Федерациясы қазақ күресін халықаралық UWW (United World Wrestling – Әлем Күрестерінің Бірлестігі) одағына тіркеткен жалғыз ұйым!

Осы және басқа да атқарылған жұмыстардың нәтижесінде, 2016 жылы ЮНЕСКО қазақ күресін адамзаттың мәдени мұраларының тізіміне енгізді.

Қорғауымыздағы азаматтардың айтуынша, осыған дейін еліміздің әртүрлі деңгейдегі лауазымды адамдары тарапынан ДҚК Федерациясын өздеріне беруді, сатуды талап етіп, бермеген жағдайда қылмысты болатындарын айтып, қоқан-лоққы көрсету фактілері болған. Олардың қатарында, белгілі кәсіпкер Арман Шораев, Энергетика министрі Қанат Бозымбаевтың аттары аталады. Бұл азаматтардың Қазақстан Республикасы шеңберінде әрекет ете алатын «Қазақ күресі федерациясына» қатыстары бар. Мақсаттары – дүниежүзілік қазақ күресі Федерациясын, қазақ күресі республикалық Федерациясына қосып, бір ұйымға айналдыру, осылайша Түкиев пен Әбішевтың жылдар бойғы еңбегін және халықаралық дәрежеде мойындалып қойған қазақ күресіне деген құқықты жеке өздері иелену.

Олардың табанды ұсыныстарынан бас тартқаннан кейін, зейнет жасына 2 ай қалған И.А.Әбішев және С.А.Түкиев ҚР сыбайлас жемқорлыққа қарсы күрес (СЖҚК) Ұлттық бюросының қызметкерлерімен «пара алуға оқталды» деген күдікпен ұсталды. Осыдан кейін СЖҚК Ұлттық бюросы қызметкерлерінің қысымымен 20.06.2019 жылы Әбішев те, Түкиевте ДҚК федерациясы басшылығынан өз еріктерімен бас тартатындары туралы арызға қол қоюға мәжбүр болады.  27.06.2019 жылы аталған ұйым басшысы болып СЖҚК Ұлттық бюросының басшысы А.Ж.Шпекбаев тағайындалады. Қазіргі кезде, осы жағдайға орай ДҚК Федерациясының мүшелігіне енген шет мемлекеттерден хаттар түсуде. Себебі, И.Әбішев те, С.Түкиев те ДҚК Федерациясы басшылығына 46 мемлекет өкілдері қатысқан конференцияда сайланған болатын, ал, А.Ж.Шпекбаевтың 7 күн ішінде өзін Федерация басшылығына тағайындап алғаны оларға да, бізге де түсініксіз болып отыр…

Осыған орай, қазіргі кезде қазақ күресін қолдарына алуға мықтап бекінген лауазым иелері өз мақсаттарына жетіп қойды деуге де болады. Олар Әбішев пен Түкиевті қаматты, соттың алғашқы отырысынан-ақ оның айыптау бағытында жүретіні белгілі болды (ол туралы бөлек мәлімдеме жасалатын болады). Енді Ақпарат министрі Д. Абаевты Республикалық қазақ күресі Федерациясына президент қылды. Олар осы шахматтық жүрістері арқылы, алда қазақ күресі үшін болатын таласта ақпараттық қолдауға ие болмақ. Яғни, Абаев мырзаның өкілеттігін пайдаланып, барлық БАҚ өкілдеріне осы іс төңірегінде ақпарат таратуға тыйым салуы немесе біржақты таратуға тапсырма беруі әбден мүмкін деп күдіктенеміз…

Бірақ, Қазақстандағы лауазым иелері қанша жерден өкілеттіктерін өз мақсаттарына асыра пайдаланса да, шетелдік ұйымдар мен БАҚ өкілдеріне тыйым салу еш мүмкін емес. Бұл мәселе қазірдің өзінде Республика аумағынан шығып, халықаралық жанжалға айналып келеді.

Құрметті Қасым-Жомарт Кемелұлы!

Сізден ел президенті ретінде осы істі бастан-аяқ өз бақылауыңызға алып, адам тағдырын шахмат ойынына айналдырған лауазым иелерінің заңсыз, құйтырқы әрекеттеріне тосқауыл болуыңызды және соттың барынша объективті өтуіне ықпал етуіңізді сұраймыз!

Қазақстандық БАҚ өкілдері, тәуелсіз блогерлер мен құқық қорғаушылар назарына:

         Біздің қорғауымыздағы азаматтарға қатысты қылмыстық іс қазір Нұр-Сұлтан қаласы қылмыстық істер бойынша мамандандырылған ауданаралық сотында қаралғалы жатыр. Басты сот талқылауы 14.10.2019 жылы сағат 11-00-ге тағайындалған.

Соттың барынша ашық әрі объективті өтуіне үлес қосуларыңызды сұраймыз!

Қорғаушылар:    А.Құспан

                            Е.Макенов

qazaquni.kz

Бөлісу:

Facebook арқылы жазылған пікірлер

Сайтта 50 пікір жазылған

  1. Арыс 7 Қазан, 2019 16:16 Жауап

    Ақша жүрген жерде әрқашанда дау жүретіні белгілі. Жасы зейнетке келген адам федерацияңды неғылады? Былайынша қолдан қылмыстық іс ашпай сәл шыдағанда сол федарацияны онсыз да тастап кететін де еді ғой Ислам. Әлде сол қиянат жасап отырған тойымсыздар ертеңдері өздерінің де қартаятынын білмейтіндер ме?

  2. Қарақат 7 Қазан, 2019 18:01 Жауап

    Арман Шораев пен Қанат Бозымбаевтарды дəл осындай қиянатқа барады деп кім ойлаған? Жазықсыз Ислам Əбішевке бостандық.

  3. АЙША 7 Қазан, 2019 18:04 Жауап

    14-ші қазан күні Алла қолдап, Ислам Əбішев ағамыз аман-есен темір тордан босатылып, отбасымен қауышса екен. Алладан тілеріміз осы.

  4. Гүлім 7 Қазан, 2019 18:15 Жауап

    Сонда Федерация үшін адамның өміріне балта шаба салатын бұл не деген қатігездік? Адамның өмірі ойыншық па сонда? Кінəіз адамды темір торға қамап қойып, өздері тайраңдап жүре береміз деп ойлайды ма екен.

  5. Қария 7 Қазан, 2019 18:33 Жауап

    Біздің биліктегілер ұрлықтары аздай біреудің еңбегін қанауға шығыпты. Шораев, Шпекбаев, Бозымбаевтарға не жетпей жатыр? Атақты оңай жолмен алу үшін біреудің тағдырын тәлкек етулері ешқандай адамгершілікке жатпайды. Бұлардан не жақсылық күтуге болады? Сондықтан үшеуін де қызметтерінен қуу керек.

  6. Қазақ 7 Қазан, 2019 18:35 Жауап

    Бұлар қалай халықты басқарып жүр. Мына тірліктері кәдімгі қарақшы, бұзақылардың ісі ғой. Биліктен аластату керек.

  7. Бек МЫРЗАҰЛЫ 7 Қазан, 2019 18:37 Жауап

    Атақ үшін, қызмет үшін біреуді жазықсыз қорлап, қапасқа қамау барып тұрған азғындық. Бұдан кейін билікке қалай сенуге болады.

  8. Сәкен 7 Қазан, 2019 18:39 Жауап

    Ислам Әбішев биліктегілерге ұнамай қалғаны бұрыннан белгілі. Енді оны құрту үшін қитұрқы әдіске барып отыр. Алдымен сол тапсырыс бергендерді жауапқа тарту қажет.

  9. Иманбай 7 Қазан, 2019 18:41 Жауап

    Біздің соттарға сенім жоқ. Олар беделден жұрдай. Ертең тапсырыс берушілердің сойылын соғып шыға келеді. Әділдік қайда, адамгершілік қайда?

  10. Махаббат Әділеттегі 7 Қазан, 2019 18:43 Жауап

    Президентке ашық хат жазған дұрыс болды. Бәріміз де соған қосыламыз. Керек болса қол қойып, сотқа да қатысамыз!

  11. Жанар 7 Қазан, 2019 18:45 Жауап

    Осындай жала жабу қашан тоқтатылады. Біз қай заманда, қай елде өмір сүріп жатырмыз? Масқара!..

  12. Жандос Ермекұлы 7 Қазан, 2019 18:48 Жауап

    Осындай әділетсіз елде өмір сүргісі келмеген жастар шетелге кетіп жатыр. Мына бассыздық, жемқорлық тоқтамаса еліміздің ертеңі жоқ. Бұл айдай анық мәселе.

  13. Зауыр 7 Қазан, 2019 18:51 Жауап

    Үш тапсырыс беруші қазақтар ма? Олай болса жеке бастарын ғана емес бүкіл қазақтың намысын ойламай ма? Соған да милары жетпегені ғой….

  14. Бәдікүл 7 Қазан, 2019 18:54 Жауап

    Бір-бірімізді осылай қорласақ ел болмаймыз. Құдай-ау, біз не жазып қойып едік, қазақтарды қолдай көр, ақыл-есін дұрыстай көр!..

  15. Нариман 7 Қазан, 2019 19:02 Жауап

    Ақыл-естен биліктегілер адасып жатыр. Әбден еріккен соң адамның тағдырымен ойнай бастады. Тоқаев осы жолы мыналарды жазаламаса онда болашағымыздан күдер үзгеніміз дұрыс. Бассыздық қой бұл.

  16. Елемес 7 Қазан, 2019 19:04 Жауап

    Мен соған сенбеймін. Қарға қарғаның көзін шұқымайды дегенде ата – бабаларымыз босқа айтқан жоқ….

    • Шарлотта 8 Қазан, 2019 05:58 Жауап

      Иа, билік басында отырғандардың соғысы страшно, атақ үшін бірін бірі тірідей жеп, жұтуға әзір. Бұл бізді басқарып отырған биліктік бейшара, сұмдық көрінісі. Бұлар ойларына келгеін істейді. Сенің заңың, конституцияң бұларға бір тиын.

  17. Қыдырәлі 7 Қазан, 2019 19:07 Жауап

    Министр Бозымбаев алдымен өз саласындағы жұмысты жөндеп алмай ма? Біреуге ор қазса ертең өзі соған түсетінін білмейді ғой…

  18. Қария 7 Қазан, 2019 19:11 Жауап

    Құдай бар болса осылардың жазасын береді. Халықтың көз жасы жібермейді. Нақақақтан-нақақ қамалып жатқандар қаншама. Солардың бала-шағасының көз жасы қарғыс болып тиеді оларға. Солай болғай!..

  19. Гүлім 7 Қазан, 2019 21:33 Жауап

    Ел алдында періште болып көрініп, түрлі қылық-сұмдыққа баратын шенділердің іс-əрекеттері қандай жиіркенішті еді. Осы істегендері күні ертең-ақ алдарынан шығады ғой.

  20. Сымбат 7 Қазан, 2019 21:37 Жауап

    Соны айтсаңызшы Гүлім, өздерінің болмаса ұрпағының алдынан шығары анық. Ешімді қарғаудан аулақпыз. Дегенмен Алла шебер ғой өзі-ақ алдарына алып келеді.

  21. Нағима 7 Қазан, 2019 21:59 Жауап

    Абырой-атақ қолдың кірі ғой. Неге Шораев, Бозымбаев сынды шенділер өз арларына түсетін дақты ойламады екен. Осыдан кейін елден бетіне қалай қарамақ?!і

  22. Жұпаркүл 7 Қазан, 2019 22:02 Жауап

    Ислам Əбішевке Алла жар болсын! Қаншама халық тілеуін тілеп, қолдап жатыр. 14-күнгі сотта Жеңіс жазықсыз жандардікі болсын!

  23. Гүлзат 7 Қазан, 2019 22:31 Жауап

    Президент барынша Əділ, əрі ашық қоғам орнататынын айтқан-ды. Сондықтан қоғамның назары ауған Əбішев ісіне билік те бей-жай қарай қоймас!

  24. Aigerim 7 Қазан, 2019 23:26 Жауап

    Бұл істі Президенттің өзі қадағалау керек, ашық хатты жазған дұрыс болды!

  25. Aigerim 8 Қазан, 2019 00:01 Жауап

    Әділдік орнап, шынайы жемқорлар жауапкершілікке алынсын. И. Әбішті қамаудан босатсын!

  26. Әсел Ақболатқызы 8 Қазан, 2019 00:55 Жауап

    Ендігі Үміт тек Елбасы Тоқаевта. Үкілеген Үмітімізді Өшірмей Халық артқан Сенімнен шығады деген ойдамыз!

  27. Әйгерім Өтебайқызы 8 Қазан, 2019 00:58 Жауап

    Әбішев пен Түкиев- Халық арасында беделі бар Елге көп еңбек сіңірген тұлғалар! Бұлардың жалақорлардың кезекті торына түскені- бәріміз үшін, мына «Ұлым!» деп сүйген халқы үшін Үлкен соққы болды.

  28. Асыл 8 Қазан, 2019 22:14 Жауап

    Шындығында ел тізгінін Тоқаев қолға алғалы бері оң өзгеріс көп. Халық пен билік арасында да тығыз қарым-қатынас орнағандай. Халықшыл президентіміз халық талабына құлақ асып, Əбішевке бостандық берілуіне ықпал етсе екен.

  29. Aigerim 8 Қазан, 2019 22:35 Жауап

    Ақиқатқа апарар жолдың ұзақтығымен қашықтығын, жолда кездесер қиындықтарымен кедергілерін жеңіп – Әділдікпен Адалдық өз орындарына ие болады.

  30. Мақпал 8 Қазан, 2019 22:44 Жауап

    Ол заманда бұл заман «параалуға оқталды» деген жаламен жарты жыл бойы түрмеде отырғызып қою деген ешбір құлаққа сыйымчыз əңгіме. Пара алған күннің өзінде нақты дəлелі болмаса ештеңе жасауға құқығы жоқ емес пе? Бұл не сұмдық?

  31. Ая 8 Қазан, 2019 22:48 Жауап

    Əсіресе, аң терісін жамылған қасқыр кейпінде жүрген бүгінгі билікте жүрген мына азаматтарға не жерімізді білмей отырғанымыз. Қарғыс деген жаман ғой, сазайыңды тартқыза қояды.

  32. Мира 8 Қазан, 2019 22:50 Жауап

    Əбішевке бостандық. 14 күні оң шешім шығар деген үмітпен, жанын шүберекен түйіп отыр Ислам ағамыздың қолдаушылары.Алла жар болғай!

  33. Əсия 8 Қазан, 2019 22:52 Жауап

    Қарғыс алма, алғыс ал дейді дана халқымыз. Елінің тек алғысына бөленген азамат Ислам ағамыз үшін Əділдік салтанат құрады əлі-ақ!

  34. Сая 8 Қазан, 2019 22:55 Жауап

    Тап қазір халық үшін жұмыс істеген боп жүрген Əбішев ісіне қатысты биліктегі азаматтар мүмкін райынан қайтар, істі одан əрі ушықтырмас үшін.

  35. Зоя 8 Қазан, 2019 22:57 Жауап

    Біздің де үмітіміз сонда. Алға қойған алдыңғы мақсаттарынан тайып, елі қолдап тұрған ерге тыным берер.

  36. Асель 8 Қазан, 2019 22:59 Жауап

    ИСЛАМ ƏБІШЕВ ағамызға бостандық! Қара орман халқыңыз өзіңізбен бірге!

  37. Мәмбет құрманбаев 12 Қазан, 2019 10:01 Жауап

    Құрғыр қу құлқын адам баласына не істетпейді. Лауазымын жиып тастап Шораев пен Бозымбаев мырзаларыңа жол болсын ? Көреалмаушылық па, әлде қызғаныш па? Ислам Әбішевтің сол мемлекет қаржысын үнемдегені яғни Шораев пен Бозымбаев мырзалардың қалтасына түспегені өзегін өртеп жатқан болар. Ал Ислам Әбішев қаржыны үнемдеп, жемқорлардың жолын кескеніне кіналі болып, жала жабылып отыр! Елге сыйлы, ары таза мемлекет алдында да, заң алдында да Ислам Әбішевтің ісінің таза екенін ертеңгі сот әділ шешім қабылдап нүкте қояды!

  38. Айбын Аргын 12 Қазан, 2019 17:35 Жауап

    Ислам Абишевке бостандык берилсин! Алла жазса Ислам Абишев бостандыкка шыгуы тиис! Алла соган насип етсин!

  39. Мира 12 Қазан, 2019 22:29 Жауап

    Исламдай Елдің Ерін бар қазақ өре түрегеліп қолдаса да жарасады. Дегенмен, қолдаушылар да көп. Ең бастысы Алла қолдасын! Аман есен отбасымен қауышсын!

  40. Асема 12 Қазан, 2019 22:34 Жауап

    Ислам ағамызға бостандық беріледі деп сенеміз. Алдағы уақытта өтетін сотта Əділдік жеңіп шығуына тілектеспіз!

  41. Сезім 12 Қазан, 2019 22:36 Жауап

    Исекеңнің игі ісі еліміздің бір ғана аймағына ғана емес, исі қазаққа мәлім. Ардақты азаматтың артында қалың елі қазағы тұр. Халқы қолдайды.

  42. Зарина 12 Қазан, 2019 22:42 Жауап

    Я Раббым, Алла бар иманды өзгеден емес ислам дінінен іздеген өзіңнің сүйікті құлыңның бірімін. Атын Қасиетті дініміз – Исламның атауының құрметіне қойғ оран, бойына иман жиған ағамыз Исламның жолын оңғара көр!

  43. Зоя 12 Қазан, 2019 22:48 Жауап

    14 қазан күнгі өтетін сотта ауызбіршілік танытайық ағайын. Тек сөзбен ғана емес, қолдауымызды іспен көрсетіп сот өтетін орыннан табылайық . Алла жар болып, Ислам ағамыз абақтыдан босатылсын деп тілейміз!

Пікір немесе жауап жазу

жиырма + он жеті =