نازارباەۆا قازاقستاندىق مينيسترلەرگە ايىپپۇل سالۋدى ۇسىندى

2725
0
بولىسۋ:

سەناتتا بيۋدجەتتىڭ تيىمسىز ورىندالعانى ۇشىن شەنەۋنىكتەردىڭ جاۋاپكەرشىلىگىن ارتتىرۋ ۇسىنىلدى.

پارلامەنت سەناتىنىڭ توراعاسى داريعا نازارباەۆا بيۋدجەت زاڭناماسىن جەتىلدىرۋ جونىندەگى كەڭەستىڭ وتىرىسىن وتكىزدى. دەپۋتاتتار الدىندا ۇلتتىق ەكونوميكا مينيسترى رۋسلان دالەنوۆ سوز الىپ, بيۋدجەت پروتسەسىن رەفورمالاۋ جونىندەگى جول كارتاسىن تانىستىردى. مينيستر كوتەرگەن ماسەلەلەردىڭ بىرى – مەملەكەتتىك باعدارلامالار بويىنشا بولىنەتىن بيۋدجەت قارجىسىنىڭ تيىمسىز جۇمسالۋى بولدى.

«بىز 2011 جىلدان باستاپ 2018 جىلعا دەيىن جۇزەگە اسقان 10 مەملەكەتتىك باعدارلاماعا تالداۋ جۇرگىزدىك. ولار بويىنشا جالپى العاندا شامامەن 9 تريلليون تەڭگە يگەرىلدى, بىراق بىزدىڭ ويىمىزشا, بيۋدجەت 608 ميلليارد تەڭگەگە تيىمسىز يگەرىلدى. اتاپ ايتقاندا, كىرىس كوبەيمەگەن, جۇمىس ورىندارى اشىلماعان جانە تاعى باسقا. بىز مەملەكەتتىك قارجىنى تيىمسىز يگەرگەنى ۇشىن جاۋاپكەرشىلىك بەلگىلەۋ قاجەت دەپ سانايمىز, ال مەملەكەتتىك باعدارلامالاردى ىسكە اسىرۋ جونىندەگى ەسەپتەردى تولەنگەن سالىقتار, تابىستار, جاڭا جۇمىس ورىندارى, ونىم شىعارۋ كولەمى جانە تاعى باسقا كورسەتكىشتەرمەن تولىقتىرۋ قاجەت», – دەدى رۋسلان دالەنوۆ.

ۇلتتىق ەكونوميكا مينيسترلىگىنىڭ باسشىسى باعدارلامالاردىڭ الەۋمەتتىك-ەكونوميكالىق تيىمدىلىگىن باعالاۋعا قاتىستى مەملەكەتتىك جوسپارلاۋ جۇيەسى تۋرالى قاۋلىعا تۇزەتۋلەر ەنگىزۋدى, الدىڭعى باعدارلامالاردى ىسكە اسىرۋ ناتيجەلەرى بويىنشا قورىتىندىلار, ينديكاتورلار كارتالارى, سونداي-اق مەملەكەتتىك باعدارلامالارعا جوسپاردان تىس باعالاۋ جۇرگىزۋدى ۇسىندى. سونداي-اق, مەملەكەتتىك قولداۋ الاتىن جەكە كاسىپكەرلەر, كاسىپورىندار مەن ۇيىمدار ۇشىن قارسى مىندەتتەمەلەر ەنگىزۋ كوزدەلىپ وتىر.

سەنات باسشىسى د.نازارباەۆا مەملەكەتتىك باعدارلامالار اياسىندا قاراجاتتى تيىمسىز پايدالانعانى ۇشىن جاۋاپكەرشىلىكتى كۇشەيتۋ جونىندە ۇسىنىستار ازىرلەۋ قاجەتتىگىن قولدادى.

«بىزدە كوبىنەسە بىر ادام تۇتاس سالانى باسقارادى, مەملەكەتتىك باعدارلامانى ازىرلەيدى, ال الدەبىر ۋاقىتتان كەيىن مۇنىڭ بارى تيىمسىز نەمەسە باسىمدىقتار قاتە تاڭدالعانىن, مەملەكەتتىك قازىناعا زالال كەلگەنىن كورەمىز, بىراق ەشكىمنەن سۇراي المايسىڭ, سەبەبى ماماندار اۋىسىپ, باسقا ادامدار كەلگەن بولىپ شىعادى. جاۋاپتى ادام دا جوق, يە دە جوق. بىزدىڭ تاجىريبەمىزدە قانشاما سونداي جاعداي كەزدەستى. سوندىقتان بىزدىڭ ۇسىنىسىمىز: جۇمىستىڭ اۋىسۋىنا قاراماستان, بۇرىنعى قىزمەتىنە جاۋاپتى بولۋ كەرەك», – دەدى سەنات باسشىسى.

سونىمەن قاتار, بيۋدجەتتى تيىمسىز پايدالانعانى ۇشىن اكىمشىلىك ايىپپۇل مولشەرى فورمالدى بولماۋى تيىس, كەلگەن زييانعا شامالاس ەسەپتەلۋى تيىس, دەپۋتاتتاردىڭ پىكىرىنشە, ونى تالقىلاۋ اسا ماڭىزدى بولادى. قازىرگى كەزدە سەنات دەپۋتاتتارى ەسەپ كوميتەتىمەن بىرلەسىپ وتىرىپ وسىنداي ايىپپۇلداردى اكىمشىلىك قۇقىق بۇزۋشىلىق تۋرالى كودەكسكە ەنگىزۋ ماسەلەسىن پىسىقتاۋدا.

بولىسۋ:

Facebook ارقىلى جازىلعان پىكىرلەر

پىكىر نەمەسە جاۋاپ جازۋ