ساقتىقتا قورلىق جوق

899
0
بولىسۋ:

اقمولا وبلىسىنىڭ كوپبالالى وتباسىلارىنىڭ ۇيلەرىندە قۇتقارۋشىلار تۇتىن داتچيكتەرىن ورناتۋدا. بۇل تۋرالى اقمولا وبلىسىنىڭ ايماقتىق كوممۋنيكاتسييالار قىزمەتىندە وتكەن بريفينگ بارىسىندا بەلگىلى بولدى.

بىلتىر ەلوردادا اتا-انالارى تۇنگى اۋىسىمدا جۇمىستا بولىپ بەس بىردەي بالا ورتەنىپ كەتكەن قايعىلى وقيعادان ساباق العاندار بيىل ورتتىڭ الدىن الۋ ۇشىن ساقتىق قيمىلعا كوشكەن سىڭايلى. «وبلىستا وسىنداي 499 داتچيكتەر ورناتىلدى, تاعى 303 داتچيكتەر ورناتۋ جوسپارلانۋدا. سونىمەن قاتار, تابىسى تومەن جانە حالىقتىڭ الەۋمەتتىك وسال توپتارىنا كوپبالالى وتباسىلارعا باستى نازار اۋدارىلادى», – دەدى بريفينگ سپيكەرى زىلزالالاردىڭ قاۋىپ-قاتەرىن ازايتۋ جانە ازاماتتىق قورعاۋ سالاسىنداعى باقىلاۋ باسقارماسىنىڭ باستىعى دەنيس شەلكوپلياسوۆ. سول سيياقتى, وبلىستا اعىمداعى جىلعى 15 تامىزدان باستاپ جىلىتۋ ماۋسىمى باستالار الدىندا تۇرعىن ۇي سەكتورىندا ورت قاۋىپسىزدىگى ايلىعى وتكىزىلۋدە. ايلىق بارىسىندا ىس-شارالار تۇرعىلىقتى جەرى بويىنشا حالىقتى ورت قاۋىپسىزدىگى شارالارىنا جانە پەشپەن جىلىتۋدى پايدالانۋ كەزىندەگى ورت قاۋىپسىزدىگى ەرەجەلەرىنە, ەلەكتر جىلىتقىشتار مەن ورت شىققان جاعدايدا ىس-قيمىلعا ۇيرەتۋگە باعىتتالعان. حالىقتى وقىتۋ ۇي-ۇيلەردى ارالاۋ, تۇرعىندارمەن جيىن وتكىزۋ بارىسىندا جۇرگىزىلەدى. سپيكەر 2018-2019 جىلدارداعى جىلىتۋ كەزەڭىندە جۇرگىزىلىپ جاتقان ۇگىت-پروفيلاكتيكالىق جۇمىستارعا قاراماستان, وبلىستا 328 ورت تىركەلگەندىگىن, ماتەريالدىق شىعىن 36 ملن. 360 مىڭ تەڭگەنى قۇراعاندىعىن ايتتى. سەگىز ادام تۇرلى دارەجەدە دەنە جاراقاتىن الدى. ورت كەزىندە 17 ادام قازا بولدى. سونىمەن قاتار, 2018-2019 جىلدارى جىلۋ بەرۋ كەزەڭىندە تجد ورت سوندىرۋ بولىمشەلەرى 21 ادامدى جانە 20 ملن. تەڭگەدەن استام ماتەريالدىق قۇندىلىقتاردى قۇتقاردى. «ورتتىڭ نەگىزگى سەبەپتەرى تۇرعىنداردىڭ وت جاعۋ كەزىندە سالعىرتتىق تانىتۋى, پەشتەردى ورناتۋ جانە پايدالانۋ كەزىندە ورت قاۋىپسىزدىگى ەرەجەلەرىن ساقتاماۋ, ەلەكتر جابدىقتارىن مونتاجداۋ جانە تەحنيكالىق پايدالانۋ ەرەجەلەرىن بۇزۋ بولىپ تابىلادى», – دەپ قورىتىندىلادى دەنيس سەرگەەۆيچ.

qazaquni.kz

بولىسۋ:

Facebook ارقىلى جازىلعان پىكىرلەر

پىكىر نەمەسە جاۋاپ جازۋ